CHIEVO – NAPOLI 01.02.15 (1 A 2) ‘A VEDETTE ACCUSSÍ

CHIEVO – NAPOLI 01.02.15 (1 A 2) ‘A VEDETTE ACCUSSÍ ‘Assa fà â Maronna!Primma o doppo êv’’a succedere ca ‘o Napule riuscesse a vvencere tre fullè ‘e fila. E succedette ajere a vVerona contro ô Chievo quanno se vincette doppo d’avé quase sciupato ‘nu primmo ajone fenuto ‘ncopp’a ll’uno a uno cu n’utubbutto (autogol) pe pparte, ma facenno ‘na granna arrancua (ripresa) e si se fósse vinciuto pe ccinche a uno nun s’avesse arrubbato niente e nnisciuno êsse pututo dicere coccosa.Ma se vincette sulo pe ddoje a uno e cchella d’ajere, a ll’ora d’ ‘o limunciello, guagliú fove ‘na nichessa (vittoria) veramente ‘mpurtante p ‘ ‘e guagliune cuane e ppe don Rafele visto ca ‘o fullè d’ajere rappresentaje ll’accasione cchiú ‘mpurtante ‘e chist’urdimi tiempe, accasiona ca pe ffurtuna, ‘na vota tanto, nun ce facettemo sfují: ‘o pareggio casalinco d’’a Roma, chill’esterne d’’a juve e d’’a Fiorentina, ma soprattutto ‘e scutuliate pigliate ‘a Lazzio e Sampedoria c’erano juto dinto a n’uosso uffrennoce ll’uppurtunità ‘e accurcià ‘a crassifica e dannoce quacche speranzella ‘e ‘nu piazzamento decente ‘ncapiunato. Ma s’êv’ ‘a vencere e, comme sapite, ‘e guagliune nuoste ce riuscetteno pure tenenno ‘e faccia ‘na scuatra tosta e ca, si nun me ricordo malamente, cchiú ‘e ‘na vota ce aveva dato quacche buffettone. Ajere però ‘e ggiuvinotte s’arricurdajeno ca s’êv’ ‘a vencere assulutamente pure jucanno ‘na chiaveva!È overo ca sciupajeno ‘o primmo ajone, ma po se scetajeno, jucajeno sí ‘nu poco ‘ncasinate, quase a ppalla-fa’-tu, quaccuno (po ve dico) aizaje pórvera pe tutt’ ‘o fullè (l’incontro) ma po riuscetteno a vvencere! E a ll’abblativo, ‘o Napule s’ attestaje ô terzo posto ‘ncrassifica ‘nsulitudine cu trentanove punte a ppoco meno ‘e ‘nu sciuscio dô siconno posto d’’a Roma e ccu bboni pruspettive d’arrivarla. Ora però mo s’à dda cuntinuà ‘ncopp’a ‘sta strata accummincianno ggià dô prossimo fullè ‘e Coppa Itaglia contro a ll’Interre. Speriamo bbene pure si ‘a scuatra ‘e Mancini vene ô san Paolo cu ‘o vveleno ‘mpont’ô musso visto ca ajere ‘e ppigliaje ‘ncopp’ê rrecchie dô Sassuolo ‘e culo’echiummo! Peggio pe lloro: ànno abbuscato ajere, abbuscano pure miercurí ca vene e s’’a chiejano a llibbretta lloro i ‘e tifuse lloro ca a rReggio Emiglia, mentre abbuscavano, ‘mmece ‘e penza ê ccorna lloro e a cchi c’’e scardava, penzavano a ffà ‘o coro contr’ô Napule! Passammo ê ppaggelle: RAFAEL 5,5: Miezu voto mancante pecché cu n’asciuta a bbienetenne, senza bbluccà ‘o pallone rijalaje ‘o mumentaneo pareggio ô Chievo, mannanno ‘o pallone a ccarambulà ‘ncuollo a bBritòsso e ppo ‘mporta.’E bbuono ca se facette truvà pronto ô finale ‘ncopp’a ‘na cunchiusione ‘e Radovanoviccio, salvanno ‘o risultato. MAGGIO5,5: Miezu voto mancante pecché pure currenno assaje ‘o ffacette senza zuco, dimustrannose ‘e nun capirse assaje cu gGabbiadini e ssoprattutto pecché dâ camma (zona) lloro partetteno ‘e cruzze (cross) cchiú periculuse p’’a difesa cuana. ALBIOL6: Mantenette ‘a pusizziona dimustranno cegna (grinta) e ppricisione ‘a fora ‘e ‘nu sfregazzo (sbavatura), senza consequenzie, a ll’ arrancua (ripresa). BRITOS 5: Nun fove nè réscuso (roccioso), nè aggriuso (agguerrito) jucanno a ccentro ‘e camma addó lassaje sempe troppu spazzio a pPellissiero; spisso pasticciaje e ‘nnaccasione ‘e ll’utubbutto (autogol) se facette cògliere ‘e surpresa dâ carambula. STRINIC 7,5: Dô lato suojo nun se passaje, nun sbagliaje niente mettennoce cegna (grinta) e arroca (irruenza); suojo ‘o bassurero (suggerimento) p’’o stuco (gol) ‘e Gabbiadini. JORGINHO 5: ‘Na delusione; cumpletamente fora epata (fuori fase), se facette sistematicamente scavalcà, perdenno palla a ccentrocampo. ( dô 68°GARGANO 6,5: Trasette e cce mettette súbbeto granna cegna (grinta) e perzunalità facennose valé ‘mmiezo ô campo.) DAVID LOPEZ 6.5: Braduso e ‘ntricato (lento e macchinoso), sinamparco (comunque) facette chello ca don Rafele s’aspettava. GABBIADINI 7,5:Miso ‘ncampo dô primmo minuto risultaje ‘mpurtante assaje e ddicisivo facenno ‘a pressione (pressing)ca purtaje a ll’utubbutto (autogol) ca sbluccaje ‘o fullè (match), e ssoprattutto mettenno dinto ‘o stuco (gol) d’’ a nichessa (vittoria) cu ‘nu tiro ‘e classe. ( Dô 64°CALLEJON 6,5: Se facette nutà dint’ô finale.) MERTENS 5,5: Pruvaje a sse fà sèntere ‘nfra ê linie, ma nun pugnette. (Dô 77°HAMSIK6,5: Se dimustraje utile â manovra facenno ggirà palla a mmestiere.) DE GUZMAN 4: Jurnata no ‘e ll’ulandese; n’êsse ‘ncarrata meza! Aizaje porvera pe tutt’ ‘o fullè(match),nun ce mettette nè ccegna (grinta), nè ttassezza (velocità)sbaglianno pasiglie (passaggi) e ccuntraste; pe gghionta ‘e ruotolo sprecaje ‘nu stuco (gol) ggià fatto! E cche saciccio! HIGUAIN7,5: Pierno principale d’’e cuane se facette ‘nu mazzo tanto pe tutt’ ‘o fullè (match),jucanno p’’a scuatra senza maje sparagnarese; da ‘na magaria soja pricisa e sistimata nascette ll’azziona ca purtaje a ll’utubbutto (autogol) ‘e Sesàrro. ALL. BENITEZ 6: Vulette vencere ‘o terzo fullè ‘e fila e cce riuscette; nun me piacette ‘o fatto ‘e fà jucà a Ggiorgigno, nè cchillo ‘e levà a gGabbiadini doppo d’’ ‘o stuco (gol). Ma a ll’abblativo avette raggiona isso, pecché chi vence ave raggione! arbitro BANTI 4,5 Carta canusciuta, siscaje ad capocchiam e cchiú spisso nun siscaje quanno ‘mmece êss’ avuto ‘a farlo! E fermammoce cca. Staveti bbe’! Ce sentimmo, si dDi’ vo’, â prossima vota, ca – si nun me sbaglio – è ggioverí ca vene doppo d’’o fullè (incontro) ‘e Coppa Itaglia contro a ll’Interre. R. Bracale Brak