NAPOLI – INTER (04.02.15- COPPA ITALIA) 1 A 0! ‘A VEDETTE ACCUSSÍ

NAPOLI – INTER (04.02.15- COPPA ITALIA) 1 A 0! ‘A VEDETTE ACCUSSÍ È gghiuta, guagliú, è gghiuta!Applavuso! Allimmeno ‘na cosa bbona dinto a ‘sta tempurata (stagione) ca, p’ ‘o mumento, è asciutta ‘e zuco e scarza ‘e zuccaro..., allimmeno ‘na cosa bbona c’è riuscita: ajeressera dint’ a ‘nu san Paolo chino comme a n’uovo, âmmo aggranfato ‘a semifinale ‘e Coppa Itaglia, mannanno â casa cu ‘na purpetta avvelenata e menanno fora dâ Coppa chella scuatra ‘e chianchiere ‘nquacchiate ‘e chillu sbruffone ‘e Mancini ca se penzava ‘e riuscí a llevarese dâ faccia ‘e pacchere d’’a scunfitta ‘e dummeneca passata pigliate a rReggio Emilia contr’ô Sassuolo e ‘mmece mettette ll’uoglio ‘a copp’ô peretto asseccanno n’atu bbuffettone! Certo facettemo ‘o cuollo luongo pecché se vincette sulo ô 93° cu ‘nu capolavoro d’’o Pipita addó ggià ô primma ajone s’êsse pututo vencere si nun se fósse sbagliato assaje.Ma tutto summato cuntava ‘e vencere i è bbello pure vencere ô 93°. O no? Passammo ê ppaggelle: ANDUJAR 6 Durante ô primmo ajone ce penzaje ‘o palo a salvarlo quanno nun putette arrivà ‘ncopp’ô tiro ‘e Icardi. A ll’ arrancua (nella ripresa) se facette apprezzà salvanno ncopp’a ‘na cunchiusione malegna ‘e Puscas(so). KOULIBALY 6,5 Tutto summato ‘e ccose cchiú mmeglie soje ‘e ffacette vedé scavallanno ‘ncopp’â fascia ‘e dritta addó facette ‘o terzino; a ll’epata difenziva (in fase difensiva) quacche vvota fove ‘nu poco casinista pure si senza cusequenzie. Raul ALBIOL 6 Sempe attiento, cu ‘e bbone o cu ‘e ttriste s’’a cavaje sempe, cuntrastanno bbuono [‘a fora ‘e ‘na vota] a pPuscas(so). BRITOS 6 Tutto sommato, purtaje ‘mpuorto ‘nu fullè (gara) senza sfregazze (sbavature) pure pecché ‘e pericule arrivajeno quase sempe ‘a fora. STRINIC 7 N’ ata bbella atalossa (prestazione) d’’o croato ca dètte paricchi prubbleme a sSantònno e mmartellaje a mmestiere pe tutt’ ‘o fullè ‘a curzia ‘e mancina. GARGANO 6,5 ‘O Mota se mettette a ffà ‘o direttore d’orchestra dettanno ‘e tiempe e ccunfermannose pedina ‘mpurtante d’’a scacchiera ‘e don Rafele. LOPEZ 6 Chiammato a ffà ‘a fatica sporca ‘e trancara (contenimento)facette chello ch’êv’ ‘a fà dànno isurrupío (equilibrio) â scuatra. CALLEJON 5,5 Nun fove ancòra isso, ma se facette apprezzà pe ccomme arretraje a difennere.Se vedette però poco annante. (dô 73° MERTENS 6 Sfurnaje quacche cruzzo (cross) ‘nteressante dimustrannose cchiú tellecariello d’’o cumpagno). HAMSIK 6,5 Fove prutacunista d’ ajuda (assist) e ccunchiusione [sballate], sfresaje (sfiorò) ‘nu paro ‘e vote ‘o stuco (gol) e cce mettette ttanta corza; nun fove ancòra proprio isso, ma dètte ‘a ‘mpressione ‘e stà ‘ncopp’â bbona via; ‘nzomma ‘a presenzia soja se sentette. (dô 75° GABBIADINI 6,5 Trasette cu ggranna perzunalità e súbbetto s’abbuscaje ‘nu paro ‘e timmurríe (punizioni) sapurite). DE GUZMAN 5,5 ‘A chiena e ‘a vacante: dètte ‘na mana a ddifennere, ma se vedette poco o niente quanno ‘o Napule attaccaje.(da ll’84° GHOULAM 6,5 Se fósse mmeretata ‘na statua ‘e brillante:tuccaje una palla abbuscannose ‘a rimessa laterale ca po sfruttaje cu cazzimma e pricisione dànno ô Pipita ll’uppurtunità d’oro ‘e vencere ‘o fullè. Accussí comme po fove! ) HIGUAIN 7,5 Accumminciaje cu ‘nu prano (errore) ca da uno comme è isso nun me fósse maje aspettato; po, dint’a ‘nu cuntrasto,chillu chianchiero ‘e Brozoviccio lle cresemaje ‘nu denucchio e ‘o cundizziunaje pe tutt’ ‘o fullè(gara), ma ‘o campione nuosto nun s’avvelette e ccuntinuaje a gghiucà, strignenno ‘e diente, comme acabbatore (rifinitore); però po ô 93° [quanno don Rafele steva quase pe sostituirlo cu zZapata (e ppe ffurtuna nun ‘o ffacette...)]s’arricurdaje d’essere n’artigliero (bomber), d’essere (a ddispietto d’’e cauce) ‘nu sciantiglione (fuoriclasse),recugliette ‘a rimessa laterale ‘e Gulammo, ringraziaje a rRanocchia e freddaje a cCarrizo cu ‘nu tiro a ggiro dint’ô palo luntano, cunzignanno ‘a nichessa (vittoria) ê suoje e mmannanole a ghiucarse ‘a semifinale contro ô pappavallo ‘e Lotito! All. BENITEZ 6 Andivinaje tutto cosa, soprattutto chello ‘e nun sustituí ‘o Pipita; p’’o riesto prubbabilmente una d’’e cchiú sistimate fullè d’’o Napule ca nun cuncedette ca pochi accasioni a ll’Interre e nchiudette ‘a prattica proprio quanno ggià ‘ntribbuna divano quaccuno allisciava quacche ttre penzanno a ll’ajune ampliative (tempi supplementari) e â lotteria d’’e ricure! ARBITRO MASSA 5,5 Caputiaje quacche falte (fallo), ma grossi fetenzie nun ce ne facette. A ‘stu punto p’’a semifinale a mmarzo ce ll’ avimmo ‘a vedé cu ‘o pappavallo ‘e Lotito e ppenzo ca putimmo turnà a vvencere. Allimmeno, accussí sperammo. E mettimmo punto cca. Mo torna ‘o campiunato e ssi dDi’ vo’, ce sentimmo llunnerí ca vène doppo d’ ‘o fullè(match) cu ll’Udinese, orfana ‘e Di Natale ca quanno à dda jucà contr’ô Napule se fa sempe scualificà.Ma ca ‘o ffacesse a bbella posta? Staveti bbe’! R. Bracale Brak