VERONA -NAPOLI (15/03/15) 2 A 0 ‘A VEDETTE ACCUSSÍ

VERONA -NAPOLI (15/03/15) 2 A 0 ‘A VEDETTE ACCUSSÍ Aéh Pare ca mo te veco vestuto ‘a urzo! Guagliù, c’êvemo lassate viernarí passato cundicenno: “Ce sentimmo â prossima vota, doppo d’’o fullè (match) ‘e dummeneca ca vene contr’ô Verona a vVerona speranno ca [corna facenno] ve pozzo cuntà bboni ccose.” Addó?! Nun v’ ‘e ppozzo cuntà! Ajere, a ll’ora d’’e ppastarelle, (‘mmerzo ê sseje) ‘o Napule ô Bentegodi facette ‘na fijura ‘e seje sorde jucanno ‘a peggia antraffa (partita) ‘e ll’urdemu mese;cunchiusione? Pigliaje ddoje carocchie e ‘mmece ‘e farse a cchella zoccola ‘e Giulietta, s’ ‘o facette mettere a ppitoffio e ce ‘ntussecaje ‘a dummeneca e a ccunte fatte mettette ‘na preta ‘ncopp’â speranzella d’ancappà ‘a Roma ô siconno posto. Chi t’’o ddà?! I’ veco quase certamente perduto pure ‘o terzo posto sempe che da cca a mmaggio nun s’avutasse ‘o canisto, ‘a scuatra d’’o pappavallo ‘e Lotito abbiasse a pperdere quacche colpo i ‘o Napule se decidesse a ffà ‘o Napule vincenno dinto e ffora senza farece vedé cchiú antraffe (partite) scunchiusiunate e scellerate (vergognose) comme a cchella d’ajere ca nun se ne salvaje quase nisciuno, ‘a fora ‘e chille ca don Rafele se tenette ‘mpanca e ca mannaje ‘ncampo troppo, troppo tarde quanno ‘e juoche i ‘a frittata erano ggià fatte. Passammo ê ppaggelle: ANDUJAR 5 Nun ce simmo! Jurnata no pure pe isso ca êsse pututo fà quaccosa ‘e cchiú ‘ncopp’ô primmo stuco (gol) ‘e Toni e nun ‘o ffacette e se dimustraje ‘nsicuro quanno ascette ‘nu paro ‘e vote sbaglianno sia cu ‘e mmane ca cu ‘e piede. MESTO 3 E ll’aggiu trattato! Sacrilego (sciagurato) se dimustraje d’essere fatto ‘e ricotta ‘nnaccasione d’’o primmo stuco (gol) verunese quanno nun riuscette a tené a tToni e se facette spustà, cu ‘nu vraccio, comme a ‘na sciuscella [e Banti nun vulette vedé niente!]; braduso (lento) disastrato (scoordinato) e ffútuso (falloso), Juanito Gomezzo ‘o suvrastaje sempe e Hallfredssonnno s’ ‘o facette aglio e uoglio ‘nnaccasione d’’o dubblato (raddoppio) veronese i ‘a scuatra ‘e chillu nnacchennella ‘e Mandorlini criaje cuntinui pericule dâ curzia ‘e Giandummineco.Forze ‘o peggio! (Dô 67° HIGUAIN 6 Trasette troppo tarde, ma ce pruvaje, crianno scumpiglio e ttiranno.Dich’i’: ma comme se fa a ttené ‘mpaca a uno comm’ è ‘o Pipita soprattutto doppo ‘e tre stuche (gol) fatte dint’a ll’antraffa (partita) d’ E.L.? Nun esiste! Rutizzio o nun rutizzio (turnover o non turnover) nun esiste!) ALBIOL 5 Nun riuscette a essere ll’eparco (leader) d’’a trasera (difesa) chiammanose spisso fora ‘mmece ‘e dà ‘na mana . BRITOS 4,5 Troppo nervuso e spisso fútuso (falloso), tenette ‘e sfarme (colpe) soje ‘ncopp’a ttutt’ ‘e dduje ‘e stuche (gol) ‘e Toni ca isso lassaje ‘na vota a mMesto e ‘na vota a Ghoulamme addó ca ll’êsse avut’ ‘a marcà isso! GHOULAM 5 Jankoviccio durante ê primme vinte mnute ‘o pigliaje ‘ngiro i ‘o cucassaje (ridicolizzò) cuntinuamente e pprimma ca se repigliasse appressuranno (spingendo) ‘nu poco ce vulette ‘o bbello e ‘o bbuono. Troppo poco! Gokhan INLER 5,5 Tutto summato ‘nfra ‘e meno peggio: ‘mpignaje quacche vvota a bBenussi, ma sufferette ‘a vivacezza (vivacità) d’’o centrocampo verunese e nun ce mettette ll’attenziona nicessaria p’’ajutà ‘a tràsera (difesa) cuana. LOPEZ 4 Me parette ca tenesse ‘e ccosce ‘e pasta frolla e ffove cuntinuamente ‘ndifficultà fisica sufferenno ll’azziona d’ Hallfredssonnno e d’ Obbadí; ‘nzomma nun facette niente ‘e pusitivo. MERTENS 6 – Tutto summato ‘o meglio d’’o Napule.Sfresaje ‘o stuco (sfiorò il gol) e allimmeno ce pruvaje cuntinuamente zumpanno ll’ommo e mmettennoce cegna (impegno) e perzunalità. Visto ca ‘o guaglione ‘o ttene e sta ‘nforma, tenerlo fora a mMosca fósse ‘nu delitto! HAMSIK 5 Jurnata no pure pe isso ca deludette sbaglianno assaje e facennose puntualmente stuppà dê mediani ‘e Mandorlini. (Da ll’82° GABBIADINI sv Pur’isso trasuto troppo tarde, facette a ttiempo, da fremmo, a ccogliere ‘nu palo cu ‘na cagliosa ‘a trenta metre i a ’abbuscarse ‘nu cartellino jalizzo (giallo) pe n’ inutile fóte (fallo)) DE GUZMAN 3,5 Aizaje porvera pe tutt’ ‘o fullè (match), mantenennose largo a ddritta senza maje puntà ll’ommo e ssenza manco mettere chella cegna ca fósse stata nicessaria.Dimustraje chiaramente d’essere a ccurto ‘e sciato e de nun essere ‘mpalla! (Dô 61° CALLEJON 6 Facette o tentaje ‘e fà tutto chello ca ll’ulandese nun s’era manco sunnato ‘e fà: cercaje ‘e tirà, ma fove stuppato, zumpaje ll’ommo e cruzzaje [crossò] ‘Nzomma cercaje ‘e dà ‘na mana.) ZAPATA 5,5 Se ‘mpignaje, ce pruvaje sí, ma cu poco zuco visto ca spisso jucaje spalle â porta stritto dint’â morza ‘e Rodriguezzo e Morasso ca nun ce ‘a facetteno bbona e ccumminfatte dô matarazzo ‘e sbreglie nun venette manco ‘na cunchiusione veramente periculosa. ALL. BENITEZ 4 Me dispiace, ma accussí è: ê vvote sbaglia pur’isso e ajere aggio paura ca don Rafele tuppaje: applicà ‘o rutizzio (turn-over)doppo d’ avé vinciuto pe ttre a uno cu ll’antraffa d’E.L. ce po’ stà, ma tené fora tutt’’e meglie dint’ ô fullè (match) chiave p’’a lotta a ssiconno e tterzo posto ‘ncrassifica, nun s’êsse ‘a fà! arbitro BANTI 4,5 Carta canusciuta, siscaje ad capocchiam e cchiú spisso nun siscaje quanno ‘mmece êss’ avuto ‘a farlo! Se sfezziaje soprattutto a sventulià cartelline jalizze (gialli) sotto ô naso d’’e cuane e ‘nu paro ‘e lloro, diffidate, ànn’’a zumpà ll’antraffa (partita) casalinca cu ll’Atalanta: chello è bbello ‘o pprutusino..., va ‘a gatta e nce piscia ‘ncoppa! E fermammoce cca. Staveti bbe’! Ce sentimmo, si dDi’ vo’, â prossima vota, ca – si nun me sbaglio – è viernarí ca vene doppo d’’o fullè ‘e ricresso (incontro di ritorno ) cu ‘a Dinamo Mosca ‘e ggioverí. R. Bracale Brak