CHIEVO – NAPOLI (14.4.19) 1 -3 ‘A VEDETTE ACCUSSÍ

CHIEVO – NAPOLI (14.4.19) 1 -3

‘A VEDETTE ACCUSSÍ

Tutto a pposto guagliú. Anze quase. E dico quase pecché ajere a ll’ora d’’e ppastarelle o Ciuccio jette ô Bentegodi contr’ê pariente lasche ‘e chella zoccola ‘e Giulietta e p’ affurzà (vincere), affurzaje, ma ‘o ffacette pe ttre a uno cosa ca a nnujaute ‘ntribbuna-divano ce facette praillà (prillare )cumme a ttanti strummole ‘e ppalluccelle pe bbia ca ll’addaffa (rete)‘o Napule ‘a pigliaje justo ô 90’ doppo ca pe ttutto ‘o sibbacco Pastacrisciuta rumanette a spasso e mmaje ce fossemo aspettate chello ca ‘mmece succedette. Certo vuje mo me putisseve dicere ca tanto è ‘nu rusciolo e ttanto è ‘nu pontapere, ma i’ ve dico ca nunn’è accussí pecché si ‘o Napule mo se trova addó sta, assaje cchiú arreto d’’a vecchia zoccola è stato proprio p’’e tanti russimme (pareggi) e ppe troppi stuche (gol) pigliate cumme quaccuno ca ce à fatto tiffiddà  (perdere) sibbacche (match) ca ‘ncopp’â carta foveno â purtata nosta! Ajere ‘e fatte jettono accussí: durante ô primmo ajone (tempo) ‘o Ciuccio jucaje cuncio cuoncio senza ‘ncasà ‘a mana forte d’’o fatto ca ggià ô 15’’o Ggialante [appustiato arreto a sant’Arcadio ]recuglienno ‘e capa ‘na palla tropp’aveta p’’o marcazzo (centravanti) ‘a mettette ê spalle ‘e Sorrentino, sbluccanno ‘a facenna, ma dooppo signato ‘o Napule quase s’assettaje cumme si lle fósse avastata ll’addaffa (rete) signata. Pe ffurtuna ca po ‘o Jancone primma ‘e ll’arrancua (ripresa), aizaje ‘a voce e ccazziaje ‘mparanza  ‘e jucature; cumminfatte, turnate ‘ncampo fove tutta n’ata musica e ‘a fora ‘e ‘nu paro ‘e lloro [e ppo ve dico]   ‘a scuatraaccumminciaje a mmacenà juoco, cosa ce fruttaje n’ati ddoje addaffe (reti):una ô 64'cu Sant’Arcadio ca, avuta palla da Ciruzzo fora d’’a muntaca (area di rigore) d’’e lucale a bbuone vinte metre dâ porta ‘e Sorrentino, piazzaje ‘e mancino  ‘na tala  cagliosa mmesurata e pricisa  a ffilo ‘e palo ca Sorrentino ‘a putette sulo vedé passà e ‘nfilarse ‘mporta; po a   ll’ 81' fove ‘o turno d’’o  ‘o Ggialante   ‘e farese scuprí pure nassio (goleador) mettenno dinto cu ‘na bbotta senza misericordia ‘na raffadda (respinta) ‘e Sorrentino dannoce accussí ‘a terza addaffa (rete) ca fove ‘a pareglia (doppietta) soja. Peccato ca po ô 90’ Cesar(ro) lassato sulo dê matusteje (mediani) nuoste dint’â muntaca (area di rigore) cuana (azzurra)  cu n’azzeccata tacatarrassa (colpo di testa) piazzaje ‘a palla ô lato scupierto , chillu mancino, d’’a porta ‘e Pastacrisciuta, ca guardaje cumme ‘a palla  traseva, ma nun facette niente pe ttentà ‘e ffermarla e ffove tanno ca accumminciajeno a praillà (prillare )cumme a ttanti strummole ‘e ppalluccelle noste e, crediteme ancòra s’ànn’’a fermà. Giacché sí ‘o Ciuccio facette, dicimmo, ‘o duvere suĵo arfuzzanno (vincedo), mannanno ‘nserie B ‘o Chievo e ffacenno annuzzà ‘ncanna â vecchia zoccola, p’’o mumento, ê fistiggiamente pe ll’uttavo trianculillo janco,russo e vverde... ma ll’êsse avut’’a fà mantenenno ‘a porta acrata (inviolata)e nnun’ ‘o ffacette. Pacienza, passammo ê ppaggelle:

OSPINA[Pastacrisciuta] 5,5: Me dispiace ma ll’attocca miezu zifo(voto) mancante, pecché doppo d’esserse rattato ‘a zella pe ttutto ‘o sibbacco (match) nun tenenno niente che ffà ‘a fora ‘e quacche cusarella cu ‘e piere, quanno ô 90’ êsse avuto ‘a tentà coccosa, nun ‘o ffacette!

GHOULAM 6 Se dètte da fà scennenno e sfurnanno cchiú ‘e ‘nu jabbro (cross), ma ‘e cumpagne nun se  nn’apprufittajeno.

KOULIBALY[‘O Ggialante] 8: Tutto summato fove ‘o meglio ‘ncampo. Arreto nun cuncedette niente a nnisciuno mettennoce ll’arbadanía ( il fisico) chelli ppochi vvote ca ll’avverzarie tentajeno quacche timidda (ripartenza).Nun cuntento ‘e faticà arreto, scennette annante ev mettette ‘a fima soja sotto a ‘na pareglia (doppietta) perzunaleca nun fove poca cosa!

CHIRICHES[‘O Vampiro] 7: Dette ll’udú (tranquillità) nicessaria â trasera (difesa) mo ascenno, mo quanno rummanette lla ddereto pe cruvuillà (coprire). Ô ssolito se cuncedette ‘o lusso , gicché cu ‘e piere sape jucà, ‘e lassà ‘a trasera (difesa) pe cquacche ‘ncurziona centrale.

HYSAJ [Meza Cucchiara]6: Tutto summato nun currette pericule e sse dimustraje sempe attiento,senzà  specà  pallune.

INSIGNE[Lorenzigno] 5,5: Me dispiace ma ll’attocca

pure a isso miezu zifo(voto) mancante, pecché ce fossemo aspettato tanto ‘e cchiú; certo ‘e middibbà (attaccare) ma ‘o ffacette senza zuco e nnun fove maje  periculuso e ’ncopp’â ferza soja fove custretto a gghí cchiù arreto ca annante.

[Dô 67′ ALLAN[‘O ‘Ncrifato] 6: Trasuto a ccose fatte, facette poco, senza maje farese vedé ‘nnante.]

RUIZ[Anema Longa] 5,5: Ll’attocca  pure a isso miezu zifo(voto) mancante, pecché ajere facette poco e soprattutto pecché se purtaje ‘ncopp’â cuscienza cu ‘o cumpagno ‘e sezziona (reparto) pulacco l’itimma (la responsabilità) ‘e ll’addaffa (rete pigliata) p’avé lassato sulo, libbero e ffranco   

ô 90’ a Ccesar(ro)senza jrlo a ccuntrastà.

[Dô 73′ Younes[‘O Mmerecato] 6: Trasette bbuono e sse dètte da fà pe ffarese nutà dô Jancone, sfresanno (sfiorando)ll’addaffa (rete) cu ‘nu tiro a ggiro.]

ZIELINSKI 5,5: So’ crustretto a mmetterle miezu zifo (voto)  mancante pecché nun sulo scennenno annante nun truvaje ‘o ggiadillo (spunto)  dicisivo,ca ce fóssemo aspettato, ma tenette ‘a stessa itimma ( responsabilità) ‘e ll’addaffa (rete pigliata) p’avé lassato sulo, libbero e ffranco  ô 90’  a Ccesar(ro)senza jrlo a ccuntrastà.

CALLEJON[Peppe a ‘nguenta] 6: Tutto summato s’’o mmereta pecché fove sempe attiento ‘int’ê ddoje epate (fasi), peccato  però ca pure si avette quacche bbona accasione ‘nnante nun ne sfruttaje nisciuna! [Da ll’81’ VERDI s.v

MERTENS[Ciruzzo] 6,5: Se facette ‘o prozo tanto faticanno cumme culaturo (filtro) ‘fra armidanno (centrocampo) e cchille lla nnante; spisso scennette  ‘ncopp’â trecquarte pe ‘mmentà coccosa; suoje ‘o tiro ‘e squina (corner) d’’a primma addaffa (rete e ssuĵo ‘o pasiglio pe Sant’Arcadio  ca facette ‘o siconno.

MILIK[Sant’Arcadio  ] 7,5: Pe bbona  parte d’’o sibbacco (match) ‘e cumpagne nun ‘o vedetteno e nnun ‘o cercajeno, ma ll’avastaje ‘na palla decente ca lle dette Ciruzzo ô 64’ pe ppiglià ‘e mmesure e cu ‘na cagliosa a ffilo ‘e palo metterlo a ppitoffio a Ssorrentino! i’ dico: tenimmo ‘sta fariscia (gioia) ‘e marcazzo (centravanti) e ccercatelo, servitelo, datele ‘na palla ògne ttanto, ca sap’isso ch’à dda fà! E cche saciccio!

All.Ancelotti[‘O Jancone] 7:Cumme jette e ccumme venette ‘ncarraje tutt’ ‘e ppedine da mettere ‘ncampo sapenno chello ca ce  aspetta ggioverí quanno pe ll’ejudo (ritorno) ll’Arzenale vène ô san Paolo i ‘o Ciuccio êva fà vedé che ppo’ ffà; cumminfatte mannaje ‘ncampo ‘na furmazziona  assaje uffenziva e riuscette, tutto summato a rreciogliere ‘o ssemmenato!

Arb. LA Penna 5

‘Stu rumaniso ‘e ll’uttantatré, grossi fetenzie nun ce facette, ma  dimustraje d’essere spaisato e dde nun sapé che cacchio nce facesse ‘mmiez’ô campo e ssiscaje a vvienetenne, ê vvote mettennose ‘miez’ê piere d’’e nuoste. Aggio paura ca pure chisto sta ‘ncopp’ô stato paca d’Agnelli e ccumpagne!

E ffermammoce cca, dannoce appuntamento, si ‘o Cielo ‘o vvo’ p’’e diciannove doppo d’’o sibbacco (match) p’’a Cuppetta airupea  ‘e meza semmana ca ‘o Napule  à dda ffà cu ll’Arzenale ô san Paolo; pe ppassà ‘o turno, si nun me sbaglio, à dda vencere pe ttre a zzero i ‘o stesso tre a uno d’ajere nun abbastasse. ‘O ssaccio ca ‘a cosa è ddifficultosa, ma si ‘o Cielo ‘o vvo’, ‘nu miraculo ‘o putimmo avé. Avccussí spero ‘e putereve cuntà.

Staveti bbe’. R.Bracale Brak