NAPOLI – VERONA (19.10.19) 2 A 0 ‘A VEDETTE ACCUSSÍ

NAPOLI – VERONA (19.10.19) 2 A 0

‘A VEDETTE ACCUSSÍ

Ce vuleva guagliú, e ajere all’ora d’’e ppastarelle ô san Paolo contr’ê pariente ‘e chella zoccola ‘e Giulietta, ‘o  Napule turnaje a dd’assapurà ‘o ddoce ‘e ll’arnassa  (vittoria) e  ddoppo ‘e duje zero a zzero  cunzecutive contro ô Genk i ô Turino, ‘e guagliune  d’’o Jancone se mettetteno ‘e tre ppunte dint’â sacca cu ‘na scicca pareglia ‘e Sant’Arcadio, purtannose ‘ncrassifica ô quarto posto appena ê spalle ‘e ll’Atalanta. Se fósse pututo affuzzà (vincere)pure cchiú llargo, ma chillu mammuoccelo ‘e Llorente[trasuto a ll’81’ ô posto ‘e sant’Arcadio] se facette rafaddà (respingere) ‘o tentativo e subbeto doppo Ciruzzo [trasuto ô 76’ ô posto ‘e Lorenzigno] cugliette ‘o palo. Pacienza. ‘O ‘mpurtante era ll’ affuzzà (vincere) e cchello nun mancaje doppo ‘na mez’ora d’’o primmo ajone (tempo) lassata ê guagliune d’ Juric(ce).

Passammo ê ppaggelle:    

MERET[‘O Lungagnone] 7,5 Bella atalossa (prestazione) d’’o purtiere cuano (azzurro) prutacunista ‘int’ a ddiece siconne ô 18’ cu ttre raffadde (respinte) cunzecutive ‘ncopp’ a ttre tentative d’’e verunese e pp’’o riesto fove attiento e stiappo (reattivo) nsi’ ô 93’ diciso a mmantené ‘a porta acrata (inviolata).

 MALCUIT[‘O Tignuto] 6  s’’o mmereta pe ccumme accumpagnaje ll’azziona a dritta pure si quacche vvota arreto êtt’’a fà ‘o straurdinario pe ttené ‘o passo ‘e Stepinski e Zaccagni.

 MANOLAS 6[Chitelassa ] Solo ‘na vota Lazovic(ce) ‘o riuscette a zzumpà, ma senza cuzeguenze.p’’o riesto facette ‘o duvere suĵo a mmestiere pure sacrificannose pecché miez’acciaccato.

 KOULIBALY[‘O Ggialante] 6,5  Turnato doppo d’’a scualifica remmediata cu ‘o Cagliari, doppo quatto minute s’abbuscaje ‘nu cartellino jalizzo (giallo) , ma nun se facette tavvivà  (intimorire) e sse facette apprezzà p’’a perzunalià, cegna(grinta) e  ppruntezza capenno sempe primma ‘e ll’ate addó fósse juto ‘o pallone e ffacennose truvà lla! ‘E cchiú  dètte spettaculo scennenno cumme a ttreno ‘ncopp’â ferza ‘e dritta e sse chiammaje ll’applavuse.

DI LORENZO 6 Dimustraje ‘e saperece fà pure miso a mmancina e ffove ‘mpratteca matàlo (perfetto).

 CALLEJON [Peppe ‘a ‘nguenta] 6  Êsse pututo farese vedé ‘e cchiú annante, ma tenette che ffà ‘ncupertura ‘ncuollo a  Lazovic(ce) o a  Vveloso.Dô pere suĵo partette ‘a palla ‘e ll’uno a zzero cu ‘o tallamio (suggerimento) p’Anema Longa ca mettette ‘mmiezo pe Ssnt’Arcadio.

ALLAN[‘O ‘Ncrifato] 6  Nun se tiraje maje arreto facenno ‘o mastino pe ttutto ll’armidanno (centrocampo) accussí cumme vuleva ‘o Jancone.

 RUIZ[Anema Longa] 6,5  Uno d’’e cchiú ppusitive: pruvaje ‘nu tummolo ‘e vote a ccunchiurere e ffove suĵo ‘o missiddo (assist) pe Ssant’Arcadio ‘nnaccasione ‘e ll’uno a zzero.   YOUNES[‘O Mmerecato] 5  Me dispiace, ma ll’attocca  zifo (voto) mancante pe bbia ca nun cunchiudette manco ‘o  saciccio e nnun rennette pe cquanto se fósse aspettato ‘o Jancone; cumminfatte  nun cercaje maje ‘a porta  e pperdette troppi pallune [dô 64' ZIELINSKI 6  Trasette súbbeto bbuono ‘nsibbacco ( nel match)abbuscannose doppo tre minute ‘a timmurria (punizione) ca ce purtaje ‘ncopp’ ‘o doje a zzero.]

INSIGNE[Lorenzigno] 6,5  ‘A tirata ‘e recchie d’’o presirente lle servette; ‘o frattese  facette cierti gghiucate    ca ce spassajeno e lle facetteno fà pace cu ‘a panca e ll’aràmio (pubblico). Da ricurdà ‘o missiddo (assist) pe Ssant’Arcadio p’’o doje a zzero.   [dô 76' MERTENS[Ciruzzo] 6  Se dette da fà appena trasuto e ppoco mancaje ca nun signasse, ma sfurtunato cugliette ‘o palo!Peccato]

MILIK[Sant’Arcadio] 8,5  Ce facette alliccà ‘e bbaffe: mettette dinto ‘a pareglia d’addaffe (reti) cu ddoje sarpe (zampate) ca lassajeno ‘o signo e llevajeno ‘e ccastagne dô ffuoco ô Jancone; ògne vvota ca trasette ‘int’â muntaca (area di rigore) verunese ‘a trasera (difesa)spaventata ‘o maltrattaje e addirittura ‘na vota s’’o carriajeno ‘nterra senza ca chillu sacchetto ‘e ll’ummeto  ‘e ll’ucummo (arbitro) dicesse niente.[da ll'80' LLORENTE[‘O Spetaccuso] 4,5 Trasette e mmammuoccelo cumm’è sprecaje ‘e capa ll’accasione d’’o tre a zzero. Nun ce ‘o pperdono!]

all: ANCELOTTI [‘O Jancone] 6,5 –‘Ncarraje lassanno ‘mpanca a Cciruzzo pe ppuntà ‘ncopp’a Ssant’Arcadio ca lle risulvette ‘a mubbara (partita), ma sbagliaje a mmettere ‘ncampo  ‘o Mmerecato ca aizaje porvera. Però s’affuzzaje (vinse) e cchesto ce serveva  cumme mo nce  servono miercurí ca vene ‘e tre ppunte ì’nCiampionsa contro ô Salisburgo!

Arb. PICCININI 4,5 E ll’aggiu trattato a ‘sta meza cazetta ca se scurdaje ‘e tené ‘nu sischetto e nnun vulette vedé tutt’’e fetenzie fatte dê verunese. Cu n’ato ucummo (arbitro) forze êssemo affuzzato (vinto) pe ttre a zzero. Pacienza!

 E fermammoce cca, tutto summato  suddisfatte  ‘e cumme jette e soprattutto d’avé mantenuto ‘o passo d’’a vecchia zoccola;  mo se torna  a gghiucà p’’a Ciampionsa  miercurí   ca vene, i ‘o Napule va a Ssalisburgo    e i’  spero ca, si ‘o Cielo ‘o vvo’ ggioverí ve pozzo   cuntà ca   ‘o Napule  à arfuzzato (vinto) n’ata vota sempe speranno ca ‘a chenca ‘e ll’arbitre nce lassano fà ‘o spezziale! Nun me vulesse  sbaglià. Staveti bbe’.

R.Bracale Brak