SPAL – NAPOLI (27.10.19) 1 A 1 ‘A VEDETTE ACCUSSÍ

SPAL – NAPOLI (27.10.19) 1 A 1

‘A VEDETTE ACCUSSÍ

Che accasiona perza guagliú e cche nervatura! Ajere a ll’ora d’’a tiella ‘o Ciuccio  jette a Fferrara contr’ê lucale e nnujeaute ‘ntribbuna-divano ce fóssemo  aspettate ca êsse affuzzato (vinto) e apprufittanno d’’e russimme (pareggi) d’’a vecchia zoccola e d’’a Bbisciona êsse rusecato ‘nu paro ‘e punte ‘ncrassifica. ‘Mmece chi t’’o ddà? Pure ‘o Ciuccio fove fermato ‘ncopp’a ll’uno a uno e cce mettettemo dint’â sacca ‘nu gramo punticciullo ca nun leva nè mmette; è overo ca sant’Arcadio ce purtaje ‘nvantaggio ô 9’ e ca ll’ucummo (arbitro) nun ce dètte [forze pe bbia d’’a Varra ca lle cunzola ‘a zia moneca...] ‘nu ricore a ffavore ca n’ato ô posto suojo êsse dato diece vote...e ghiettemo sotto ô 16’ pe mmano ‘e Kurtic(cio),  è ttutt’overo, ma nunn’è ppussibbile ca dint’a nuvantasei minute nun riuscettemo a mmettere n’ata palla ê spalle ‘e Berisha...sbaglianno cchiú ‘e ‘nu pasiglio (passaggio) dicisivo, nun cunchiudenno maje da fora e soprattutto nunn’è ppussibbile ca dint’a nuvantasei minute nun riuscettemo a mmettere ‘nu jabbro (cross) decente e gghiusto  dint’â muntaca (area di rigore) d’’e lucale pe ssant’Arcadio o p’’o spetaccuso, trasuto ô 72’ ô posto ‘e Ciruzzo e  pproprio a cchillu mammuoccelo nun lle perdono ‘a palla ca sant’Arcadio lle mettette ‘ncapa ô 94’ e ca isso menaje fora ‘mmece ‘e fravecarla  dint’â porta vacante. Ll’êsse fatto, forze avessemo affuzzato (vinto) e ssenza arrubbà niente pecché a pparte ‘o ricore ca nun ce dette ll’ucummo (arbitro) ll’addaffa d’’e lucale fove ‘nu rialo d’’o Turco ca ‘mmece ‘e anticipà a Kurtic(cio)marcannolo, ‘o secutaje  lassanno libbero ‘e fottere a Ppastacrisciuta. Se vede proprio ch’è ‘na caracuddamma (stagione) ca ce à cacato ‘o cane niro i allimmeno ‘ncampiunato fort’è si mantenimmo ‘o quarto posto ‘ncrassifica. Pacienza; simmo nate pe ssuffrí i ‘o ffacimmo bbuono!

Passammo ê ppaggelle:

OSPINA[Pastacrisciuta] 6,5  Cumplessivamente nunn’avette fa assaje;avesse avuto fa coccosa ‘e cchiú ‘ncopp’a ll’addaffa  (gol), ma cu ‘nu granne taccullo (intervento)salvaje ‘o Napule a ll’arrancua (nella ripresa).

MALCUIT[‘O Tignuto] 6  Cunfermato a dritta p’accumpgnà ll’azziona ‘o ffacette senza però riuscí a ffà cape d’angelo; jellato cumm’è se prucuraje ‘nu ‘mpiccio pesante ca ‘o facette ascí chiagnenno; mo voglio vedé cumme ‘a risolve miercurí ‘o Jancone cu ttanti jucature ammaccate! [dô 70' CALLEJON[Peppe ‘a ‘nguenta]  5,5  Miezu zifo (voto) mancante pe bbia ca se ‘nfessete cu cchiú ‘e ‘nu jabbro (cross) p’’o Spetaccuso) ma, poco priciso,  nun ne ‘ncarraje miezo! Peccato.

KOULIBALY[‘O Ggialante] 6 Ce mettette ‘nteliggenza e ccegna (grinta)affuzzanno (vincendo) ‘o stibbacco (duello) cu ‘e nassie (attaccanti) lucale.Nun putette fà niente ‘ncopp’a Kurtic(cio) ô mumento ‘e ll’addaffa (rete) ca nun fove itimma(colpa) soja.

LUPERTO 6  ‘Nu sfregazzo (sbavatura) sulo ‘nnaccasione ‘e ll’addaffa (rete) ca nun fove sinamparco (comunque) itimma(colpa) soja, ma ‘e Lorenzigno [ca nun fermaje ‘o jabbro (cross) e dd’’o Turco ca nun marcaje bbuono a Kcurtic(cio)]. P’’o riesto facette ‘o duvere suĵo vedennosela spisso cu Ppetagna.

DI LORENZO 6 Accumminciaje facenno ll’udè (terzino) bluccato arreto, cumme êva ditto ‘o Jancone ca però a ll’arrancua (nella ripresa) ce penzaje bbuono lassannolo libbero ‘e fa ‘o mestiere suojo scennenno.

ELMAS [‘O Turco] 4,5 Me dispiace ma ll’attocca ‘nu zifo (voto)e mmiezo mancante; ajere fove miso a ddritta jucanno però sempe dint’ô campo, ma ‘a fora ‘e ‘nu paro ‘e jucate decente  smarrunaje paricchio cumme ‘nnaccasiona ‘e ll’addaffa (rete) ‘e Kurtic(cio). [dô 54' FABIAN[Anema Longa] 6,5 Fósse stato meglio si ‘o Jancone ll’êsse fatto jucà dô primmo minuto, mo – forze – stessemo parlanno d’avé affuzzato (vinto) e nno russimato (pareggiato) ‘O spagnuolo dette cchiú  sustanza â munavara  (manovra), tentanno sempe ‘a jucata adatta e nicessaria; peccato p’’o palo ca lle necaje ‘e signà n’addaffa (rete) ca se fósse mmeretata.

ALLAN[‘O ‘Ncrifato ] 6  Doppo d’’e primme diece minute accumminciaje a essere isso facenno ‘o cane ‘e presa, ricuperanno pallune e naviannole (smistandoli); a ll’arrancua (nella ripresa) facette ll’udè  (terzino) a ddritta  nsi’ a cquanno jette pur’isso, ma inutilmente, a ll’assauto d’’a porta ‘e Berisha.

ZIELINSKI 6  Meglio d’ati vvote, ma nunn’è ancòra isso pure si ggestiniunaje (gestí) bbuono tanti pallune, ma nun cercaje maje ‘a porta, cosa ca sape e à dda fà!

INSIGNE[Lorenzigno] 5,5  Me dispiace p’’o capitano, ma cchiú ‘e tanto nun lle pozzo mettere; fove assaje luntano da chello ca po’ ffà e ccumplessivamente s’arriducette a cquacche ica (percussione) senza zuco durante ô primmo ajone (nel primo tempo) e a ll’arrancua  (nella ripresa) dduje o tre  armunàdere  (spioventi) da luntano. Troppo poco!

MERTENS[Ciruzzo]  5,5  Me dispiace assaje ma pur’isso se mmereta miezu zifo (voto) mancante. Ajere facette assaje poco: sulo quacche bbona cumbinazziona, ma scarza ‘e cunnimma; è overo ca avette pochi pallune da jucà dint’â muntaca (area di rigore), ma me dette ‘a ‘mpressione ‘e nun starece cu ‘a capa e dde penzà a ato.[dô 72' LLORENTE[‘O Spetaccuso] 4,5  E ll’aggiu trattato a ‘stu mammuoccelo ca trasete pe ‘na ventina ‘e minute e gruosso cumm’è facette ‘e fuosse ‘nterra senza cunchiurere manco ‘o  saciccio e soprattutto, cumme v’aggiu ditto sciupaje ‘a palla ca sant’Arcadio lle mettette ‘ncapa ô 94’ e ca isso menaje fora ‘mmece ‘e fravecarla  dint’â porta vacante. Uh, ca ll’ànn’’a secutà!]

MILIK[Sant’Arcadio] 7  Ajere fove ‘o meglio d’’e nuoste: nun sulo sbluccaje ‘a facenna quase súbbeto [9’] cu ‘na cagliosa mancina, ma po fove isso a ccosere ‘o juoco avasciannose a mmestiere; ‘e cchiú cercaje spisso a porta e Bberisha êtte ‘a fà ‘o straurdinario; ô niajo (finale) dette ‘na palla d’oro ô Spetaccuso ca, a pporta vacante, nun ‘a sfruttaje.

all. ANCELOTTI [‘O Jancone] 5 ‘Nu zifo (voto) mancante pecchè sbagliaje a ffà a mmeno dô primmo minuto d’Anema Longa pe ffà jucà ‘o Turco ca deludette; ‘e cchiú aspettaje troppo a ffà trasí a Ppeppe ‘a ‘nguenta e ttutto summato nun liggette bbuono ‘o sibbacco(match9 ch’êssem’ avuto affuzzà (vincere) assulutamente.

Arb. LA PENNA 4 Ma qua’ penna e ppenna! Chisto nunn’è mmanco ‘nu lappese scugnato: se facette cartià dâ Varr(a) ‘ncopp’ô ricore, nun vedette paricchi carí (falli) d’’e lucale pe nun parlà ‘e cierti tire ‘e squina (corner)  ca se ‘mmentaje. Tutto summato nun ce purtaje bbuono.

E ffermammoce cca cu ‘a vocca amara e ddannoce ‘a capa ‘int’ô muro pe ll’accasiona perza e ssi ‘o Cielo ‘o vvo’ ce sentimmo ggioverí doppo d’’o sibbacco (match) dicisivo ‘e miercurí ô san Paolo contr’ê guappe ‘e ll’Atalanta.E accumminciammo a ffà corne! Staveti bbe’.

R.Bracale Brak