VERMICIELLE â MARENARA

VERMICIELLE â MARENARA

Nutazzione curiosa (curiosità)

Arricordo ca chistu piatto semprice, ma assaje sabruso (gustoso) era ‘o piatto antelato (preferito) dô bannito Lucky Luciano (p ‘o liggistro d’ ‘o stato civile (per l’anagrafe) Salvatore Lucania (Lercara Friddi, 24 nuvembre 1897 – †Napoli, 26 jennajo 1962),ca s’ ’o faceva serví pure ddoje vote ô juorno dint’ô Transatlantico  famuso refrescaturo (ristorante) ô fobburgo d’ ‘e marenare (al Borgo Marinari).

Chello ca serve pe cquatto perzone

400 gramme ‘e vermicielle,
‘na bbuatta ‘a miezu chilo ‘e pummarole pelatesculate dô zuco ‘e cunzevera,

 100 gramme ‘e sulumiglie (filetti) d’alice salate sott’uoglio,
‘nu bbicchiere d’uoglio ‘auliva dunciglio (extra vergine),
dduje spicule d’aglio spugliato e  aprastato (schiacciato)
‘na cepolla ndurata amanerata (affettata) fina fina,

‘nu puparunciello pirciante (piccante)lavato, asciuttato e grabbato (inciso) p’ ‘o lluongo,

miezu bbicchiere ‘e vino janco e asciutto,

dduje cucchiare ‘e prutusino lavato, asciuttato e ntretato fino fino,
‘nu cucchiaro d’ arecheta,
sale fino quanto ne serve,

sale duppio ‘na vrancata,

pepe niro mmacenato a ffrisco quanto nne piace.

Prucedimento

Dint’ ô bbicchiere ‘e ‘nu mmiscratore (frullatore) mettere ‘e pummarole pelate sculate dô zuco ‘e cunzevera, ‘e sulumiglie (filetti) d’alice salate sott’uoglio, ll’aglio, ll’arecheta ‘o ssale e ‘o puparunciello e sifflare a vvelocità sumèra (a bassa velocità).

Súbbeto doppo dinto a ‘na grossa tiella ca nun azzecca scarfà a ffuoco sustenuto ll’uoglio  e fà  ndurà ‘a cepolla; agnadí(aggiungere) ‘o zuchillo sifflato  e ‘o vino janco.Cocere pe trenta  minute, ammiscanno ògne tanto.Fraditanto àrvere vierde vierde (lessare al dente) ‘e vermicielle, scularle e metterle dinto a ‘na zuppiera cauda,agnadí ‘a sarza, ammiscà,aggarbanno all’urdemo cu ‘o prutusino ntretato e ‘o ppepe mmacenato a ffrisco.’Mpiattà e mmannà ‘ntavula súbbeto.

Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja.

Mangia Napoli, bbona salute! Scialàteve e aggarbbatéve ‘o vernecale!!

Raffaele Bracale