A PENZARCE BUONO

A penzarce bbuono…


Ma fusse pazza? ’Nu poco sbannata?
I’ nun ’o saccio ’ncapo che ce tiene!
Te scite allera e po’ – comme te vène?! –
te ’nfusche e attacche a ffarte ’na picciata…

E si te spio: “Ma ’nzomma, ch’hê passato?…”
faccio cchiú ppeggio e allora me cunviene
e nun parlà, si no chi te trattène
si m’avisse ’a cacciarme ’na sbrasata!?

Per cui decido ’e me levarme ’a tuorno
e me ne scengo llà, tanno pe ttanno,
speranno ca t’acchiane quanno torno…

Ma ’a duje, tre mise sa’ che sto’ penzanno?
Diciste ’a verità o fuje ’nu scherzo
ca stive sulo ’e casa… ê pparte ’Averza?



Raffaele Bracale
(dal vol. 'E CCOSE D''O PPASSATO ed. Graus Napoli 2006)