GENOA – NAPOLI 11/12/10 0 A 1!!! LL’AGGIU VISTA ACCUSSÍ

GENOA – NAPOLI 11/12/10 0 A 1!!!
LL’AGGIU VISTA ACCUSSÍ
Che tensione, guagliú chella partita d’ajeressera e nun sapevo comme ammusciarla: nun fumo cchiú ‘a otto anne, caramelle nun ne pozzo magnà pe vvia d’ ‘o diabbete e pe gghionta ‘e ruotolo stevo sulo; ll’amico mio teneva ‘o catarro e pe nun mm’ammiscà nun venette a vederse a partita cu mmico. Comunque rusecannome rusecannome ‘a mazzarella ‘e divinizzia me sceruppaje doppo ‘nu bbellu primmo tempo ‘nu siconno tempo ‘e strujemiento (frustrazione), ma â fine se sciugliette ‘a rolia, fernette bbuono e i’ sulo sulo fistiggiaje cu ddoje dete ‘e Strega...E ce vuleva! Cacchio, erano anne ca nun se riusceva a vattere ‘o Genoa ô Ferrarísso; eràno anne ca nun se riusceva a ffà annuzzà ‘ncanna a Prezziosi cierti pparulelle mazzecate contro ô Napule ! Che gudimento guagliú, che suddisfazzione (cchiú o meno comme a cquanno se vatte ‘a juventussa..., soprattutto cu ‘a classifica ca se fa sempe cchiú ‘nteressante: ce simmo miso a ppare cu ‘a Lazzio ô siconno posto e ppiazzate ‘a cuollo â stramaleretta juventussa; peccato ca stasera se joca juventussa – Lazzio: comme va va ‘a classifica cagna: si, corna facenne vincesse ‘a juventussa facimmo unu muntone ô siconno posto, si vence ‘a Lazzio se nne fuje n’ata vota, si pareggiano, ‘a Lazzio se mette ‘nu punto annante a nnuje; nun saccio che sperà; forze è mmeglio ‘nu pareggio, allimmeno stammo sempe ‘a cullo â stramaleretta juventussa....
P’ ‘o mumento però penzammo a guderce ‘stu Napule ca ajeressera superaje l’esame busilluso (difficilissimo) cu ‘o Genoa, cunfermannose una d’ ‘e squatre cchiú ‘nforma d’ ‘o mumento, e gudimmoce a Mazzarri ca nun nascunnette ‘a suddisfazziona soje dicenno : "Fa piacere guardare questa classifica" E se lanzaje a pparlà pure ‘e ‘na cosa ca i’ (pe scaramanzia) nun annummenasse proprio: "Lo Scudetto? Continuiamo così!..."

Passammo ê ppaggelle.
DE SANCTIS: 6 ‘Na sola parata ‘mpurtante ‘ncopp’ a ‘na capata ‘e Dainelli; p’ ‘o riesto facette ‘e fuosse ‘nterra passianno ‘nnante â porta!

CAMPAGNARO: 7,5 ‘O meglio lla dereto: assicuraje cupertura, diagunale e rradduppiamente abbuscannose ‘na bbotta a votavraccio ‘nfaccia (ca ll’arbitro facette fenta ‘e nun vedé) ‘a chillu zimmaro ‘e Toni e cuntemporaneamente smestaje annante (spinse in avanti). Luttatore gialante (gigante), ‘e capa ‘e ppigliaje tutt’ isso: Toni, Palladino e ppo Rudolffo tutti tuzzajeno ‘nfacci’ô cummò cu ‘o specchio.
CANNAVARO: 6 (forze esaggero cu ‘stu seje , ma ‘o ffaccio pe festiggià ‘a vittoria napulitana...) e pure pecché ajeressera a cculo’echiummo, aiutato ‘a Campagnaro e Aronica, le riuscette abbastanza ‘e mettere ‘a musarola a Toni (ca è sempe ‘nu bbruttu cliente). ‘Nzomma nun facette danne e pe uno comme a isso è ggià assaje!
ARONICA: 7 Granne partita ‘e Totore ‘o palermitano, sempe preciso, diciso e puntuale quanno se trattaje ‘e difennere!

GARGANO: 7+ Miraculo a Ggenova: ajeressera ‘o muturino uruguaiano comme ô ssolito currette comme a ‘nu pazzo, a vvele schijate, senza paura d’ ‘o contraviento; fuje ‘na vera calamita facenno ‘o muro; ô ssolito sbagliaje quacche passaggio, ma ‘ncarraje (finalmente!) ‘nu tiro ‘e punizzione pennellanno n’assisto cu ‘e sciocche (pregevole) p’ ‘a capa ‘e Marekiaro; e ssempe dô muturino accumminciajeno quase tutte ‘e rimanne (tutte le ripartenze) d’ ‘a squatra.

PAZIENZA: 6,5 – Comme a ‘nu viecchio capomasto abbituato ô cuse e scuse ‘e matune e piattabbande, cusette e scusette, senza metterse ‘nmostra abbarrucannose ‘a fatica cchiú sporca,acchiettanno (mettendo insieme) ‘e reparte cu ffinezza e ‘ngignusità, ‘nterrumpenno ‘e cullegamente ‘e ll’ avverzarie e, quanno servette, disegnaje precise aperture verzo ll’esterne.S’abbuscaje dduje cartelline jalizze (gialli) e pe cunzeguenza chillu russo, ma ‘o siconno jalizzo fuje ‘na sporca fessaria, ‘na ‘nfamità ‘e ll’arbitro Brighi (ca ‘e ppruvaje tutte pe fà ferní ‘a partita ‘mparità e pe furtuna nun avette ‘o vernecale (non ebbe lo stomaco)’e siscà ‘nu ricore a ffavore d’ ‘o Ggenoa, e ddicere ca chillu figlio ‘e ‘ndrocchia ‘e Toni tentaje cchiú ‘e ‘na vota ‘e stennerse ‘nterra a ppe isso dinto a ll’area napulitana! Ma ‘o cartellino russo ‘e Pazienza nun lurdaje ‘o pirfetto vestito tattico ca s’era miso ‘ncuollo ‘o centrocampista pugliese!
MAGGIO: 7,5 – Ruglio, ruglio (piano piano) ‘o guaglione turnaje a ffà ‘o jucatore ‘e ‘nu poco ‘e tiempo fa;ô primmo tempo smestaje comme a ‘nu treno zumpanno ll’avverzario e scanzannose ‘e cauciune ‘e Ranocchia e soci. Ô siconno tempo se dedicaje â cupertura.

DOSSENA: 6 Lle donco ‘o seje , ma sulo pe fistiggià ‘a vittoria. P’ ‘a verità però ‘a colpa nun fuje tutta soja: cu ‘nu Maggio accussí,’ncopp’ â curzia soja s’ à dda badà sulo a cuntené ll’avverzarie.Comunque fuje cu sette parme ‘na diagunale soja ‘ncopp’â linia ‘e porta e andivinaje ‘a respinta ca ce vuleva! ‘A jamma ( la gamba) nun è scioveta ancòra comme a pprincipio d’anno, e isso ‘e cuncierto cu ‘o misterro, sta ammesuranno ‘e fforze facenno ‘nu prociesso ‘e recupero diverzo e cuntrario a cchillo d’ ‘o cumpagno ‘e dritta. Tutto summato me fosse piaciuto cchiú assaje vedé a Vvitale...
HAMSIK: 7,5- Chisto è ‘o Marekiaro ca ce serve: chillo ca sotto porta nun perdona e se fa truvà pronto all’appuntamento; difatte ô primmo tempo ‘ncopp’â punizzione pennellata ‘a Gargano scapulaje (sgusciò) comme a n’anguilla ‘mmiez’ê difenzure rossobblú, se facette truvà ô pizzo esatto e ‘e capa sparaje ‘na fucilata ‘mpressiunante! P’ ‘o riesto firmaje pure quacche azzione ‘e qualità (pregevole).Vuó vedé ca finalmente è turnato dô Sudafrica?I’ so’ quase sicuro!
( da ll’ 83° SOSA: s.v.) ma dètte ‘ na mano, anze dduje piede ‘mpurtante p’ ‘o palleggio ca facette risciatà ‘e cumpagne dinte a ll’urdimi minute, ca nun fernevano maje!!
ZUNIGA: 5,5. Partette largo e s’accentraje cercanno ‘o scumpiglio ‘nvelocità, ma perdette spisso ‘o cuntatto cu ‘o pallone. Quacche vvota mannaje ‘ncunfusione a Mmaggio. Fuje ll’unico ca cu tutta ‘a bbona vuluntà nun pozzo darle seje!
(dô 63° YEBDA: 6,5) Centimetre, piso, quantità … dinto a una parola, chiantutezza (robustezza); chello ca serveva lla ’mmiezo pe sgancià a Gargano e mmannarlo a ffà ‘o pressingo auto.)
CAVANI: 6 Poco o niente servuto dê cumpagne suffrette dinto â partita ‘e cuntenimento e bbasta. ‘O fatto ca mancaje Lavezzi custrignettetutta ‘a squatra e a Cavani ‘mparticulare a ridisignà ,cu ‘na funa ‘ncanna (obtorto collo), tutto ‘o muvimento uffenzivo napulitano e chiaramente ‘o cumpurtamento complessivo d’ ‘o zengariello uruguaiano, ne risentette. Nun fuje mai pericoloso sotto porta, è overo, ma è pure overo ca ‘o guaglione s’abbarrucaje ‘na fatica ‘ngrata e ‘mpressiunante pe quantità: facette arapí ‘a difesa rossoblù cu ciento muvimente senza palla,facette ‘o turnante sia ‘e dritta ca ‘e mancina e persino ‘o difenzore agghiuntato pe cuntrastà ‘e capa ‘o juoco auto ‘ncopp’ê ppalle ferme.

MAZZARRI: 7 Riuscette a cassà ‘o ‘ncantesemo ( a sfatare il tabú) d’ ‘o Genoa e purtaje ‘o Napule dritto pe ddritto ô siconno posto ‘nclassifica; Marassi lle dice ‘na meraviglia : seje punti ‘ncopp’ a sseje,fera chiena ( en-plein)! Mancanno Lavezzi e ‘o curaggio ‘e fà jucà ‘e criature: Dumitru o Maiello, jette a ppiscà n’ata vota l’utilizzo ‘e Zuniga comme esterno agghiuntato; ‘o guaglione culombiano nun ‘mpressiunaje pure senza sfigurà, ma cumplessivamente ô primmo tempo ‘o Napule cassaje ‘o Genoa . Ô siconno tempo po fuje naturale ll’aggrisso (arrembaggio) d’ ‘e rossobblú, ma ‘e guagliune ‘e misterro Cammisa-janca scamazzajeno troppo a gghí arreto ‘e pusizzione lloro e suffrettero cchiú d’ ‘o previsto: uno comme a Sosa êsse pututo dà ‘na mana assaje cchiú primma facenno correre ‘o pallone e nno ‘e ggamme! Ma, comm’è gghiuta e comme è vvenuta, ‘o ciuccio vola e pure ‘e diente assieme ô core ce diceno a cciammiello pe riuscí a cassà ll’ennesimo ‘ncantesemo!
l’arbitro BRIGHI 3 E ll’aggiu trattato! Arbitro senza perzunalità e prubabilmente vennuto nun saccio a cchi (juventussa? E va’ ca no!) , se facette ‘nfluenzà dô pubblico e dê jucature rossobblú.Risultato? P’ ‘o Napule Campagnaro,Cannavaro e Pazienza sotto squalifica. E sino a cquanno squalificano a culo’echiummo trase ‘a ‘atta, transeat, è rrobba ‘e niente e po’ pure farce piacere, Campagnaro e Pazienza so’ pedine ‘mpurtante e chiagne ‘o core a ffarne a mmeno! Da chell’ata parta Rossi nun fuje ammunito (e ppo ve dico) e Toni nun fuje cacciato â via ‘e fora pe ‘na bbotta malegna e premeditata a votavraccio data ‘nfaccia a Campagnaro. Cchú ‘mparticulare, doppo d’avé fatto correre paricchi ‘nfamità ‘e chillu viecchio delinquente ‘e Milanetto e d’ati socie suĵe durante ô primmo tempo, ô siconno tempo cercaje ll’uccasione p’adderezza ‘a partita e farla ferní uno a uno e cumpletaje ll’opera pigliannosela cu Pazienza, ca ggià ammunito ‘mprecedenza pe ‘nu fallo ‘ncopp’ a Rudolffo a centrocampo,anticipaje nettamente Milanetto sciusciannole ‘o pallone ‘ncuntrasto ‘e pede. ‘O centrocampista genuano perdette ‘a palla e se lassaje cadé ‘nterra alluccanno manco ll’avesero fatto n’operazzione senza anestesia; alluccanno alluccano aizzaje ‘e tifuse ca abbiajeno a alluccà pure lloro; ‘nconcrusione fuje ‘o siconno cartellino jalizzo pe Pazienza ca ne fuje cacciato! A ll'87° n’ intervento a bbienetenne (scomposto) ‘e culo’echiummo -Cannavaro fuje casticato cchiú pe ll’ intenzione ca p’ ‘a sasina prucurata (per il danno procurato); pure ‘o capitano zumparrà ‘a prossima partita. Ô 90° perdette, o meglio vulette perdere ll'urdema uccasione pe ssignà a Rrossi dint’ â nota d’ ‘e fetiente,cu ttutto ca ll’êsse visto pure ‘nu cecato ‘o smaccato (plateale) ritardo d’ ‘o centrocampista genuano cercanno primma ‘a jamma ‘e Campagnaro e ppo ‘e mezze pe menarlo ‘nterra!
E bbasta accussí!
Guagliú ce sentimmo, nun saccio si gioverí o llunnerí ca vène. P’ ‘o mumento abbío a ffà ll’augurie a tutte quante. Cu ‘na bbona salute!
R.Brak