NAPOLI CESENA 1/02/12 campionato (0 A 0)LL’AGGIU VISTA ACCUSSÍ

NAPOLI CESENA 1/02/12 campionato (0 A 0)
LL’AGGIU VISTA ACCUSSÍ

Mannaggia, mannaggia e mmannaggia guagliú! N’ata delusione guagliú! Me dispiace d’ ‘o ddicere ma proprio nun ce simmo. Nun so’ cchille d’ajeressera ‘a manera, l’attiggiamento,’o ggenio ch’à dda tènere ‘na granna scuatra. Purtroppo nun ce sta niente ‘a fà: allimmeno ‘ncampiunato ‘a pazziella s’è rrotta e ajeressera cu acqua ‘nzista, friddo e vviento,dint’ ô san Paolo ‘nnante a ssí e nno ‘a miseria ‘e ventimila perzone‘o Napule nun vincette e s’êtte ‘a accuntentà d’ ‘a miseria ‘e ‘nu punto sulo... Ce penzate, guagliú ‘nu punto contro a ‘na scuatra ‘e seje sorde?! ‘Na scuatra ca venette a ffà ‘o catenaccio, assaje cchiú catenaccio ‘e chillo ca faceva ‘a bonanema ‘e Nereo Rocco: otto jucature ‘nlinia ‘nnante ô purtiere! E cquanno passe?! Quanno? Mettimmoce pe gghionta ‘e ruotolo ll’arbitraggio schifuso ‘e Banti e ‘o cunto è ppriesto fatto: tiranno ‘e ssomme addizziunajemo n’ati dduje punte perdute e mettettemo ‘ncarniere ll’ennesima fijura marrò cu ‘e scuatre senza blasone; dicimmo ‘nzomma ca pure chella d’ajeressera fuje ‘na partita ‘ngagnata (deludente), tanto pe parlà pulito,pecché pe pparlà chiaramente s’êsse ‘a dicere ca fuje ‘na vera chiaveca...e ‘o Napule perdette ll’uccasione ‘e pigliarse ‘e tre ppunte ca ‘ncasa s’êsser’ ‘a piglià sempe! Certo, ‘o ssaccio, pure ‘na vittoria – pecomme stammo mise ‘ncrassifica - nun ce fósse servuta quase a nniente; ‘o ssaccio e rripeto ca ‘o Napule oramaje, si vo’ salvà ‘a tempurata, à dda mettere ‘e mmane ‘ncopp’â coppa Italia..., ma però ‘na vittoria ajeressera êsse pututo ddà murale soprattutto a quacche gghiucatore (Inler(ro)) ca ‘o vedette veramente demuralizzato, spaisato, apàteco e ‘ndifferente...È ‘na parola! Che vvuó vencere?! Quann’ ‘o Napule nun è ‘a scuatra camaliontica capace ‘e adattarse a ll’avverzarie e ttruvà ‘e contrammesure nicessarie pe vvení a ccapo ‘e chi joca apierto o ‘e chi fa ‘o catenaccio. E cchesto è tutta colpa ‘e chillu scenziato ‘e Mazzarri ca fóss’ora e ce levasse ll’astío (fastidio)...e ghiesse a ffelicità coccun’ato!
‘Na cosa è ccerta e ciovè ca ‘ncampiunato ‘a furtuna nun ce assiste cchiú; ajeressera: ‘nu palo, ‘na rredda annullata e ‘o pecché ‘o sanno sulo ‘o signalinie ‘e Banti e ‘o Pataterno..., ‘nu purtiere ca se mettette a ffà ‘e miracule piglianno tutto chello ca ll’anno passato traseva ‘mporta, pe nun dicere ‘e chella fetenzia d’arbitro ca ajeressera parette ca ce ‘a teneva a mmorte cu nnuje: chille d’ ‘o Cesena ce mazzuliajeno pe tutt’ ‘a partita e isso sventuliaje cartelline jalizzo sott’ ô naso d’ ‘e nuoste, siscanno úrze ‘e cóse ‘ncurrette ( fuorigioco inesistenti) e facennoce ati fetenzie assurtite! Ora mo .sia ben chiaro nun m’ ‘a piglio nemmeno cu ‘o Cesena, ca venette a ffà ‘o mestiere suĵo... M’ ‘a piglio cu ‘o Napule ca – ô ssolito – sciupaje n’ intero primmo tiempo pure avenno avuto ddoje bboni uccasione pe passà e nun ‘e sfruttaje e ca ô siconno tiempo pure pruvannoce assaje facette ‘nu buco dint’a ll’acqua nun riuscenno a ccapí ca êsse avuto metterce cchiú sustanza ancòra, visto ca jucava nun sulo contr’ô Cesena ma pure contr’ a ll’arbitro e ê signalinie.
Si ripenzo però â partita contro ô bBologna, dico ca ajeressera allimmeno ll’ uccasione ll’ànno criate; ca fósse ‘nu signale d’ arranca (di ripresa)? Sperammo ca sí! Ma nun ce ggiuro! Mo spero sulamente ca cchiú ampressa pussibbile De Pezzentis se decidesse a ddà ‘nu susto (scossone) â scuadra e nne cacciasse ‘mparanza a Mmazzarri e a Bbiguncino ca stanno dimustranno ‘e nun essere all'ardezza. Fuje semplicemente ‘na vriogna comme jucaje, anze comme nun ghiucaje ‘o Napule contr’ô Cesena! E venimmo ê ppaggelle:
DE SANCTIS 6 Nun fuje maje chiammato a ffà ‘e straurdinarie e mmanco ll’urdinario.Fuje quase ‘nu spettatore senza biglietto.
CAMPAGNARO 6- Quacche sbavatura piccerella, ma ce mettette sempe ‘na pezza e cumplessivamente nun facette guaje; arresecaje coccosa ‘ncopp’ a ‘nu pallone ca pruteggette malamente, ma De Sanctis apparaje ‘o fuosso. Ô finale mettette diverze pallune ‘nteressante a ccentro.
ARONICA 6 Accumminciaje cu ‘a martellina tirata, ma po se repigliaje e ghiucaje cu perzunalità facenno sistematicamente ll’urdemo ommo. Spisso facette partí ‘a reto ll’azziona.
BRITOS 6 Furmidabbile ‘e capa e dinto a ll’anticipo, nun facette fessarie dimustrannose ‘mprucresso rispetto â partita cu ‘o Genoa.
(dô 63° ZUNIGA 5,5 – Riuscette spisso a superà ll'ommo ma êsse ‘ncarrato ‘nu cruzzo o ‘nu bbassurero (suggerimento) a ccentro!)
MAGGIO 5,5 Currette cuntinuamente facenno ‘e fuosse ‘nterra ma sistematicamente sbattette ‘nfacci’ô muro d’ ‘e janche e nnire ‘ncopp’â curzia ‘e dritta!
GARGANO 6 Ancòra ‘nfra ‘e cchiú pusiteve d’ ‘o Napule: ce mettette tantu motuperpetuo e accumpagnaje a mmestiere ll'azziona.
INLER 5 Ata atalossa ‘ngagnata (deludente)! Demuralizzato, spaisato, apàteco e ‘ndifferente sbagliaje cchiú ‘e ‘nu bbassurero, e ‘nfase ‘e cupertura fuje disurdinato e cunfuso.
(dô 46° HAMSIK 6 Riuscette a ddà ‘nu poco ‘e cchiú ‘e qualità â manovra uffenziva e ê sustentazzione pe ll’esterne.)
DOSSENA 5 Aizaje póvera ‘ncopp’â curzia ‘e mancina, mettenno ‘mmiezo pallune ‘mpricise sistematicamente prujate (predati) dâ difesa.
(dô 70° VARGAS 6 Bbona ‘a trasuta ‘ncampo d’ ‘o guaglione ca palla ô pere ce sape fa: se facette nutà súbbeto cu ‘na bbella lacetta (serpentina).Ô finale cunchiudette verzo â porta, pure ‘e capa, ma troppo debbulmente.)
DZEMAILI 6 Perdette quacche pallone ‘e troppo, ma spisso riuscette ‘nfra ê linie a ccagnà passo. S’adattaje a purtà ‘a croce stanno a ‘nu posto ca nun è ‘o suĵo.
PANDEV 7 Fuje ‘o cchiú periculoso d’ ‘o Napule. Ce pruvaje ddoje vote ô primmo tiempo, ma senza pricisione; ô siconno tiempo, Antonioli lle necaje ‘a rredda d’ ‘a vittoria ca ‘o guaglione macetone centraje ô finale, quanno però Banti, ca ll’ànn’ ‘a accidere!, ce ll’annullaje ‘ngiustamente!
CAVANI 6 Jucaje p’ ‘a scuatra sacrificannose assaje, ‘ncopp’â curzia. Se facette vedé pure dinto a ll’aria ‘e ricore. Ô primmo tiempo venette fermato sulo sulo annante a Antonioli pe n’ úrzo ‘e cóse ‘ncurretto ( fuorigioco inesistente); ô siconno tiempo, pe precipitazzione cugliette ‘o palo e ô finale Antonioli ‘o fremmaje cu ‘nu miraculo.
MAZZARRI 4,5 Priparaje e liggette malamente ‘a partita: ‘a scuatra (ô ssolito!) jucaje sulo ‘nu tiempo (‘o siconno) e nun se riuscette a cunfurmà (adeguare) ô juoco catenacciaro d’ ‘o Cesena. ‘Ndifesa fossero avastate dduje jucature e s’êsse avuto ‘nfultí ‘o centrocampo cu ggente capace ‘e tirà ‘a luntano!
l’arbito BANTI 3 Mmunnezza! Me ripeto: chille d’ ‘o Cesena ce mazzuliajeno pe tutt’ ‘a partita e isso sventuliaje cartelline jalizze sott’ ô naso d’ ‘e nuoste, siscanno úrze ‘e cóse ‘ncurrette ( fuorigioco inesistenti) e facennoce ati fetenzie assurtite tra cuje chella ‘e annullà a Pandev(vo) ‘na rredda sacrusanta ca c’êsse fatto vencere ‘a partita. E pecché? Eh! ‘O ssanno isso, ‘o Pataterno e ‘o signalinia ca forze vedette ‘na falta ‘e vraccio ‘e Maggio dinto a ll’azziona d’ ‘a rredda, ma nun cecaje a vvedé ca si Maggio aveva fatto ‘a falta ‘e vraccio (e ddico “si” pecché ‘a cosa nun è ccerta...) si Maggio ll’aveva fatto era stato pecché ‘nu difenzore ll’êva dato ‘nu sbuttulone arreto, vuttannolo po ‘nterra. Ora mo, a pparte ca nun ll’hê ‘a annullà ‘a rredda a Pandev(vo), si ll’annulle, po hê ‘a dà ‘o ricore a Mmaggio, mmunnezza!
Ma - comme dice ll’amico mio Sasà - ll’arbitro, pe mmunnezza ca è, fa parte d’ ‘o juoco e nun ce sta ‘a fà niente. È ccompito ‘e De Pezzentis ‘e farse sèntere ‘nfederazzione pecché ‘o Napule nun à dda essere scamazzato e à dda essere tenuto ‘ncusiderazzione comme ‘e scuatre d’ alda Italia!
Si ‘o Signore ‘o vvo’ ce sentimmo â prossima vota.
Staveti bbe’!
R.Bracale Brak