LAZIO – NAPOLI (07/04/12) 3 A 1LL’AGGIU VISTA ACCUSSÍ

LAZIO – NAPOLI (07/04/12) 3 A 1
LL’AGGIU VISTA ACCUSSÍ

Che delusione, guagliú, che delusione! Ajeressere ‘o Napule perdette n’ata partita ‘mpurtante e ca s’êsse avut’ ‘a vencere... E ‘mmece succedette proprio ‘o ccuntrario. Ma i’ m’ o ssentevo ‘e scennere pe dereto ê rine... E nun me sbagliavo a ppenzà ca Mazzarri e ‘e guagliune cuane doppo d’averce ‘ntussecato ‘a Dummeneca d’ ‘e Ppalme, ce avesseno ‘ntussecato pure Pasca! E che saciccio! E Mazzarri â fine d’ ‘a partita tenette ‘o stommaco ‘e dicere ca ‘o Napule êva jucato bbuono e se fósse mmeretato ‘e vencere! Giesú chisto overo è scemo! O vedette n’ata partita..., pecché chella ca vedette i’ dimustraje chiaramente tanti, troppi!, jucature senza cchiú fforza,senza cegna e senza idee, proprio comme a Mazzarri ch’ è n’allenatore prevedibbile e cumpletamente a ccurto ‘e n’idea nova o ‘ntelliggente.
Appena nun putette metterse ‘ncampo cu ‘o solito motulo suojo perdette ‘a capa e sbracaje dimustranno d’avé perduto cumpletamente ‘a capa e de nun essere certamente capace ‘e cagnà ‘a rencontra ‘ncurzo d’opera! Ajeressera po tutta ‘a scuatra facette pena comm’era succieso ‘a dummeneca primma cu ‘a juventus(sa) e doppo ‘nu primmo tiempo ca riuscette a mantenere ‘mparità, ô siconno sbracaje malamente e tutte ‘e jucature pe cchesto s’ammeretajeno quatto, ma coccheduno pure ‘e meno accumincianno ‘a DE SANCTIS ca s’ammeretaje 3 pe ‘na granna papera ca favurette ‘a primma rredda d’ ‘a Lazzio e pe quatto o cinche asciute a scampole ‘e melecotte. ‘O stesso 3 se ll’ammeretajeno CAMPAGNARO(ca oramaje cammina e ppare ca tene ‘o cchiummo dint’ê ccosse...), CANNAVARO (semplicemente fejo (osceno), nun fuje cacchio ‘e anticipà ‘na vota a Rrocchi), BRITOS pe certi ‘ncredibbile aperiusità (ingenuità)comme a cchella d’ ‘o ricore ca ce custaje ‘o tre a uno..., e DOSSENA ‘nu jucatore ‘nfine ‘e vita! ‘Nu discorzo a pparte pe MAZZARRI (2,5 ca cu ‘a rencontra d’ajere jettaje dint’ô Tevere ll’urdima pussibbilità pe ‘nu piazzamento decente ‘ncampiunato e pe salvà ‘na tempurata cumpletamente sprecata; mo ce rummane sulo ‘a speranzella ‘e vencere ‘a Coppa Italia, ma cu ‘sti chiare ‘e luna ‘a veco nera!). ‘E ll’arbitro MAZZOLENI bergamasco e pirciò tifoso juventino nun ne voglio parlà si no me faccio diebbete cu ‘a vocca e ghiesco fora d’ ‘a vuluntà ‘e Ddio. E nun è bbello, spicialmente a Ppasca. Mazzarri e ‘e cuane ce ll’ànnu ‘ntussecata, ma nuje strignimmo ‘e diente e festiggiammo ô stesso cu casatiello, tòrtano, pastiera, crapetto ô tiesto e ova ‘e ciucculata!Auguri! Si dDi’ vo’ ce sentimmo â prossima vota!
Staveti bbe’!
R.Bracale Brak