ROMA – NAPOLI (28/04/12) 2 A 2LL’AGGIU VISTA ACCUSSÍ

ROMA – NAPOLI (28/04/12) 2 A 2 LL’AGGIU VISTA ACCUSSÍ Ca ‘e pozzano accidere, guagliú!Ajeressera ‘e cuane sciupajeno n’ atu sangradale e me detteno n’ata delusione! E che saciccio! No, nun è pussibbile! Nun è pussibbile jucà senza n’antecchia ‘e cazzimma! Ma comme?! A sseje minute dâ fine, doppo d’essere state sotto, stévamo vincenno pe ddoje a uno e ttenevamo ‘e tre ppunte a ppurtata ‘e mane e chella capa fresca ‘e Mazzarri ‘mmece ‘e levà a Zuniga (ch’êva fatto ‘o ssujo e nun è bbuono a difennere...)facenno trasí ‘nu vero difenzore ‘e cchiú e mettenno ‘a difesa a cquatto... che fa? Leva a Ccavani ca cumunque êsse pututo tené ‘mpenziero ê rumanise e nun cumanna ê suoje ‘e fà ‘e bbarricate vuttanno cuntinuamente fora ‘o pallone e fermanno pure cu ‘e ttriste ‘e rumanise primma ca passasseno ‘a linia ‘e mità ccampo. No, nun è pussibbile! Nun se fa accussí! Quanno ce vo’ ‘a cazzimma, ce vo’ si no nun se va annante. Proprio comme succedette ajeressera ca ‘o Napule perdette ‘na granna uccasione, purtannose â casa sulo ‘nu punto addó cu ‘nu poco d’attenzione e dde cegna se nn’êsseno purtate tre! E accussí fernette ca ‘a Roma afferraje pe ‘na recchia ‘a redda d’ ‘o pareggio e ‘nchiudette ‘a partita ‘ncopp’ô doje a ddoje ca pe mme fuje comme a ‘na curtellata dint’a ‘nu scianco, pecché penzo ca mo ‘o terzo posto ‘o Napule s’ ‘o po’ scurdà e De Pezzentis chist’anno ‘e denare d’ ‘a Ciampionsa nun s’ ‘e mmette dint’ô cogliapiecuro! Purtroppo chist’anno ‘o Napule ‘e curtellate me nn’à date tante e cuntinua a mm’ ‘e ddà! Passammo ê ppaggelle: DE SANCTIS 5 Troppi vvote nun ascette (cumminfatte pigliaje ddoje rredde cu ttire ‘a dint’a ll’area ‘e porta..., ll’area soja!) e nun bluccaje ‘e tire ‘a luntano mettennose dint’ê guaje; pe ffurtuna soja ajeresseraGago facette ‘na gagata e se magnaje ‘na rredda fatta doppo ca Morgan nun aveva trattenuto ‘na meza cagliosa ‘e Totti. Sperammo ca se repiglia ambressa Rosati, pecché ‘o Pirata s’ à dd’arrepusà; e ll’anno ca vène i’ spero ca arrivasse Handanoviccio! ARONICA 6,5 Atalossa cunvincente ‘e Totò ca ce mettette ‘ntelliggenza e razziucinio. CANNAVARO 5,5 Sufferette malamente ‘a mancanza ‘e punte ‘e riferimento; s’estranaje dâ lotta risultanno assente ‘ngiustificato ‘ncopp’ê rredde rumanese. ‘Mpricise ‘e púggie soje (i suoi rilanci). FERNANDEZ 5,5 Ô primmo tiempo sufferette assaje cu Bojan; jette meglio ô siconno tiempo, ma dimustraje, ô ssolito, d’essere ‘nu difenzore ‘e ‘na difesa a cquatto. ZUNIGA 5,5 Bellissima rredda soja cu ‘na cagliosa ‘a luntano, ma difennere nun è mestiere suĵo; cumminfatte ‘ncopp’ê ddoje rredde rumanese tenette cchiú ‘e ‘na respunzabbilità. ‘Nfinale ‘e rencontra, quanno s’êsse avuto difennere ‘o vantaggio cu ‘e diente, i’ ll’êsse sustituito cu Britos(so). GARGANO 6 Rispetto a ati vvote me parette stanco, ma s’ à dda ammettere ca nfi’ a ajeressera à fatto ‘nu granne campiunato correnno spisso pe dduje... e è ffatto ‘e carne pur’isso!Meglio, (‘a fora ‘e ll’urdemi cinche minute, comme a ttutta ‘a scuatra) ô siconno tiempo. INLER 7 Ajere ssera me parette ‘e vedé ‘o turco-napulitano visto a Udine. Luttaje cu ‘o curtiello ‘mmiez’ê diente, currette e gghiucaje a mmestiere cu ‘o pallone ‘mmiez’ê piere. DZEMAILI 5 Nun stette ‘nserata! A ppietto d’‘a rencontra a Llecce risultaje assaje ‘mpriciso e aizaje porvera. Venette fermato cu ‘na bbrutta falta dint’â meglia jucata d’ ‘a serata. (dô 52° PANDEV 6 Cu ‘e llazzette (serpentine) soje e ripartenno ‘nvelocità criaje paricchi prubleme â Roma.Servette ‘na granna palla a Ccavani ca facette ‘na rredda spettaculare!)Ll’êsse fatto trasí assaje primma! MAGGIO 6 Nun se stancaje maje ‘e correre e pe ttutto ‘o siconno tiempo se magnaje a Taddei; peccato ca nun fuje priciso cu ‘e sustentazzione e se strafucaje ‘na rredda ggià fatta! HAMSIK 6 Forze nun fuje troppo gliammativo (appariscente), ma servette assaje pe ll’amministrazzione (gestione) d’‘a palla. CAVANI 6,5 Difficile pe tutte, ma no p’ ‘o zengariello nuosto..., luttà ‘a sulo contro a ttutta ‘a difesa avverzaria; quanno lle venette miso vicino Pandev accummenzaje a gghiucà meglio nfi’ a arrivà a ttruvà ‘na granna rredda, chella d’ ‘o vantaggio cuano, cu ‘nu tiro a ggiro sott’ô travesagno(sotto la traversa). Comme a ssempe valiuso (prezioso) dint’ê riplieche(nei ripiegamenti).Nun ll’êsse fatto maje ascí! ( dô 73°LAVEZZI s.v.) All. MAZZARRI 5 Tenette grossi respunzabbilità pe ll’uccasiona perza d’ ‘a scuatra soja, cu ‘nu primmo tiempo overo brutto e cu ‘nu finale ‘ngenuo e ssenza cegna. Avette voglia ‘e dicere ca ‘a scuatra nun è matura... A pparte ca nun è ‘na perzeca ‘e contratiempo..., ‘o compito suĵo è pure chillo ‘e fà maturà ‘a scuatra e isso po’ ajeressera ce mettette ‘o ssujo cu ‘nu carreco ‘e unnice giacché nun capette ca ll’urdimi diece minute s’êvan’ ‘a jucà cu ‘na difesa a cquatto e affruntanno a muozzeche e pizzeche ll’avverzarie struncannone ‘e passe primma ca passasseno ‘a linia ‘e mità campo. Ajeressera s’avette ‘a dimustrazzione ca Mazzarri cu ‘o Napule è arrivato â stazziona finale, cchiú ‘e chello ca à dato nun po’ ddà e ca se nn’à dda jí! arbitro RIZZOLI 4 Scadente; isso e ‘e cullabburature suje s’aventajeno cchiú ‘e n’urzo ‘e cóse (fuorigioco) ‘ndanno d’ ‘e cuane e fuje ‘e maneca larga cu ‘e rumanise ca mazzulajeno ‘ê guagliune ‘e Mazzarri senza ca isso dicesse maje niente! E mettimmo punto cca. Ce sentimmo, si dDi’ vo’ â prossima vota. Staveti bbe’! R. Bracale Brak