LAZIO – NAPOLI (04.03.15 C.I.) 1 A 1 ‘A VEDETTE ACCUSSí

LAZIO – NAPOLI (04.03.15 C.I.) 1 A 1 ‘A VEDETTE ACCUSSí ‘Assa fá ô Cielo!Missiona cumpiuta guagliú! Ce simmo tirato n’ata mola e ttutto summato nun ce putimmo lamentà! Certo fóssemo state cchiú ccuntente si se fósse vinciuto, ma sinamparco (comunque) pariggià fove meglio ‘e ‘nu caucio dint’ê rine e ffove ‘mpurtante ffarlo comme se facette ajeressera a ll’Ulimpico ‘e Roma, sott’ô patapato ‘e ll’acqua, signanno ‘nu stuco (gol) ca, ‘nvista‘e ll’antraffa (partita) ‘e ricresso (ritorno) ô san Paolo, vale oro anze platino. ‘O Napule riuscette a nnun abbuscà cu ttutto ca rijalaje quase tutto ‘o primmo ajone â scuatra d’’o pappavallo ‘e Lotito facennola cummannà, soprattutto a ccentrocampo, ma cuncedenno poco e nniente e anze fove ‘o Napule ca avette ‘nu paro ‘e bboni accasione cu ‘o Pipita i ‘e sciupaje. E ccomme se spieca ‘o pareggio finale? Se spieca facilmente tenenno presente ‘a cegna (rabbia) ‘e ll’arrancua (ripresa) quanno ‘o Napule trasette ‘ncampo cchiú ccuncentrato arreto e cchiú ddiciso annante e nnisciuno me leva ‘a capo ca mentre se pigliavano ‘o ttè don Rafele ‘e ffacette ‘nu cazziatone ‘a levarle ‘o pilo senza rasulo! E bbuono fove pecché ‘e cuane (azzurri), ajere ‘nginse e ppugnetta, anzicché demoralizzarse p’’o stuco (gol) pigliato ô 30° ‘a Klose, sapetteno riaggí, jenno vicino ô pareggio cchiú ‘e ‘na vota e afferrannolo finalmente ô 58° cu santu Gabbiadini capace ‘e farese truvà ô punto justo ô mumento justo pe recogliere ‘nu bbassurero (suggerimento) d’’o Pipita e mmetterlo ê spalle ‘e chell’anema longa d’’o purtiere Berisha pe mmodo ca ce putettemo purtà â casa ‘nu risultato pusitivo e ll’antraffa (partita) d’affarta (di andata) de semifinale ‘e C.I. ce jette dinto a n’uosso. Bbuono accussí! Pioli e ssocie ce steveno aspettanno cunvinte ‘e fà unu muorzo d’’o Napule; ‘mmece s’êtten’’a fà dint’ô prozo! Bbuono accussí!Mo tutto è rimandato a ll’otto aprile cu ll’antraffa (partita) ‘e ricresso (ritorno) ô san Paolo. E ttengo bboni speranze ca ‘o Napule ce po’ rijalà ‘a finale ‘e C.I. spicialmente si ô san Paolo nun se fanno vedé ‘ncopp’ê bbemate (spalti) nè gGiggino-uocchiestuorte, nè ati cestarielle comme antonio conte visto ajeressera a ll’Ulimpico. Passammo ê ppaggelle: ANDUJAR 6: Restaje dint’ â terra ‘e miezo ‘ncopp’ô tiro ‘e Klose, ‘ndiciso si ascí o rummané ‘nfra ê pale e cquanno se muvette fove troppo tarde; risultaje però dicisivo ô finale d’’o primmo ajone, quanno repuzaje (respinse) ‘na cagliosa ‘a fora d’’o tetesco. MESTO 6: Miso ‘ncampo ‘nu poco a ssurpresa, tutto sommato s’ ‘a cavaje; currette quacche rriseco durante ô primmo ajone (primo tempo), ma a ll’arrancua (ripresa) comme a ttutt’’a scuatra, criscette pure si se ll’êtt’ ‘a vedé cu ggente comme Felipe Andersònno e cCandreva ca lle feteva ‘o naso. ALBIOL 5,5: Miezu punto mancante pecché avette ‘o ttuorto,dinto a ‘nu fullè (match ) addó nun sbagliaje ato, d’accumpagnà a cKlose verzo ô stuco ( gol) senza cuntrastarlo comme êsse avut’ ‘a fà!Peccato! BRITOS 7: Stette dint’ ô ssuojo: turreno pesante e acqua a llancelle; se ne vedette bbene cu n’atalossa (prestazione) tosta, pricisa e ssistimata propria ‘e ‘nu gruosso difenzore, Certo êsse pututo fà coccosa ‘e cchiú ‘ncopp’a cchillu cavallone ‘e Felipe Andersònno ‘nnaccasione ‘e ll’uno a zzero, ma doppo poco salvaje quase ‘ncopp’â linia proprio ‘nu tiro d’’o bbrasiliano e cchesto va pe cchello! Ascette pe ‘nu malaurato zumpòro (infortunio). (Dô77° KOULIBALY sv) GHOULAM 5: Durante ô primmo ajone (primo tempo), fove svagato, cunfuso,’mpriciso e nun ce capette quase niente chiunque lle capitasse ‘nnante; meglio a ll’arrancua (ripresa) quanno pur’ isso criscette riuscenno pure a essere ‘nu poco periculuso. INLER 5: ‘A pigliarlo a ppacchere: braduso (lento), ‘mpacciato e spisso cu ‘a capa dint’ê nnuvole facette cchiú ‘e ‘nu pasiglio (passaggio) sballato; perdette ‘nu paro ‘e palle ca nun s’êsseno maje avute ‘a perdere; pe nun ddicere d’’o prano (errore) tutto suojo ca scatenaje ‘o contropiede ‘e ll’uno a zzero! Criscette ‘nu poco a ll’arrancua (ripresa) quanno cercaje pure ‘a porta, ma nun avastaje pe ffarme cagnà idea e farlo dà cchiú assaje! DAVID LOPEZ 6: Nun solo facette chello ch’êva ‘a fà lla ‘mmiezo, ma ajeressera ce mettette pure ‘na cabbesera (colpo di testa) ca schiggiaje ‘o travesagno (traversa). GABBIADINI 7: Se dimustraje ‘o cchiú ‘mpalla d’’e suoje spustannose a ddritta e a mmancina e ffacennose truvà ô punto justo ô mumento justo pe recogliere ‘nu bbassurero (suggerimento) d’’o Pipita e mmetterlo ê spalle ‘e chell’anema longa d’’o purtiere Berisha mettenno ‘a quinta firma sotto a ‘nu stuco (gol) cu ‘a maglia luvarda (azzurra). Ê vvote però êsse avuto ‘a essere cchiú cazzumio (egoista)! ( Dô 73° CALLEJON sv). DE GUZMAN 5: Chi ‘o vedette? Pruvaje a gghiuntà centrocampo e attacco, ma nun ce riuscette quase pe nniente. Sbagliaje pure ‘na chiara accasione pe rijalarce ‘o doje a uno. Ma forze fósse stato troppo! (Da ll’ 81° HAMSIK sv). MERTENS 6,5: ‘O ritorno dô primmo minuto fove cunnito dâ ‘na bbrica (duello) ‘nteressante cu bBasta. Ê vvote riuscette a llargarsela (sgusciar via) cu ppasso tassuso (svelto),quacche ata vota venette fermato, ma ce pruvaje sempe e ddô pere suojo nascette quacche azziona periculosa. HIGUAIN 6: Se mettette ô ssolito ‘a scuatra ‘ncopp’ê spalle jacanno comme sulo n’epàrco (leader) sape fà. È overo ca, pe uno comm’è isso, sciupaje troppi accasione p’aumentà ‘o bbutto (bottino) ‘e diciannove stuche (reti) dint’ â tempurata (stagione) ma fove prisente dint’a ttutte ll’azzione cchiú ppericulose d’’o Napule e soprattutto fove ‘o sujo ‘o bbassurero (suggerimento) ca Gabbiadini trasfurmaje ‘mpareggio. All. BENITEZ 6,5:’E cazziatune ca sape fa servono e ccomme! ‘O Napule ‘e Coppa pruvaje a vvencere e ppurtaje â casa ‘nu pareggio pulitelico (prezioso). Pure ‘a difesa accumencia a ffunziunà meglio. arbitro DAMATO 4,5 Vecchia carta canusciuta st’avvocato ‘e Barletta(e ccomme a ppugliese quase certamente tifoso juventino) è ‘nu chiafeo, fúceto e sciacqualattuca(incapace) e ati vvote addirittura vennuto!Turnato a diriggere ‘o Napule doppo paricchiu tiempe dê ‘nguacchie fatte precedentemente ‘ndanno d’ ‘o Napule, tentaje ‘e tutto pe dà fastidio ê cuane e ppure si grossi fetenzie nun ce ne facette, se mettette pe ‘mmiez’ê piere d’ ‘e napulitane custrette a scartà primma a isso e ppo ê jucature lazziale e nun vedette ‘o juoco viulento e ppruvucatorio d’ ‘e delinquente ‘e Pioli, ausaje dduje pise e ddoje mesure valutanno ‘e falte (falli) ad capocchiam ed esaggeraje cu ‘e cartelline jalizze (gialli) ‘ndanno d’’e cuane (azzurri). E cu cchesto ve saluto e si dDi’ vo’ ve dongo appuntamento a llunnerí ca vène doppo ‘e ll’antraffa (partita) casalinca ‘e dummeneca contro a ll’interra. Forza Napule, Ciuccio fa’ tu! Staveti bbe’. R. Bracale Brak