QUINNICESIMA ‘E RITORNO BARI 1 – NAPOLI 2 LL’AGGIU VISTA ACCUSSÍ.

QUINNICESIMA ‘E RITORNO BARI 1 – NAPOLI 2
LL’AGGIU VISTA ACCUSSÍ.
Amice bbelle, chella d’ajere nun fuje ‘na bbella partita, ma ‘o risultato sí! Chillo fuje ‘mpurtante assaje e servette comme a ll’cqua ‘ncopp’ô ffuoco, pe ccuje avimmo ‘a essere cuntente! È overo ca ‘a partita ‘e pallone avesse ‘a essere ‘nu spettaculo (tanto è overo ca ‘ncopp’ ô buglietto nce sta ‘o timbro S.I.A.E., ma ‘na volta tanto lassammo ‘a parte ‘o spettaculo e ‘a bbellezza e penzammola all’americana, ciové cu ‘a cuncretezza, mascesamente (utilitaristicamente) e ringrazziammo ô Cielo, Mazzarri e ê guagliune d’ ‘o Napule ca ajere ce dettero ‘a suddisfazzione (cu ‘e tre ppunte pigliate) ‘e superà ‘nclassifica ‘a stramaledetta juventús e ce permettettero ‘e jí a scuccià ‘a vicino Palermo e Samp. ‘A partita nun fuje bbella pe ccuie nun vale ‘a pena ‘e raccuntarla. Preferisco parlà ’e chille ca ‘a facettero: jucature,allenatore, arbitro e segnalinee, dicenno ca tutte ‘e jucature d’ ‘o Napule (chi cchiú, chi meno) s’ammeretarono n’applavuso, ma naturalmente chillo cchiú ggruosso s’ ‘o mmeretaje Pocho Lavezzi ca fuje l'ommo d’ ‘a jurnata, l'attaccante ca mettette ‘a firma sotto a dduje golle,e ‘o primmo fuje ‘na cosa spettaculare,mentre ‘o siconno fuje ‘nu capolavoro ‘e pruntezza,e tutte ‘e dduje golle putessero pure veramente valé l'Europa se a ll’urdeme quatto partite ‘e guagliune napulitane se cunfermerranno squatra tosta, capace e ‘e spessore. D’’e jucature barise poco o niente ‘a dicere; sulamente ca fujeno unnice delinquente, unnice carugnune vattiate e cresemate (e faccio quacche nomme: De Vezze,Gazzi, Belmonte etc. ) ca scennettero ‘ncampo no pe ghiucà a pallone, ma pe vattere sistematicamente ‘e napulitane e ‘o facettero scientificamente e cuntinuamente pe tutt’ ‘o campo, e ne sanno coccosa Campagnaro (ca era privo ‘e passà ‘a mità campo ca ‘o pigliavano a cauce o ô mettevano ‘o sgammetto e ‘o menavano ‘nterra), Pazienza (ca ascette sgummato ‘e sanco) e ‘o povero Santacroce ( ca appena rientrato ‘a n’infortunio luongo assaje currette ‘o periculo d’essere struppiato bbuono n’ata vota) ca però nun s’ ‘e tenette ‘e mmazzate, e ‘e riturnaje ô mittente ricurdanno ‘o pruverbio napulitano ca cunziglia: Nun fa pérete a cchi tène culo, nun dà ponie a chi tène mane! Pe nun dicere ‘e chill’ati zezzuse (Allegretti, Barreto, Almiron e Sforzini) ca oltre a menà cauce e mazzate sistematicamente se menavano ‘nterra e chiagnevano miserie pe s’abbuscarse a ffavore quacche punizzione ca invece nun ce stevano. Parlammo mo a uno a uno d’ ‘e nuoste:
De Sanctis 5,5: Nun avette ‘a fa quase niente, soprattutto pecché ‘o Bari nun facette quase niente; ma nun le pozzo dà ‘e cchiú pecché quanno Almiron dètte ‘a capata e facette ‘o golle ca accurciaje ‘e mmesure, me parette ca coccosa avesse pututo fa si nun fosse stato troppo addurmuto e fermo comme a ‘na bbella statuetta.
Santacroce 6+: Rientraje doppo n’assenza longa assaje e ‘nu calvario ca pareva nun fernesse maje! Castillo e Barreto non dettero fastidie serie, ma isso se cumpurtaje buono assaje e me parette veramente ‘nforma.
Rinaudo 6,5: Nun se vedette assaje, ma pecché ‘o Bari, ‘a fora d’ ‘e cauce e d’ ‘e mmazzate facette poco. Isso però comunque fuje attiento preciso e sicuro quanno s’avette ‘a chiudere e cu isso Sforzini rusecaje cca vvicino! Si ô posto sujo ce fosse stato Culo ‘e chiummo Cannavaro, mo nun stessemo a cuntà d’ ‘a vittoria napulitana!
Grava 6,5 : ‘O surdatiello casertano (trentare anne!) pure ajere nun sbagliaje niente e purtaje cu tanto onore ‘a fascia ‘e capitano lassatele ‘a Culo ‘e chiummo Cannavaro. Nun ce vuleva proprio chell'ammonizzione!
Campagnaro 7: Mazzarri ‘o piazzaje ô posto ‘e Maggio e Hugo nun sbagliaje niente, ‘nchiudenno ‘e spazzie ‘ndifesa e prupunennose continuamente annante. Del resto Hugo è ‘nu signore jucatore e po’ ghiucà a qualunche posto e si mancasse ‘o purtiere putesse dicere: “Dàteme ‘nu paro ‘e guante e ‘e ginocchiere, ca m’ ‘o veco io!” E so’ ccerto ca facesse ‘na granna partita!
Gargano 6 +: Non perdette maje ‘a palla e lanciaje spisso ‘e cumpagne cu verticalizzazzioni ‘nteliggente;però cierti vvote sbagliaje troppe passagge semplice cercanno jucate cumplicate.
Pazienza 6,5: Utile comme a ssempe, se n’ascette sgummato ‘e sanco mazzuliato a duvere da chelli ccarogne d’ ‘e jucature barese; pare però che nun avesse ‘a essere niente ‘e grave. ‘Ncopp’ ô golle d’ Almiròn, forse pecché struppiato e sturdito se facette superà troppo facilmente; ma nun se po’ cantà e purtà ‘a croce!
Zuniga 5,5: Mazzarri si fida assaje ‘e ‘stu guaglione ‘e culore tanto ‘a dumannarle ‘e metterse ancòra a sinistra,spustanno Campagnaro a destra. Isso accettaje senza prubbleme, confermanno però ca benché sta chiaramente migliuranno ‘o lato ‘e sinistra . nun è ‘a zzona soja! ‘O veco ‘e cchiú a ddestra!
Hamsik 6: Durante ô primmo tempo sfioraje ‘o golle,anze s’ ‘o magnaje; po nun se vedette cchiú ‘e tanto, ma quanno ‘e rippe o ‘e rappe facette quaccosa dimustraje ca ‘o juoco sujo è uno d’ ‘e meglie d’ ‘a serie A!
Lavezzi 9: l’ aròje (eroe) d’’a jurnata. ‘O Pocho purtaje pe mmano ‘o Napule a vencere a Bari lassanno aperta ‘a speranza Champions.’O scugnizzo argentino, sibbene arresurvesse(decidesse) ‘e accummincià a ghiucà sulo doppo ô primmo quarto d’ora,fuje decisivo comme nun maje ‘nventannose ‘o vantaggio e radduppianno cu freddezza.Jucaje assaje bbuono pe tutt’ ‘o siconno tempo e pe tre quarte d’ ‘o primmo!
Denis 6 ‘e stima: S’ applicaje ‘mpignannose come a ssempe, fuje utile ô juoco d’ ‘e cumpagne, ma fuje poco o niente servuto e nun ‘mpressiunaje sotto porta.
Bogliacino e Dossena s.v. Trasettero tarde e facettero poco e nniente!
Mazzarri 6,5 L’allenatore d’’o Napoli andivinaje quase tutto (i’ avesse cagnato aGargano e nno a Denis) priparanno benissimo ‘a partita tatticamente, faticanno soprattutto ‘ncopp’ a Lavezzi,sprunannolo sempe a ajutà a Zuniga ‘ncopp’â fascia, senza scurdarse ‘e fa l’attaccante! ‘Nzomma fuje merito ‘e Mazzarri si ‘o Napule partette subbeto forte chiarenno subbeto l’intenzione qual’erano; merito ‘e Mazzarri si ‘o pressingo auto e ‘a secantezza (l’aggressività) d’ ‘e napulitane ‘nzerrajeno subbeto ‘o Bari dinto a ll’area propria.
l’arbitro Bergonzi 4,5 porta bbuono, ma i’ nun ‘o vulesse cchiú; nun è scartellato, ma è ‘na meza cazetta comme ô riesto ‘e tutte ll’arbitre italiane e se porta ancòra appriesso ‘o pisemo d’ ‘e critiche ca avette p’’e duje rigure date ô Napule (staggione 2007/2008) contro ‘a juventús; ‘a tanno, quanno arbitra ‘o Napule, pe fa vedé ca nun stà abbaccato cu ‘e napulitane sisca sempe contro e ‘nzerra tutte ‘e dduje ll’uocchie cunzentenno(senza piglià pruvvedimente) all’avversarie d’ ‘o Napule (comme succedette ajere,ca primma ‘e tirà fora ‘nu cartellino giallo ‘nfaccia a ‘nu barese arrivaje â fine d’ ‘a partita…) ‘nu juoco viulento e carugnesco (Belmonte, Bonucci etc. ), favezo e ammagagnato (Alvarez, Castillo etc.). Purtroppo tutte ll’arbitre italiane so’ meze-cazette e ce avimmo ‘a accuntentà; allimmeno porta bbuono!
D'Agostini e Lanciani segnalinee Doveri comme 4° ommo: 4 ‘e ttre scignetelle: nun veco, nun sento, nun parlo.
E cu chesto ve saluto. Â prossima.
Nota linguistica
Primma ca quaccheduno piglianno ‘nu zzarro me dicesse ca songo ‘nu ciuccio, chiarisco ‘na cosa ‘mpurtante.
QUALE E QUAL IN ITALIANO ED IN NAPOLETANO.
Sia la lingua italiana che la parlata napoletana ànno con medesima derivazione dal lat. quale(m) l’aggettivo e pronome interrogativo e relativo quale; in italiano il pl.è quali, ant. o poet. davanti a consonante quai e qua'; si à poi, sempre in italiano, una forma tronca qual che è comune davanti alle voci del verbo essere che cominciano con e- (qual è, qual ero ecc.) e, davanti a consonante, in talune locuzioni particolari (qual fosse; per la qual cosa; nel qual caso; in certo qual modo; qual mai) o nell'uso letterario] si usa (e cosí anche in napoletano) nelle proposizioni interrogative dirette o indirette e nelle dubitative per chiedere la qualità, l'identità di qualcosa o di qualcuno (è forma concorrente con che, ma quast'ultimo è di gran lunga prevalente nell'uso parlato): quali libri preferisci?; quale motivo l'avrà indotto a far ciò?; quali novità ci sono?; con quali amici ài cenato?; a quale medico ti sei rivolto?; quale dimensione deve avere?; a quale velocità andavate?; a quale ora è accaduto il fatto?; in quale anno è nato?; dimmi quali libri ti piacciono; non so quale decisione prendere; chissà per quale motivo non si è fatto piú vedere; voglio sapere quali persone ài invitato | non so quale, un certo (con valore indeterminato): mi prese una non so quale nostalgia; sentii non so quale desiderio di andarmene; tornando alla forma tronca qual che - come ò detto - è comune davanti alle voci del verbo essere che cominciano con e- (qual è, qual ero ecc.) e, davanti a consonante, in talune locuzioni particolari, rammenterò che in napoletano non esiste questa forma tronca, ma sempre quella intera che viene elisa davanti a vocale; per cui in napoletano si à qual’ è e non qual è né si avrà mai qual fosse ma sempre quale fosse.

Raffaele Bracale