CHIEVO – NAPOLI 02.02.11 2 A 0 LL’AGGIU VISTA ACCUSSÍ

CHIEVO – NAPOLI 02.02.11 2 A 0
LL’AGGIU VISTA ACCUSSÍ

Guagliú tengo ‘o vveleno ‘mpont’ô musso e sto’ ‘ncazzato niro doppo d’ ‘a partita d’ajere ssera soprattutto pecché tengo ll’impressione ‘e parlà ô viento: è dê tiempe ‘e Reja ca vaco dicenno ca chella jettatoria divisa blu-savoia porta ‘na jella futtuta e nnisciuno me sta a ssèntere. Sperammo ca mo ll’ànno capita e nun ce ‘a fanno mettere cchiú chella divisa zezzosa!... Ditto chesto venimmo a nnuje e dicimmo ca ‘na vota o n’ata êva capità ‘na serata storta... Peccato ca è capitata ajere proprio cu ‘o Chievo ca doppo d’ ‘a juventussa è ‘a squatra ca cchiú mme sta ‘ncopp’ê pparte cchiú delicate. Certo,doppo tante ppartite jucate a mmeraviglia po’ succedere ‘e piglià ‘nu sciuliamazzo..., ma chillo d’ajere è stato ‘na cosa ‘a romperse ll’uosso sacro! ‘Na squatra ca nun se puteva guardà; tutte bucciate, accummincianno ‘a chille ca ànnu fatto ‘na partita’e scenufreggio (disastrosa): Aronica, Cannavaro e Gargano, tutta ggente spisso spisso sopravvalutata. So’ tutte culpevole ‘e ll’uccasione perza, ma chillo ca tène cchiú colpe è ‘o misterro: n’êsse ‘ngarrata una:
assetto tattico senza fantasia , maje ‘nu cagno apprupriato a siconna d’ ‘a cundizzione atletica ca si manca perdimmo ‘o 50 pe cciento d’ ‘a forza nosta...
Se sapeva ca ‘o Chievo è ‘na squatra ca comme a ll’andata ce avesse miso ‘ndifficultà...; se sapeva e se puteva ‘nciarmà coccosa presempio facenno arrepusà a Cannavaro, Aronica e Gargano e mettenno Cribari, e Ruizzo ‘ndifesa e Maiello a centrocampo visto ca Yebdà s’è ammaccato..., a pparte po ca ‘o Napule ajere perdette quarantacinche minute cu Zuniga trequartista ca aveva jucato quatto o cinche vote e ssempe cu risultate fantanguse (pessimi); Mazzarri nun riuscette maje a cagnà tatticamente ‘a partita ‘ncorza! Ciuccio e presuntuoso ‘nconferenza stampa ‘mmece ‘e fà mea culpa e sbatterse ‘mpietto dicenno ca ce avimmo scurcià ‘e mmaneche,à tirato ‘mballo ‘e ssolite scuse fésse tipo..troppi partite, panca nun all’ardezza..etc..quanno ‘a panchina corta l'à vuluta isso!A chistu punto forze nun fósse apprupriato fà ‘e ppaggelle, ma nun voglio perdere ll’abbitudine:
DE SANCTIS 5,5 Guardaje meravigliato, senza moverse e senza fà ‘nu tentativo mentre ‘a pallone tirato ‘a Moscardelli accarezzaje ‘o palo e se ‘nfilaje ‘mporta p’ ‘o primmo gollo. Pure ‘ncopp’ ô doje a zzero se limitaje a allargà ‘e bbraccia comme a ddicere: Ma che ce pozzo fà?
CAMPAGNARO 6 ‘Nu paro ‘e chiusure bbelle. A ‘nu certo punto fuje custretto a piglià ‘ncunzegna a Pellissierro ca steva mannanno ô manicomio a culo’echiummo. Ô finale pruvaje a lanzarse annante, ma cu ppocu custrutto. CANNAVARO 3,5 Suffrette ‘a ntrellecità (vivacità) ‘e Moscardelli e e de Pellissierro. Tene ‘ncopp’â cuscienza ‘e duje golle: ‘o primmo pecché marcaje (pe ddicere!) ‘a luntano, (senza farlo sentí ‘o sciato ‘ncuollo e ‘e zzanne dint’ê feliette) a Moscardelli e rummanette a guardarlo comme ô pastore d’ ‘a meraviglia; ‘o siconno pecché se facette ‘nfilà ‘ntromba ‘a Surdo a ccentro aria senza neppure tentà ‘e cuntrastarlo cu ‘na ciancata ô lemmeto ‘e ll’aria!
ARONICA 4,5 Scamuso (ruvido) e ‘mpriciso sbagliaje ‘a partita.
MAGGIO 5,5 Ajere ‘e smestute soje se cuntajeno ‘ncopp’ê ddete ‘e ‘na mana. ‘O vattettero spisso però.
GARGANO 4,5 Giraje a vvacante nfino a quanno Mazzarri se decidette a ffarlo turnà ‘mpanca.
SOSA 6- Dette ‘nu poco ‘e ‘ntrellecità ô Napoli, ma trasette tarde e a frettata fatta!
PAZIENZA 6- Nun fósse ato luttaje nfino â fine...
DOSSENA 5 Partette a ccapa sotta e parette ca vulesse distruggere ‘o munno; ma fuje fuoco ‘e paglia e cumminfatte po Sardo ‘o maciullaje ‘ncopp’â fascia soja
HAMSIK 5 Serata no ‘e Marekiaro! Nun ne azzeccaje una: smignato (abulico) e senza idee.
DUMITRU s.v.
ZUNIGA 4,5 Nun è trecquartista o attaccante e se vedette. Fuje ‘na jastemma a tenerlo ‘ncampo pe tutto ‘o primmo tempo!
LUCARELLI 5 ‘O cercajeno sulo cu lanci luonghe ‘a luntano, ma ne ricavaje sulamente ‘nu paro ‘e sponne; chi ‘o ssa’ si Mazzarri ll’êsse miso dô primmo minuto, cagnava coccosa!
CAVANI 5 ‘O zengariello nuosto ajere (orfano ‘e Lavezzi) steva carrecato a vvrenna: ddoje uccasione, ma nisciuno gollo. Pure ‘e meglio ponno avé ‘na giornata storta!

ALL. MAZZARRI 4 E aggiu ggià spiecato ‘o ppecché:senza Lavezzi ‘o Napule suojo se squagliaje sott’ ê bbòtte ‘e ll’avverzarie!

Arbitro ORSATO 5 Carta cunusciuta cuncedette ê verunese ‘e vattere sistematicamente ê napulitane senza mettere lengua.
P’‘o riesto direzzione senza troppi prubbleme.
‘Ncuncrusione ‘a mola ce ll’âmmo tirata e stammo ancóra ‘e casa ê piane avete visto ca ‘a cuncurrenza nun è gghiuta assaje meglio ‘e nuje.
Bbona salute. Ce sentimmo!
Raffaele Bracale Brak