S’È AIZATO ‘O VIENTO

S’È AIZATO ‘O VIENTO
I
E bbello e bbuono s’è aizato ‘o viento
e sta sfrunnanno a una a una ‘e ppiante;
nun ne salva nisciuna e spanfïante
se sta carrianno ‘e ffronne, e dinto a nniente

mo s’ ‘e pporta luntano senza abbiento...
scuonceco e ‘nzisto pejo ‘e ‘nu trabbante!
Chi sa’ addó s’ ‘e pporta a ttutte quante
chi sa’ addó ‘e ccarreja ‘o malamente!

E che nne puó sapé? ‘Un farte cunte
ca nun se po’ appurà nè trasí dinto:...
è ‘nu mistero chisto e fance punto

ca nun ‘o puó scavà.... fatte cunvinto...
e nun te rizzelarte de chest’ onta
e chiéjate a llibbretta chist’affronto!

II
Comme i’ aggiu fatto, o’ fra’ comme i’ aggiu fatto
quanno ‘nu juorno overamente bbrutto
sciusciaje pe mme ‘nu viento ca distrutto
m’arriducette ‘ntrunco all’intrasatta....

Proprio accussí, lla lla ‘ntrafinefatta
‘o viento ca sciusciaje arronzatutto
‘a vita me cagnaje... spuorco frabbutto
lassannome pe mmare senza zzatta!...

Me ce ‘ncazzaje ô pprincipio, ma po avette
‘a grazzia de penzà: Si è scritto, è scritto
.e nun c’è nniente ‘a fà... È ‘na disdetta

ma te ce hê ‘a rassignà! Ammoccia e zzitto!
Contro ô viento d’ ‘a vita nun c’è llotta
semp’ isso ‘a vence e t’arriduce arlotto!
R. Bracale

(Proprietà riservata)