CHIEVO – NAPOLI 21.09.11 (1 A 0)LL’AGGIU VISTA ACCUSSÍ

CHIEVO – NAPOLI 21.09.11 (1 A 0)
LL’AGGIU VISTA ACCUSSÍ
Ca ‘a partita contro ô Chievo, fósse ‘na jastemma menata... guagliú se sapeva , ma ‘a mazzata ca pigliajemo ajere ssera a Vverona, pe mme ‘a tène tutta ‘ncopp’â cuscienza Mazzarri. È ttutta colpa soja si ajere ssera pusajemo ‘e soliti tre ppunte a ‘na squatrella ca ggià ll’anno passato tra annata e ritorno se nn’era pigliate seje!Ora mo dich’ i’, tu ‘o ssaje ca contro ô Chievo ce à cacato ‘o cane niro, vuó vedé ‘e t’organizzà?! E chillo che ffa? ‘Mmece ‘e mannà ‘ncampo ‘e pprimme linie tirate a llucido, manna ‘ncampo ‘e siconne o ‘e tterze, facenno ‘nu turnovèr(ro) esaggerato e pe ggiustificarlo, cu ‘na faccia tosta ca tène sul’isso...,parlaje ‘e jucature andrajuse (logorati),doppo sulo tre gghiurnate manco si fossero fatte ‘e ricotta o ‘e besciamella!...Overamente songo assaje amariggiato: n’allenatore e ‘na squatra vincente nun fanno ‘e fessarie fatte ajere ssera a Vverona.. E ‘arraggia mia è ancòra cchiù fforte ô penziero ca ajere ssera âmmo perduto ‘na ‘mpurtante accasione ‘e tènere ‘o passo d’ ‘a rubbentus(sa) fermata dô Bbologna e fforze supravanzarla si Mazzarri nun avesse fatto chella penzata soja e avesse fatto jucà dô primmo minuto ‘e pprimme linie P’ ‘o mumento pirciò mettimmoce l'anema ‘mpace e nfino a quanno ‘o Napule nun cagna mentalità, nun parlammo ‘e scutette o ccoppe! Turnammo a ajere ssera e dicimmo pure ca forze po’ essere ca ‘o turnovèr(ro) fósse nicessario, visto ca sàpato nc'è ‘a Fiorentina, martedí ‘o Villareal ‘nCiampionsa e ppo n’ata vota ‘e sàpato ll'Inter(ra) ca à cagnato allenatore! Dicimmo ca èra justo fà arrepusà quaccuno cu ‘o Chievo; però era proprio necessario cagnarne sette ‘ncopp’ a unnece proprio cu ‘na squatra ca ce porta male? Nun fósse stato meglio farne arrepusà quaccuno ajere ssera e quacche ato contro â Fiorentina?’Ndifesa,tenenno presente ca ‘e Campagnaro nun se ne po’ ffà a mmeno, pe ffà n’assempio, i’ avesse miso messo sulo uno tra Fernandez(zo) e Fiedeleff(o), e ppo contro â Fiorentina êsse fatto ‘o ccuntrario: tutte e dduje ‘nzieme fuje ‘nu riéseco (un azzardo).Pe nun dicere d’ ‘o centrocampo addó nun se po’ ffà a mmeno d’ Inler(ro) Stesso discorzo pe ll’attacco,addó Santana o Mascara nun ponno stà ô posto d’ ‘o Pocho.Comme pure, n’atu Cavani nun ce sta e nun ‘o tenimmo... ‘nzomma, turnovèr(ro) e va bbuono, sí, ma Mazzarri esaggeraje. Cu tre o quatte titulare ‘e cchiú êssemo asfardato ‘o Chievo, e distrutto ‘o mito smaleditto d’ ‘o Bentegodi. Ma oramaje è gghiuta accussí e dàmmoce ‘nu pizzo ‘ncopp’â panza!
Passammo ê ppaggelle:
DE SANCTIS 6 – Miezu voto mancante pecché me rummanette ‘a duvíta (il dubbio) ch’êsse pututo chiammà ‘a palla appena primma ca Fideleff(o) facesse ‘a puttanata ca ce custaje ‘a partita, ma nun me sento ‘e criticarlo assaje pe bbia ca dinto a n’ata accasione facette ‘na granna parata ‘ncopp’ô frenetico (sull'indiavolato) Moscardelli.
FIDELEFF 4,5 – Che peccato!Nfi’ ô disgrazziato mumento ‘e chella puttanata retissanta (errore clamoroso) ca ce custaje ‘a partita, ‘o ggiuvinotto aveva jucato bbuono, mustranno forza, decisione, perzonalità e sicurezza.E ffuje proprio forze p’ ‘a troppa sicurezza ca mancaje chillu applazzamiento (rinvio) ca me ce vo’ tiempo pe perdunarlo...
ARONICA 6-. – ‘O planteamiento (l'impostazione) nun è mmestiere suĵo e se sape,ma ‘ndifesa se facette valé quanno fuje chiammato ‘ncausa.
FERNANDEZ 5,5. – ‘O guaglione argentino partette bbuono, po s’emuzzionaje perdènnose dint’a ‘na frundiéra (nel pantano) ‘e marrune (errori), affanno e carrettiglia (rincorsa) ‘e ll’avverzarie.
MAGGIO 6-. N’affaticamento muscolare ‘o mettette fora causa ô mumento ‘mpurtante d’ ‘a partita.
Appressuraje (spinse) sí, ma nun purtaje frutto. (dô 58° INLER 5. - Trasette ‘ncampo assaje nervuso, ‘ngarraje sulo ‘nu lanzo sbaglianno ‘nu tummolo ‘e passagge (pure facile) e arresecaje n’apòstraca retissanta(un’espulsione clamorosa).
DZEMAILI 5. – Nfi’ a mmo aveva sempe jucato meglio trasenno ‘nsostituzzione ‘e quaccuno. Ajere ‘mmece partenno dô pprincipio nun truvaje ‘o passo, sbagliaje assaje fernenno fora ’e ruolo addó nun servette nè ppe frijere, nè pp’arrostere.
GARGANO 6-. – Assaje bbuono ô primmo tempo, po venette cunziderevolmente meno dint’ê mmecce ô siconno tempo, ‘nzieme ô riesto d’ ‘a squatra.
ZUNIGA 6,5 – ‘Nu tiro sballato è prubbabbilmente ll'unico marrone ‘e ‘na bbona partita.Chist’anno uno verzatile comme a isso serve overamente â squatra.
MASCARA 4,5 – ‘Mpalpabile,’nzieme ê cumpagne ‘e sezziona, ajere ssera êsse pututo partecipà a “Chi l'à visto?” Unica nota, dicimmo pusitiva (ma p’essere ‘e maneca larga) ‘na bbotta ‘e capa/èchina (colpo di testa/schiena) ca survulaje ‘e poco ‘a mandriglia (la traversa).
(dô 71°HAMSIK s.v.Nun facette nummero!)
SANTANA 5. – Poca rrobba e ssulo ô primmo tempo: è fora cundizzione e se vedette!
(dô 58°CAVANI 5,5 Ce pruvaje, ma ‘o Chievo nchiuso a catenaccio nun le dètte ‘a pussibbilità ‘e fà niente!Fósse stato presentedô pprincipio puteva essere tutta n’ata musica!)
PANDEV 4,5. - Cundizzione fisica scadente assaje, a ccurto d’idee e ‘nu cuntrollo ‘e palla ê vvote addirittura arritante. Mazzarri ‘o facette rummané ‘ncampo pe ttutt’ ‘a partita, ma isso aizaje sulo póvera!

MAZZARRI 4,5 – ‘O ssaccio ca è ffacile parlà doppo, ma s’à dda ricunoscere ca ll’esperimento fatto ‘a Mazzarri (e ca comunque isso (ch’è ‘na capa tosta) vo’ ripetere) fallette senza misericordia.Ggià aggiu spiecato ‘o ppecché e nun me voglio ripeterme si non pe ddicere ca ‘o turnovèr(ro) fuje troppo esaggerato: se facette a mmeno ‘e jucature ‘mpurtante e se mannaje ‘ncampo jucature fora ‘e cundizziona, e ssenza ggenio! Serata ‘a scurdarsene ampressa ampressa ggià ‘a sàpato ca vène cu ‘a Fiorentina!
l’arbitro DAMATO 4,5
Vecchia carta canusciuta st’avvocato ‘e Barletta(e comme a ppugliese quase certamente tifoso juventino) è ‘nu chiafeo, fúceto e sciacqualattuca(incapace) e ati vvote addirittura vennuto!Turnato a diriggere ‘o Napule doppo paricchiu tiempe dê ‘nguacchie fatte precedentemente ‘ndanno d’ ‘o Napule, tentaje ‘e tutto pe dà fastidio ê cuane mettennose pe ‘mmiez’ê piere d’ ‘e napulitane custrette a scartà primma a isso e ppo ê verunese e nun vedenno ‘o juoco viulento e pruvucatorio d’ ‘e delinquente cu ‘a maglia jalizza; nun vulette vedé ‘a falta in area ‘ncuollo a Mascara e nun ce dètte ‘o ricore ch’âsse pututo cagnà ‘a partita. ‘O fatt’è ca si mmece ‘e Damato ce fósse stato n’ato, era ‘o stesso: ‘o Napule sta ‘ncopp’ê scatole d’ ‘o Palazzo e ll’arbitre taliane so’ tutte ‘na fetenzia e addó vaje vaje, scarte fruscio e ppiglie primera.
Cu ‘na bbona salute! Ce sentimmo â prossima vota.
R.Bracale Brak