MANCHESTER CITY – NAPOLI 14.09.11 (1 A 1) LL’AGGIU VISTA ACCUSSÍ

MANCHESTER CITY – NAPOLI 14.09.11 (1 A 1)
LL’AGGIU VISTA ACCUSSÍ

Bellissima primma asciuta ‘nCiampionsa p’ ‘o Napule ‘e Mazzarri ca ajere a nnotte pariggiaje pe 1-1 ‘ncopp’ô campo d’ ‘a squatra d’ ‘e sceicche.Ora mo guagliú v’aggi’ ‘a dicere ca si ajere, ddoje ore primma d’ ‘a partita, quaccuno m’êsse addimannato: “Te sta bbuono ‘nu pareggio?”ll’êsse risposto: “Damme foglio e ppenna ca firmo súbbeto!” Ma po ajere a nnotte, quanno chella panza ‘e vierme ‘e ll’arbitro svedese siscaje ‘a fine..., accumminciaje a magnarme ‘e mmane e ancòra m’ ‘e sto’ rusecanno pecché ‘o Napule avesse mmeretato ‘e véncere e nun s’êsse arrubbato niente... chi ‘mmece s’è arrubbato coccosa è ‘a squatra ‘ngrese ‘e Mancini ca vincette sí ‘o cunto ‘e pale e travesagne (traverse) pe tre a ddoje, ma vincette pure ‘o cunto ‘e tutte ‘e ppunizzione arrubbate, chelle ca ‘o svedese siscanno a senzo unico contr’ô Napule lle rijalaje, cumpresa chella inesistente ca ‘nu jucatore ‘ngrese, cartianno a ll’arbitro, s’era abbuscata menannose ‘nterra a ppe isso ô lemmeto ‘e l’area napulitana e ca Kolarov(vo) menaje dinto pariggianno ‘a redda ‘e Cavani ca dint’â ripresa aveva purtato ‘nvantaggio ‘e guagliune cúane (azzurri)! Peccato, peccato! È overo ca ‘o Napule all’inizzio suffrette ‘nu poco soprattutto pe ll’emozzione, ma po passanno ‘e minute pigliaje ‘e mmesure d’ ‘o Mancesterro accuntentanno a Mazzarri ca vulette ‘na risposta soprattutto mentale. E accussí fuje ca ‘e cuane dimustrajeno d’essere crisciute, e ca pe lloro (e ppe nnuje) è arrivato ‘o mumento ‘e recogliere ‘e frutte ‘e tanta fatica! A chistu punto si sento a uno ca parla male ‘e ‘stu Napule cca, ve ggiuro ca a auta voce e senza cercà scusa nn’ ‘o manno a ffà cchiú dinto ‘e dinto ‘e do’ sape isso, pecché chisto è ‘nu granne Napule e ajere a nnotte êssemo vinciuto ê punte, ma purtroppo contano ‘e rredde e allora tenimmoce ‘a posta e accuntentammoce ‘e ‘stu pareggio ca ‘o Napule se guadagnaje accurdanno assaje poco a ‘na squatra ca ‘ncopp’â carta ce nn’avesse avuto ‘a fà pure diece!...’A verità è ca si ‘o Napule joca comme sape jucà senza emuzzione o paura è capace ‘e fà prestazzione cratiste e se vedette appunto ajere a nnotte quanno fuje ‘o Napule ca verzo â fine d’ ‘o siconno tempo cummannaje ‘o juoco e i’ accarezzaje ll’idea ca ‘e guagliune nuoste fossero turnate a Nnapule cu ‘e tre ppunte dint’â sacca...Nun succedette ‘nu poco pe ll’arbitraggio cuntrario ‘e chella panza ‘e vierme d’ ‘o svedese ca siconno me nn’ è bbuono manco p’appiccià ‘o ffuoco dint’ô fuculare..., ‘nu poco pecché Erode Mazzarri ‘e ffà magnà poco e a Marekiaro mancajeno ‘e fforze pe tirà cchiú fforte e se facette fermà ‘o tiro ‘ncopp’â linia d’’a porta.Mettimmoce pure ca ll'asciuta ‘e Lavezzi cundizionaje l'attacco luvardo ...ma ‘o Napule a chistu punto tène overamente tutte ‘e ccarte a ssunna (in regola) pe passà ‘o turno.
Passanno ê ppaggelle i’ mettesse 7 a tutte quante, ma è gghiusto essere cchiú circustanziate e dà a Ccesare chello ch’è d’ ‘o ssuĵo.
DE SANCTIS 6-. – Dette ‘a solita sicurezza cu dduje ‘ntervente ‘mpurtante, ma nun me piacette proprio ‘ncopp’â punizzione ‘e Kolarov(vo): ‘a battezzaje fora e cquanno po s’accurgette ca ‘o pallone traseva, ‘mmece ‘e tentà ‘a parata nun se muvette proprio e anze dètte ‘a ‘mpressione ‘e levarse ‘o cappiello (ca nun teneva) pe ffà ‘na riverenza e dicere ô pallone: “Preco, accomodatevi!”.

CAMPAGNARO 8. – Monumentale!Miezu voto ‘e cchiú pecché dint’ê primme difficultuse minute iniziale fuje isso ca mantenette a zzuffrasa (a galla) ‘a difesa luvarda cu ‘na sicuranza ‘mmidiabbile(sicurezza invidiabile) .

CANNAVARO 6-. – ‘O miraculo, ‘o miraculo! Nun facette nisciuna puttanata grossa; ô ssolito quacche sfregazzo (sbavatura) dinto a ll’anticipe e ‘nu cartellino jalizzo (giallo) ca se puteva evità; meglio dint’ â ripresa quanno ‘e ‘ngrese nun riuscettero a sfunnà p’ ‘e vvie centrale. Êtte ‘a furtuna ca ajere notte Dzeko l'attaccante ‘e Mancini, ‘nu bbruttu accunto(cliente) putente,lesto (agile) e pure tassuso (veloce) pur’essenno ‘nu stipo a mmuro..., nun stette e ggenio e facette acqua dâ pippa!
ARONICA 5,5 – ‘O primmo tempo suĵo fuje ‘nu vero cuscemarro (un autentico incubo); nun vedette nè ‘a palla nè a ll’avverzarie,s’abbuscaje ‘nu cartellino jalizzo (giallo) e se scanzaje pe ppoco ô siconno! Meglio dint’â ripresa.

MAGGIO 6,5 – Nun le riuscette ‘e farse vedé ‘nfase ‘e puzamiento ( spinta) ma se sacrificaje ‘ndifesa. Cratista ll’aiúda (ottimo l'assist) pe Ccavani.


GARGANO 6+. – Ô ssolito, pure ‘a vicino, smarrunaje cu ‘e passagge, ma facette ‘na pressiona cuntinuata e ‘a levà ‘o sciato (un pressing continuo ed asfissiante). ‘A sensazzione è ca ‘ncoppia cu Inler(ro) po’ ffà paricchia strata.

INLER 6,5 – Stranamente emuzzionato ô primmo tempo nun fuje isso,ma po chianu chianu venette fora; avette ‘a luttà ‘ncopp’ a ttroppi pallune senza avé sempe ‘a pussibilità ‘e ‘mpustà ll'azione.Nun ve dico che briga raivosa (lotta furiosa) cu Yaya Tourè, ca fuje n’accunto (cliente) tuosto, maligno e refecagliuso. ‘O turco napulitano però dint’ô momento ‘e difficoltà pigliaje pe mmano ‘a squatra e ll’accumpagnaje addó sapeva a isso.

ZUNIGA 7 - Ll’anno passato a mmancina era ‘na jastemma menata..., pirciò s’ammereta miezu voto ‘e cchiú pecché ‘a tanno è assaje migliurato cu ‘o père nun suĵo e ricuprenno ‘nu ruolo ca ll’è stranio, pure si à dda migliurà a ffà ‘e cruzze (cross).Tampaje bbuono (coprí bene) e appena putette dètte ‘na mana â manovra uffenziva.
‘Nzomma n’esibbizzione cunvincente!

HAMSIK 7 – Poco lustro (poco lucido) dinto a ccierti mumente, ma ‘o guaglione ce stette e se fósse ammeretato ‘e signà: peccato ca tiraje senza forza (visto ca Mazzarri ‘e ttene a stecchetto e ‘e ffa magnà poco o niente) e comm’infatte ascette escuttado (stremato) dô campo,avenno curruto overo assaje e ... forze... cu ‘a panza vacante! Ajutaje ‘a squatra dinto ‘a dúplicia fase ‘e juoco (doppia fase di gioco).
(da ll'89°' SANTANA sv).

LAVEZZI 6,5 – ‘Nu travesagno retentissanto (una traversa clamorosa), n'ingenuità ‘a pigliarlo a ppacchere ‘ncopp’ a ‘nu canto (su un angolo) tirato pe Inler(ro) e ppo tantu muvimento. Croce e delizzia pe nnujaute napulitane. ‘A sensazzione è ca dalle e ddalle (alla lunga) ‘a velocità ssoja avesse pututo fà assaje male ô Mancester(ro)...’mmece avette ‘a ascí pe n’accidente (per infortunio) ca sperammo nun fósse accussí serio ‘a nun farlo partecipà ‘a sfita assaje ‘mpurtante ‘e dummeneca a ssera ô san Paolo contro ô Milan(no). Strigne ‘e diente Pocho!
(dô 57°' DZEMAILI 6,5 – Trasette, se piazzaje ‘mmerz’ê linee crianno cchiú ‘e ‘nu prubblema ê ‘ngrese e riuscenno a raccurdà ‘e reparte nfino a cchillu mumento sciuóvete).

CAVANI 7,5 - Non fuje ancòra overamente isso, anze. E se vedette. Sbagliaje tanto, una cuncrusione troppo egoista ô primmo tempo, ma pure tanta, tanta fatica; quanno però putette piazzaje ‘na pessata (zampata) d’ ‘a soja, ‘o ffacette a uocchie ‘nchiuse e custrignette ‘o Mancester(ro) a correrce arreto.
(da ll'83°' PANDEV 6 – Trasette subbeto ‘mpartita; avette pure ‘na bbona accasione, ma nun ‘a sfruttaje a mmestiere).

All. MAZZARRI 7 – Ll’emuzzione d’ ‘a primma asciuta e ‘o ppoco ‘e suggezzione annante a una d’ ‘e squatre cchiú fforte d’ ‘o munno putevano custarce caro, ‘mmece Erode Mazzarri riuscette a ffarse dà ‘na granna risposta dâ squatra soja ca luttaje senza paura dô primmo a ll'ultimo minuto. Forze puteva mettere a Pandev(vo) ‘nu poco primma vista ‘a stracquezza ‘e ll’attaccante cuane(degli attaccanti azzurri).Ma nun ghiammo a ccercà ‘o pilo dint’ a ll’uovo!
ll’Arbitro ERICKSON 4 E ll’aggiu trattato a ‘sta panza ‘e vierme svedese ca siscaje pe partito pigliato a senzo unico contr’ô Napule facennose cartià dê ‘ngrese ‘e Mancini e arbitranno - ‘ncap’ a isso - a ll’ingrese cuncedenno zoé a cchilli chiú gruosse, turzute e ‘nsaluta ‘e mazzulià, senza pavarne niente, ‘ê cchiú piccerille sicche e peliente!
E fermammoce cca dannoce appuntamente a dummeneca a ssera p’ ‘a sfita cu ‘o Milan(no) ca s’ à dda vencere assulutamente, sempe tenenno d’uocchio ‘a rubbentus(sa) e speranno ca pigliasse ‘nu granne sciuliamazzo nun mm’arricordo cu chi .
Staveti bbe’ e ssempe Forza Napoli, Ciuccio fa’ tu!
R.Bracale Brak