NAPOLI – FIORENTINA (24/09/11) 0 A 0LL’AGGIU VISTA ACCUSSÍ

NAPOLI – FIORENTINA (24/09/11) 0 A 0
LL’AGGIU VISTA ACCUSSÍ
È ffernuta comme è ffernuta guagliú, cu ‘nu scunzulato zzero e zzero e mme pare justo ripetere chello ca me diceva ‘o nonno quanno fravecavo ‘ncopp’ârena currenno cu ‘a fantasia appriesso a puntaríe (mete) ‘e suonno: “Guagliò, ‘o ffruscià fa bbene â salute!..",ciovè: si vuó pazzià cu ‘a fantasia, fa’ pure..., forze te siente meglio, ma... ‘a rialtà è ato, ricordatello!” Cumminfatte doppo ca ‘o Napule êva dato tre bbelli purpette ô Milan(no) c’èramo fatte tutte quante ‘o stesso suonno addirittura currenno appriesso a cchella fantasia ‘e chiullo coso a ttre culure vinciuto pe ddoje vote vinte e cchiú anni fa... Turnammo cu ‘e piede ‘nterra guagliú e rennimmoce cunto ‘e qual’è ‘a vera natura ‘e chistu Napule! Rennimmoce cunto ca – p’ ‘o mumento - ‘e ccose bbone ca fa ‘o Napule so’ ‘sempe fatte pruvvisorie, maje pretre ‘e valore ‘ncastunate dinto a ‘nu pruggetto serio e urdinato ca tène cuorpo pecché prugrammato...cu ‘a sacca e ‘o tavulino!Chisto è ‘o Napule, chesta è Nnapule...e pe nnuje vale sempe ‘o discorzo ca se campa a gghiurnate, senza ‘nu pruggetto finalizzato:"Dimane penzo ê diebbete, stasera so' ‘nu rre..."; rummanimmo pirciò cu ‘e piede ‘nterra e penzammo ca doppo ddoje vittorie cu Cesena e Milan(no),e doppo d’ ‘a scoppola pigliata cu ‘o Chievo a Vverona,cu ‘o Napule ancòra anarrúmeno (convalescente), êva succedere ca ascesse ll’icchese, meglio ‘o zzero a zzero ‘ncopp’â rota ‘e Napule soprattutto tenenno presente ca ‘ncopp’â tribbuna, vicino o DeLa nce stevano ll’uocchie stuorte ‘e chillu cestariello d’ ‘o sinnaco (ca pavasse ‘e sacca mia pe farlo stà â casa soja...) e tenenno presente ca cu mmico a vederse ‘a partita ‘nzieme a ll’amico Federico nce steva pure chill’ato amico jettatore tifoso d’ ‘a rubbentussa, tanto ca i’ penzaje: Speriamo bbene!... Nisciuno fantango (nessuna catastrofe)però ; è ccosa ‘e niente: cu ttutto ca quaccuno se sunnava ‘o tramme elettrico (si illudeva), ‘e certo nun stammo ‘nlotta p’ ‘o saciccio a ttre culure(comme vulesse a ggiugno puté ddicere "me sbagliaje!"), ‘nu zzero a zzero ‘ncasa contro a ‘na squatra (tosta,catenacciara, ma valida, pe gghionta ‘e ruotolo ajutata ‘a ll’arbitro) comme â Fiorentina ce po’ stà... Guagliù certamente nun simmo ‘o Barcellona....Pe cierti traguarde ‘mpurtante nun simmo ancòra attrezzate..... Mettimmoncello ‘ncapa e ‘ntutte ‘e case sempe e ssulo FORZA NAPOLI!
Venimmo ê ppaggelle:
DE SANCTIS 7.: Salvaje ‘o risultato ô primmo tempo, ‘na vota ‘ncopp’ a Montolivo e ppo cu nu ‘mpulso repentino (istinto felino) ncopp’ a ‘na capata ‘a vicino ‘e Natali, ca Cannavaro êva lassato a ffà ‘e sacicce suĵe..
CAMPAGNARO 6-.: Meno sicuro d’ ‘o ssolito s’ arrangiaje cu ‘o mestiere ca tène, ma non fuje certamente ‘a meglia partita soja; me parette nervuso e soffrette ‘o mumento no ‘e tutta ‘a squatra.
CANNAVARO 6-.: Mettette ‘a musarola a Jovetic(cio) pure arresecanno coccosa, ma tutto summato vincette ‘a sfita cu ‘o scurbutico attaccante viola;sotto porta nun riuscette a cuntrastà ‘e capa a Nnatali ca ce steva facenno ‘o servezzio e cquanno se trattaje ‘e ‘mpustà ‘e ripartenze fuje assaje ‘mpreciso: c’è poco ‘a fà, nun ‘o ttène!
FIDELEFF 6-.: Durante ê primmi minuti fuje preoccupato:’a smarrunata (il grave errore) ‘eVerona se facette sèntere. Durante â ripresa ‘na capata soja fora mesura poco mancaje ca nun favurisse n’ ata vota n’attaccante avverzario! Pe furtuna ca po cierti bbuone ‘ntervente ‘o facettero repiglià e ‘o san Paolo ‘o ‘ncuraggiaje cu paricchie applavuse. È ggiovane, ma cumunque ce sta materia pe faticarce. (Dô 54° ARONICA 6.: Dimustraje ‘e attraverzà’nu bbuonu periodo ‘e forma. Bravo dint’ a cchiú ‘e ‘na circustanza.)
ZUNIGA 6.5: Se cunfermaje ‘int’ a ‘nu mumento cratisto; chiammato a ffà ‘a parte ‘e Maggio jette ‘na maraviglia ‘ncopp’â dritta e fuje anche priciso ‘nfase difenziva. ‘Na bbella percussiona soja ô finale rialaje ll'urdema speranza ê cuane; Peccato ca mancaje comme ô ssolito ‘e pricisione cu ‘e cruzze (con i cross), pecché dimustraje d’essere capace ‘e mettere ‘ndifficultà ll’avverzarie viola.

INLER 5.5: Nun fuje ‘o solito geometra ca cunuscimmo; ajere ssera stranamente sbagliaje cchiú ‘e ‘nu passaggio e cchesto ggià rappresenta ‘na nutizzia!Bbuono ‘nu tiro ‘a luntano parato ‘a Boruc(co). Ma è ttroppo poco!
GARGANO 6: A ‘stu mumento se po’ ddicere ca Uragano Gargano è ‘o meglio centrocampista cuano. Sbagliaje sí quacche appoggio, ma ce mettette tanta quantità, ricuperanno ‘na cifra ‘e pallune e ffuje ll'unico a ffà na pressiona efficace ascenno pure a chi sî ttu e chi songh’io cu cchi capitava capitava.

DOSSENA 5.5: Nun fuje ‘o solito pistone (stantuffo) ‘ncopp’â mancina.Se sacrificaje pe ll’ate ma ‘o fatto d’avé perzo ‘o pate ‘o cundizziunaje assaje e certamente nun fuje ‘nu prutagunista d’‘a partita
(Dô 72° PANDEV 5.5: Nun ce simmo: ‘a isso ce s’aspetta assaje ‘e cchiú e ‘mmece pure ajere ssera aizaje póvera!)
HAMSIK 5.5: ‘Na serata ‘a scurdarsene subbeto. Senza ggenio e fora d’ ‘o juoco, nun facette nisciuna jucata ‘mpurtante, nun cullabburaje â manovra e se vedette poco pure quanno se trattaje ‘e ‘nsertarse (inserirsi).
LAVEZZI 6: Quanno partette ‘nvelocità palla ô pere s’avette sempe ‘a sensazzione ca putesse succerere coccosa. Ma nun succedette niente pecché ‘o guaglione ce pruvaje, ma fuje chiaro ca nun stette a ll’arribba (al top) e nun avette ‘o demmarraggio ( lo spunto) dicisivo.
(Da ll’81° SANTANA sv)
CAVANI 5.5: Tuccaje assaje meno pallune d’ ‘o ssolito; cessaje arreto (arretrò) cchiú d’ ‘o nicessario pe cercà ‘o scagno stritto cu ‘o Pocho. Se sacrificaje assaje, ma fuje fora d’’o juoco e male servuto.’Int’ a ttutta ‘a partita sulo unu tiro..., asciuto a ffilo ‘e palo!

MAZZARRI 5: Ajere ssera se vedette ‘nu Napule ancòra anarrúmeno (convalescente) doppo d’ ‘a mazziata ‘e Verona. ‘A manovra nun fuje fluida comme ati vvote e ‘a squatra nun tenette ‘a solita cegna (grinta) liunina ‘e ll’allenatore suĵo. C'è sta ‘a faticà;Mazzarri s’à dda ‘nventà coccosa; s’à dda cagnà liggistro e pure ampressa pecché aggio paura ca cu ‘nu Napule accussí, marterí a ssera ‘o Villarreal po’ ffà ‘na bbella fijura ô San Paolo pure cu Rossi ammaccato!
l’arbitro VALERI 3: ‘Nu guajo eterno ll’arbitraggio ‘e ‘stu libbero prufessiunista (‘e che nun se sape...) rumano ca siscaje sempe, pe partito pigliato, contro ô Napule caputianno ‘e ffalte (i falli) e permettenno ê delinquente viola è chiavà mazzate ‘a cecate specie ‘ncuollo ô Pocho .’O mmassimo ‘o facette quanno dinto a dduje minute annijaje no uno, ma dduje ricure ê cuane: uno pe falta ‘e mano vuluntario ‘e Pasqual(o) e n’ato pecché nun me ricordo qualu jucatore viola dinto a ll’aria ‘e ricore apprimma strattunaje e ppo affussaje a Marekiaro ca (curnuto e mazziato...)fuje pure ammunito pe pruteste e no pe simulazziona! ‘Nzomma vriognoso, semplicemente vriognoso l’arbitraggio ‘e ‘stu Valeri.
Crediteme, tifo p’ ‘o Napule dô 1954, jevo sempe ô statio, mo m’ aggi’ ‘a accuntentarme ‘e vederme ‘e ppartite pe televisione e nun è abbitudine mia appellarme pe ll’arbitragge cuntrarie;’o ffacevo sulo quanno ero guagliunciello e ‘e ccose storte me facevano suffrí; mo so’ ppassato ‘e cóveta e nniente cchiú m’êsse ‘a meraviglià, avesse avuto farce ‘o callo a tutte ‘e schifezze.... Eppure no: me sta venenno n’attacco d’urticaria a penzà ca ajere ssera fujeno nuvantacinche minute ‘e priatorio e m’attuccaje ‘e vedé troppi fetenzie tra juoco viulento, punizzione siscate ô ccuntrario, ricure annijate e cumpagnia bbella ! Sperammo ca marterí a ssera cagnasse viento!
Ce sentimmo. Staveti bbe’
R.Bracale Brak