NAPOLI – MILAN 18/09/11 (3 A 1!)LL’AGGIU VISTA ACCUSSÍ

NAPOLI – MILAN 18/09/11 (3 A 1!)
LL’AGGIU VISTA ACCUSSÍ
Missione cumpiuta guagliú! Pràtteca escappata (evasa) cu ‘nu sfizzio e ‘na cuntentezza ca nun ve dico, ma v’ ‘e pputite ‘mmagginà! ‘Nu granne, majateco Napule, ‘ncopp’ a ll’accurdata (sulla scia) d’ ‘a cunziderevole prova ‘e Mancester(ro), ajere ssera mettette sotto pure ‘e demmonie milanise cu ‘na partita (a pparte ‘e primme diece minute ‘e ‘nzallanemiento) ‘a mettere ncurnicia d’ argiento, ‘na partita ca ‘nfantasia ce à purtato ê tiempe triunfale ‘e quanno ce steva Diego.......Chi sa’ si ce sta ancòra ‘ngiro quacche ‘ncumpetenta seccia ca tène ‘o curaggio ‘e dicere ca ‘o Napule è ffuoco ‘e paglia e ca chisto è ll’anno d’ ‘a zoccola janca e nnera. Nuje facimmo ‘e ccorna e ce ne futtimmo seempe speranno ca cierti ummenicchie se facessero capace e se cunvincessere a alluccà ‘nzieme a nnuje:
F O R Z A N A P O L I !, CIUCCIO FA’ TU!
Però mo nun è ancòra ‘o mumento ‘e rilassarce; stammo appena ô pprincipio e ss’ à dda ‘nzistere, pecché so’ ‘e pprimme mazzate chelle ca lassano ‘o signo! Sotto a chi tocca e accumminciammo a ppenzà â pratteca Chievo ca già s’appròssema (è alle porte)......Primma d’ ‘e ppaggelle, voglio dà ‘nu cunziglio ê squatre ca ànn’ ‘a vení ô san Paolo: Nun ve purtate ‘e pallune, nun v’ ‘e ppurtate ca tanto nce penza ‘o Napule a v’ ‘e ddà!
E mmo passammo ê ppaggelle:
DE SANCTIS 7. – Testaje fremmo ‘ncopp’â capata d’Aquilani ch’isso nun s’aspettava..., ma facette ddoje parate ‘mpurtante ‘ncopp’ a Nocerino, ma soprattutto‘ncopp’ a Aquilani. Dètte â difesa ‘na granna tranquillità, ma s’à dda levà ‘o vizzio ‘e piazzà ‘mbarriera dduje si’pochielle: Gargano e Lavezzi; ‘Ncopp’â redda d’Aquilani nun s’aspettava ca Aronica e Cannavaro ll’avessero lassato sulo sulo.

ARONICA 5,5. – Nesta se fósse mmeretato d’essere apòstrucato (espulso),Totò ajere ssera ce mettette tanta cegna (grinta) e ‘nu bbuonu senzo d’’a posizzione, soprattutto ô siconno tempo.Ll’unicu zzarro pigliato fuje quanno ‘mparuliannose cu Cannavaro: Ce vaco i’, ce vaje tu
Nun ce jette nisciuno e lassajeno sulo sulo a Aquilani ca cu ‘na capata futtette a De Sanctis flattenno (illudendo) ‘o Milan(no).

CANNAVARO 5,5. –Turnajemo ê specie antiche: ‘ndifficultà a campo apierto; ô pprincipio se facette truvà troppo spisso fora pusizzione e ccumminfatte Aquilani, venenno ‘a areto s’ammuccaje ‘mpusizziona centrale lassata scuperta e facette ‘e commete suĵe. ‘O capitano jucaje ‘nu poco meglio ô siconno tempo quanno tutt’ ‘a squatra se revelaje (si espresse) tatticamente meglio.Facette però ‘na granna puttanata cu ‘na falta ‘e mano dinto a ll’area nosta ca ce puteva custà ‘nu ricore ch’êsse pututo mettere n’ata vota ‘mpartita ‘o Milan(no). Pe ffurtuna ca Tagliavento nun vedette o nun vulette vedé (forze pe farse perdunà cierti ccose ca po ve dico...) e nun siscaje ‘o ricore. Ma nun se po’ ccampà cu ‘sta preoccupazzione ca ‘o capitano o Aronica ponno fà ‘na puttanata a ‘nu mumento a n’ato!

CAMPAGNARO 7,5. – Dê pparte soje nun se passaje e nun se passa quase maje. Si nun ce credite addimannate a Ppato ca (purtato appiso a ll’urdemu bbuttone d’ ‘a vrachetta d’ ‘o Toro cercaje ‘e ggirà a llargo jemnno a gghiucà luntano dô cegnuto (arcigno) difenzore cuano.

DOSSENA 6 -. – Comme a ssempre: bbuono ‘nfase uffenziva,ma ‘ndifficoltà dinto a cchella difenziva. ‘O Milan(n) ô primmo tempo attaccaje soprattutto dô lato suojo.
(Dô 78° ZUNIGA 6,5 - Pochi minuti, ma servettero a dimustrà ‘o straurdinario periodo ‘e forma, pure ‘ncopp’â mancina, d’ ‘o ggiuvinotto colombiano).

INLER 6,5. – Difettaje ‘nu poco ‘nfase ‘e ‘mpustazione, ma fuje tuosto e majateco (robusto)‘nfase ‘e ‘nterdizzione e de pantaglia (schermo) annant’ â difesa.

GARGANO 7,5 – Mancester(ro) e ‘a partita d’ ajere ssera fujeno ‘a cunferma ‘e quanto spisso dicevo ll’anno passato quanno parlavo ‘e ‘nu pussibbile miglioramento d’ ‘o guaglione si avesse jucato apprufittanno ‘e ll’assistenza ‘e ‘nu bbuonu reggista a ffianco a isso; nun se vedeva jucà a Uragano Gargano accussí ‘a quatte anne!

HAMSIK 6,5. – Poco dunato (incisivo) ‘nfase d’ attacco, ma valiuso valiuso (bravissimo) dint’ â travatura (nel collegamento) d’ ‘e ssezzione (reparti).
(Dô 64° DZEMAILI 6 Sbagliaje quacche ccosa, ma è ‘nu surdato ca quanno è chiammato risponne sempe: Presente! Sbagliaje pe ppoco ‘na redda cu ‘nu bbellu tiro ‘a luntano).

LAVEZZI 7. - Miezu voto ‘e cchiú viste ‘e sserenghe ca seffacette fà pe scennere ‘ncampo. Jucaje cu n’abnegazziona granna assaje (grandissima dedizione) e megalopropeja (generosità) ma nun risultaje ‘mpressiunante (appariscente). ( Da ll’ 82° PANDEV s.v.).

CAVANI 9. – Ggià â siconna redda lle vulevo mettere otto e mmiezo, ma ll’amico Federico me dicette: “Aspetta ‘nu poco!” E avette raggione. ‘O Matador(ro) dètte ajere ssera ‘na risposta ca nun ammette replica a cchi teneva quacche duvída (qualche dubbio) ‘ncopp’â purcentaja (percentuale) realizzativa d’ ‘o ggiuvinotto: e dicere ca non è ancòra a ll’ arribba (al top)...Ma lle vuó mettere cchiú poco ‘e nove a uno ca cu ttre rredde te stenne ‘a squatra campione d’ Italia e va a ppiglià p’ ‘e rrecchie ‘a rubbentussa ca ggià faceva ‘o vallo ‘ncopp’â mmunnezza?

ALL. MAZZARRI 7,5 - Non è cchiú ‘na supresa: ‘o Napule joca bbuono,diverte e ddà suddisfazzione!Si po vulimmo cercà ‘o pilo ‘int’a ll’uovo, ll’âmm’ ‘a tirà ‘na recchia pecché ‘o Napule spisso rijala ‘o primmo quarto d'ora a ll’avverzarie, specie si so’ squatre ‘mpurtante... e isso nun à truvato ancòra ‘o sistema p’evità ‘stu ‘mpiccio.
L'ARBITRO TAGLIAVENTO 4,5 Arbitro senza perzunalità nun governaje a dduvere ‘a partita, sfugannose a sventulà sott’ô naso d’ ‘e napulitane cartuline jalizze a gogò, facennose sistematicamente cartià e cundizziunà dê jucature milaniste Nesta, Cassano e Ppato ca se fossero mmeretate tutt’ ‘e ttre d’essere jettate ‘a via ‘e fora pe gghiuoco viulento, aggressivo pe falte ‘e reazzione e pe simulazziona cuntinuata.Quanno po Cannavaro facette falta ‘e mano dinto a ll’area luvarda, isso pe farse perdunà tutt’ ‘e ccumpiacenze ( i favori) fatte ê milaniste nun dicette niente, ma accussí scuntentaje a ttutte quante... Vulesse proprio vedé ‘o cummissario ‘e campo comme ll’à trattato a cchisto parrucchiere ‘e Terni (ca si fa tinture e ppermanente comme arbitraje ajere ssera... ‘e ssignore lle scippano ‘a faccia). Ajeressera ‘stu ‘ntontero sistematicamente se ne futtette d’ ‘o recolamento e ‘e falte ‘e ssiscaje ô ccuntrario.
E cu cchesto ve saluto e ringrazzio ‘e ll’attenziona.
Staveti bbuone!
Raffaele Bracale Brak