LENGUE ‘E PASSERE D’ ‘O SCIUMMO.

LENGUE ‘E PASSERE D’ ‘O SCIUMMO.

Chello ca ce vo’ pe sseje perzone:
600 gramme ‘e lengue ‘e passero,
600 gramme (piso lisso) ‘e puparuncielle ‘e sciummo ammunnate dô streppone, lavate e asciuttate,
100 gramme ‘e sulumiglie d’alicesalate sott’uoglio,
200 gramme d’aulive janche desciussate,
dduje spicule d’aglio ammunnate e ntretate finu fino,
‘nu bicchiere e mmiezo d’ uoglio ‘aulive dunciglio,
‘nu tuppeto ‘e prutusino lavato, asciuttato e ntretato,
sale fino e ppepe janco mmacenato a ffrisco q.c.n.v.
sale duppio ‘na vrancata

Comme se fa


Dinto a ‘na prupurziunata tiella ricà ll’uoglio e ‘e duje spicule d’aglio ammunnate e ntretate finu fino e a ffuoco allero fà piglià culore a ll’aglio e appena è succieso agnadí ‘e sulumiglie d’alicesalate sott’uoglio e farle accumplià e súbbeto agnadí ‘e puparuncielle ‘e sciummo ammunnate dô streppone, lavate e asciuttate e farle cocere; comme songo suassate avascià ‘o ffuoco e dint’â tiella agnadí ll’aulive desciussate e ntretate; lassà cocere pe diece minute, accuncià ‘e sale e ppepe e mantenere ncaudo. Fraditanto àrvere teniente teniente ‘e llengue ‘e passero dinto a ‘na caurara d’acqua vullente salata (vrancata ‘e sale duppio); scularle asciutte asciutte e revacarle dint’ â tiella cu ‘o zuco, , tuiglià pe dduje minute a ffuoco allero,stutà ‘o ffuoco e derrammà cu tuppeto ‘e prutusino lavato, asciuttato e ntretato,ammiscà e ‘mpiattà servenno súbbeto ‘sti sfezziose lengue ‘e passere d’ ‘o sciummo . Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.
Magna Napule, bbona salute! Scialàteve e cunzulàteve ‘o vernecale!!
Raffaele Bracale





.





.