EMPOLI – NAPOLI (3.04.19) 2 A 1 ‘A VEDETTE ACCUSSÍ

EMPOLI – NAPOLI (3.04.19) 2 A 1

‘A VEDETTE ACCUSSÍ

Tribbuna-divano listata a llutto da ajere guagliú p’’a collera i ‘o scuorno ‘nfaccia ca ce mettette ‘o Ciuccio ca jenno ô Catellani d’Empoli contr’ê lucale nun sulo nunn’ affurzaje (vinse), ma nun riuscette manco a rrussimà (pareggiare) e se nn’êtte ‘a turnà â casa cu ‘a saraca ‘nt’â sacca pe bbia ca abbuscaje doppo ‘na mubbara (partita) brutta, senza zureja (velocità), senza ficre (idee) e ssenza cuncentrazziona  soprattutto a ll’arrancua (ripresa) quanno turnate ‘ncampo  cu ll’uno a uno [afferrato p’’e capille ô 44’ da Zielinski,  cu ‘na cagliosa da vinticinche metre, quanno tanto pe ffarese perdunà ‘a meza fessaria fatta ô 29’ nun facennose ‘e cacchie suoje ‘ncopp’ô tiro ‘e Farias(se), tiro ca ‘o Lungagnone se priparava a ppiglià lla addó fósse arrivato senza ‘a deviazione ‘e guveto d’’o pulacco ca mannaje ‘o pallone ‘mporta nosta!.. Ve dicevo: turnate ‘ncampo  cu ll’uno a uno d’’o primmo ajone (tempo) ‘e nuoste ‘mmece ‘e tentà ‘e fà coccosa pe tentà d’affurzà  (vincere), s’assettajeno e ttirajeno ‘nnante a vvienetenne, senza zuco nè ccunnimma, senza fà ‘nu cacchio; naturale ca ô 52’ ll’Empoli n’apprufittasse e ccu Di Lorenzo ce futtesse ‘a siconna vota e  a cchest’addaffa (rete) ‘int’ê restante 40 minute nisciuno ce riuscette a mmettere ‘na pezza. E ffove notte: ‘o Napule  cullezziunaje ‘a quinta uzzimma (sconfitta) ‘e ‘stu campiunato... troppe pe ‘na scuatra ca vo’ dicere ‘a soja! Pacienza rassignammoce. Ognuno   à dda ppurtà ‘e croce soje: chesta è una d’’e nnoste! Sinamparco (comunque)’e chest’ uzzimma (sconfitta) ‘a scuatra nun fove ‘a sola respunzabbile; ll’accumpagnajeno p’’a scesa nun sulo chillu sacchetto ‘e ll’ummeto ‘e Doveri[4 e ppo ve dico...], po  tutte ‘e cestarielle ca nun ‘a fenesceno ‘e menarce ‘a favetta e soprattutto chi vulette, chi facette e cchi decidette ‘e fà mettere â scuatra chillu schifo ‘e muntazzimma (divisa)brutta e  streveza,  ca chi ‘a ‘mmentaje avesse ‘a essere  sputato ‘int’a n’uocchie i ‘o trattasseno!

Passammo ê ppaggelle:

MERET 6,5  Nun ce putette niente ‘ncopp’ a ll’addaffe pigliate e ‘ncumpenso fove ll’àncura ‘e salvazziona d’’e suoje cu allimmeno tre granni tacculle (interventi).

MALCUIT[‘O Tignuto] 5 Ajere nun me piacette, ll’atalossa (prestazione) soja fove sotto tuono, ‘ncopp’â ferza ‘e dritta, scennenno ‘nnante nun riuscette a ddà ‘na mana a Ppeppe ‘a ‘nguenta; pizzo e ppejo arreto addó tenette ‘ncopp’â cuscienza ‘e ddoje addaffe (reti) pigliate, ‘a primma nun riuscenno a nchiudere ‘ncuollo a Ffarias(se) e llassannolo ll’aggio ‘e tirà, ‘a siconna pecché se facette surpassà d’’o jabbro (cross) pe Ddi Lorenzo cu ttutto ca se truvava ‘ncopp’â trajettoria. [Dô 76′ VERDI 4 Nun riuscette a ttrasí ‘int’ê juoche!]

KOULIBALY[‘o Ggialante] 5   Me dispiace, ma pur’isso se mmereta ‘nu zifo (voto) mancante; pe ddifennere facette sí ‘o nnicessario, ma quanno se trattaje ‘e tannejà (impostare) sbagliaje quase sempe e ffove pricipituso senza cacciarne niente!

LUPERTO 6 Tutto summato atalossa(prestazione) pusitiva d’’o centrale licciso ca cercaje d’essere sempe attiento ‘ncuoll’ê nassie (attaccanti) ‘e ll’Empoli.

MARIO RUI 5,5 Miezu zifo (voto) mancante p’’o purtuchese ca furnette n’atalossa (prestazione) mo sí e mmo no currenno, ma senza zuco.

CALLEJON[Peppe ‘a ‘nguenta] 6  Tirato a ccrumatina se mettette a ddispusizziona d’’o Jancone primma cumme carigginno (esterno) e ppo cumme terzino.

ALLAN[‘O ‘Ncrifato] 5,5  Miezu zifo (voto) mancante pecché a ffronte ‘e  tanti pallune ricuperati ‘int’â camma (zona) centrale d’’o  campo,mustraje  poca qualità  quann’êtt’’aimpostazione per il brasiliano

ZIELINSKI 6  Apprimma smarrunaje spiazzanno ôLungagnone, ma po se facette perdunà cu ‘a cagliosa ‘e ll’uno a uno e pp’’o riesto fove ll’unico a ppruvarece.il

YOUNES[‘O Mmerecato] 5,5 Miezu zifo (voto) mancante pecché ‘o terisco accumminciaje bbunarello, mo po se ne scennette pe bbia ‘e ‘na cundizziona ca nun fove bbona. [Dô58′ MERTENS[Ciruzzo] 5,5  Miezu zifo (voto) mancante pure a isso  pecché ll’arillo berga nun facette niente ‘e chello ca ce fóssemo aspettate.]

Ounas  5,5 – Mannato ‘ncampo dô primmo minuto pur’ isso se mmeretaje miezu zifo (voto) mancante pecché facette troppo poco a ppietto ‘e chello ch’êss’ avut’’a fà: sulo quacche tentativo aizanno porvera. [Dê 58′ FABIANRUIZ [Anema longa] 6 Pure si pruvaje a ffà quatrà ll’armidanno (centrocampo) ‘o spagnuolo, quanno sagliette  nun truvaje  ‘a suluzziona justa.]

MILIK[Sant’Arcadio ] 5,5 Me dispiace assaje, ma  pur’ isso se mmeretaje miezu zifo (voto) mancante pecché nun tentaje maje ll’azziona perzunale e ghghiucaje sulo ‘e sponna forze pure pecché ‘e cumpagne nunn’’o cercajeno e nnun lle detteno pallune ‘a jucà dint’â muntaca (area di rigore)

all. ANCELOTTI [‘O Jancone]: 5 Quanno se perde ‘o primmo a sbaglià è ‘o mutarribbo(allenatore) ca smarrunaje  cu ‘e duje carigginne (esterni) i ‘e ccagnaje tarde.

arb. DOVERI: 4 Ati vvote pure smarrunnanno cca e lla ce aveva purtato bbuono, ma ajere ‘stu sacchetto ‘e ll’ummeto ce siscaje sistematicamente contro e nnun ce dette dduje ricure: ‘o primmo pe ‘nu cazzotto ‘nfaccia ô Tignuto dint’â muntaca (area di rigore) d’’e lucale i ‘o siconno quanno Sant’Arcadio sempe dint’â muntaca (area di rigore) d’’e lucale fove stiso e isso nun sulo nun ce ‘o dètte, ma ‘o nutizziaje (ammoní) pe simulazziona lucale.

E fermammoce cca. Jette cumme jette e ppacienza. Mo si ‘o Cielo m’’o ffa vedé voglio cuntarve llunnerí ca vene ca dummeneca a ssera ô san Paolo, ‘o Napule è tturnato a essere isso e à mazziato ‘o Ggenoa. Accussí sperammo. Staveti bbe’! R.Bracale Brak