NAPOLI – CAGLIARI (21/04/13) 3 A 2‘A VEDETTE ACCUSSÍ

NAPOLI – CAGLIARI (21/04/13) 3 A 2 !!! ‘A VEDETTE ACCUSSÍ Ajere a ll’ora d’ ‘o spasso pratica Cagliari risolta guagliú, ma a ll’urdemu mumento e spantecanno! Sinamparco (comunque) vittoria ‘mpurtante ca ce permettette doppo paricchiu tiempo ‘e turnà a ffà agliottere a cCellino chillu Bastarde! ca ce cunzignaje a nnuje napulitane... nun m’arricordo quanno; vittoria ca p’ ‘o mumento ce cunzente ‘e stà – ‘nclassifica – luntano dô Milàn(no), a cchillu siconno posto ca ce prumette ‘e farce sentere n’ata vota ‘a marcetta d’ ‘a Ciampionsa. Stanno accussí ‘e ccose avesse ‘a essere cuntento e ‘mmece no, ma no pecché songo ‘ncuntentabbile... quanto pe bbia ca nun se ne scenne proprio ca ajere ‘o Napule cuncedette ê profuche isulane ‘e signà ‘a bbellezza ‘e ddoje rredde... e tutte dô lemmeto d’ ‘a camma...; nun se ne scenne ca ‘e cuane doppo d’essere state ‘nsotto p’ uno a zzero e doppo d’avé rimuntato nfi’ ô doje a uno pe lloro se facettono arrivà ‘ncopp’ ô doje a ddoje e sulo a ll’urdemu minuto Lorenzigno riuscette a darce ‘o piacere ‘e signà ‘a rredda ca ce facette vèncere ‘nu fullé ca s’êv’ ‘a vencere! E che saciccio! Cca nuje nun putimmo campà ‘e parpete. Cierti pratiche s’ ànn’ ‘a risolvere sott’ô colpo ggià dô primmo aione. Mazzarri ce à dda faticà ‘e cchiú... e ll’à dda ferní ‘e ‘nzistere cu ghiucature cuncuotte o fora posizziona. E che saciccio! Passammo ê ppaggelle: ROSATI 5,5Sfurtunato! Nun puttette fà niente [e nno ppe sfarma (colpa) soja] nè ‘ncopp’â cagliosa ‘e Ibarbo né ‘ncopp’â pennellata ‘e Sau. BRITOS 5,5Atalossa nun sempe accorta e ppricisa, pure si cu pochi sfregazze (sbavature) ‘ndifesa. CANNAVARO 5‘Nfra ‘e cchiú nervuse, sufferette cchiú d’ ‘o cunzentito durante ô primmo aione, mancanno sempe ‘a chiusura ‘nsiconna bbattuta. GAMBERINI 5,5Primo aione ‘e sacrifiggio, custretto a ascí p’adderezzà ‘nu fullé ca arresecava d’essere cumprumesso (dô 54°ARMERO 6+Trasette p’ajutà ‘a varca uffenziva e se facette apprezzà. Fósse trasuto primma!) MAGGIO 4.5 Me dètte ll’impressione d’essere cuncuotto:poco priciso pe tutto ‘o primmo aione, nun facette meglio a ll’arranqua.’Ncopp’â primma rredda ‘e ll’isulane se perdette a Ibarbo e a ll’arranqua sbagliaje ‘nu cruzzo ‘mpurtante,rijalanno pallone ô purtiere Agazzi. HAMSIK 5,5 Primmo aione smattuto (opaco). Arranqua ‘ncrescita. Certamente però nun fuje una d’ ‘e ghiurnate soje cchiú mmeglie, soprattutto pecché se scarpesajeno ‘e calle isso e cCavani cchiú ‘e ‘na vota, ma prucuraje ll’autobbutto (autogol) ‘e Astori ca purtaje ‘o Napule ‘ncopp’ a ll’uno a uno. Meglio ‘e niente! ZÚNIGA 4,5Jurnata no;durante ô primmo aione nun riuscette a appressurà (spingere) comme êsse avut’ ‘a fà ‘ncopp’â curzia ‘e mancina; piezzo e ppejo a ll’arranqua. ( da ll’87°CALAIÒ s.v.Sulo quacche scampulo ‘e fullé, tanto pe firmà ‘o foglio ‘e presenza.) DZEMAILI 5Ce mettette tanta bbona vuluntà, ma nun cacciaje maje ‘o cuniglio ‘a dint’ô ferbone (cilindro). Lassaje ‘o campo a ffavore ‘e ‘nu puntero (punta) a risultato cumprumiso.(dô 78° INSIGNE 9 Sidece minute pe Lorenzigno, ma abbastajeno pe farce vencere ‘o fullé; che rredda ‘a soja! ‘A sulo chiejaje ‘o Cagliari e risulvette ‘a jurnata!) BEHRAMI 6,5Solita trancara ‘mmiez’ô campo.Addirittura ‘ncrescita a ll’arranqua. PANDEV 6,5 Miezu punto ‘e cchiú pe ccomme fuje tassuso frubbo e cazzemmuso mettennoce nun sulo ‘e ccosce, ma pure ‘e ccerevelle! CAVANI 6 Pe tutto ‘o primmo aione se dannaje ll'anema ma, troppo nervuso e casinista s’abbuscaje ‘nu cartellino jalizzo e nun riuscette a ttruvà ‘a porta, scarpesannose spisse ‘e piere cu Marekiaro.Tentanno ‘e dà ‘na mana ‘ndifesa, cu ‘na respinta molla e bradosa, cunzignaje a Ibarbo ‘o pallone d’ ‘a primma rredda isulana. Pe ffurtuna ca a ll’arranqua se sbluccaje mettenno dinto ‘o pallone d’ ‘o doje a uno pe nnuje. MAZZARI 6 Dicimmo ca ‘a vittoria fuje pure ‘a soja ca carrecaje ‘o fullé a mmestiere sapenne bbuono ‘e pericule ca annascunneva; ce credette nfi’ a ll’urdemo arresecanno gruosso cu ttre puntere (tre punte) cchiú Marekiaro e dduje esterne d'attacco e ‘a rredda justo ô finale ‘e fullé fuje ‘o prremio justo ‘e ll'assalto cuncertato. Bbuono, ma tardivo ll'inzerimento’e Insigne e d’ Armero ca oramaje è ‘na certezza ‘e chistu Napoli e ca pe mme êsse avuto ‘a jucà ggià dô pprincipio spustanno a zZuzzú ô posto ‘e Maggio ch’è cuncuotto! Arbitro DE MARCO 4,5 ‘Nchiattuto e braduso (lento), siscaje sempe luntano ‘a ll’azziona e permettette senza sanziunarlo ‘o juoco viulento a cchille d’ ‘o Cagliari troppo spisso grazziate pe ffalte sistematiche,e nun cecaje a vvederne uno, gruosso comme a ‘na casa ‘ncullo a zZuzzú ô lemmeto d’ ‘a camma.’Ndiciso e ssenza ll’idee chiare nce mettette ‘na vita isso e ‘e cullabburature suoje pe cunvalidà ‘a primma rredda napulitana e menu male ca nun facette ‘o stesso p’ ‘a siconna! E cu cchesto ve saluto e ce sentimmo ‘a prossima vota , si Ddi’ vo’. Staveti bbe’! R.Bracale Brak