PESCARA - NAPOLI 27/04/13 0 A 3’A VEDETTE ACCUSSÍ

PESCARA - NAPOLI 27/04/13 0 A 3 ’A VEDETTE ACCUSSÍ Missione cumpiuta pure ajeressera guagliú! Missione cumpiuta pecché s’êva vencere pe custringere ‘o Milàn(no) a ccorrerce appriesso e pe nun permettere â rubbentus(sa) ‘e festiggià primma d’ ‘o tiempo n’atu scutetto, ma soprattutto pe cunfermarce ô siconno posto ‘ncrassifica, e mantenercelo ‘stu beneditto posto ca mo comme a mmo è ‘o mmassimo ca se po’ uttené visto ca tenimmo ‘mpanca a Wallerettino Erode Mazzarri e soprattutto visto ca De Chiacchiaroniis cuntinua a ccuntà dint’ ô Palazzo quanto ô doje ‘e coppe a bbriscula, quanno ‘o triunfo è a mmazze!’Nzomma ajere, pure si se scennette ‘ncampo orfane ‘e Cavani e soprattutto ‘e Behrami, s’êva vencere e se vincette anze se stravincette espallanno (dilagando) e facenno ‘e valle ‘ncopp’â mmunnezza contr’ â scuatra urdema ‘ncrassifica e se trattaje cumplessivamente ‘e ‘na vittoria senza se e senza ma; però ‘o Napule se pigliaje tutto ‘nu primmo ajone, dicimmo, ‘e studio, ‘nu primmo ajone,dicimmola comm’è, ‘nu poco ammurbante primma ‘e riuscí a ppiazzà ‘a stuccata bbona e pprimma ‘e po fà ‘a sbrasata nfi’ ô finale ‘e fullé nchiudennolo ‘ncopp’ ô tre a zzero purtannose â casa tre punte senza discussione, accussí comme ’nu siconno posto,ca pare sempe cchiú sicuro. Passammo ê ppaggelle: DE SANCTIS 6,5 Justo ‘nu paro ‘e liturgíe (interventi) ‘a tené a mmente, ma servettono a mantené ‘a porta nchiusa!. CAMPAGNARO 6,5 ‘O solito Toro ‘nfase difenziva se facette apprezzà pure ‘nfase prupusitiva facenno spazzio ‘ncopp’â curzia ‘e dritta. CANNAVARO 6 Fullé senza prubbleme e senza preoccupazzione;avette a cche ffà cu ‘na meza cazetta comme Sforzini e riuscette a metterle ‘a musarola. BRITOS 5,5 Dinto a ‘nu fullé bastantamente plàceto (tranquillo) riuscette a sse fà ammuní e a arresecà ‘e fà signà a cCaprari e ppe cchesto nun pozzo darle ‘e cchiú! MAGGIO 5,5 Manco ajeressera contro ê si’-nisciuno d’ ‘o Pescara turnaje a essere ‘o jucatore ‘e ‘na vota e ssulo ‘na grama vota lle riuscette ‘e fà ‘na cosa bbona favurenno ‘a rredda ‘e Pandev(vo).Troppo tarde Mazzarri ‘o levaje. (dô 77° MESTO sv) DZEMAILI 7,5 Finalmente ‘nu jucatore ca ce crede,ca sape chello ca vo’, ca se fa apprezzà e rispettà; ‘nu primmo ajone ‘e granne spessore tecnico-tattico e ppo ‘a cerasella ‘ncopp’ô gattòmariaggio cu ‘na cagliosa ca fuje ‘nu punto ammirativo e nchiudette ‘o fullé. INLER 7 ‘A panca lle facette bbuono; assenziale, ma priciso e mmesurato stanno largo a ddritta ammenestaje pallune assaje periculuse a ccentro, ma nun truvajeno furtuna; allora decidette ‘e penzarece a ppe isso cu ‘nu puràulo (missile) ‘a vinte metre deviato chellu ttanto pe ffottere a pPelizzoli. lLe fa bbene pure ‘o Pescara: cumplessivamente tre rredde contro ‘e guagliune ‘e Bucchi. ZUNIGA 6,5 Pe sta a ssèntere a mMazzarri ‘e cuane jucajeno ‘o primmo ajone inutilmente ‘ncopp’â curzia ‘e Maggio, ma Zuzzú sinamparco (comunque) ogni vvota ca fuje chiammato ‘ncausa s’ ‘a vedette ‘e bbello. gGià dô principio n’ato trainer(ro) ll’êsse fatto jucà a ddritta ô posto ‘e Maggio mettenno ‘ncampo a mmancina a Armero;Mazzarri, ca nun se sente ‘e fà ‘e ccorna a Christian nun ‘o facette. (dô 62° ARMERO 6,5 Trasette troppo tarde, ma se facette subbeto apprezzà mettennoce ‘o suĵo cchiú ‘e ‘na vota puntanno ‘a porta e soprattutto facenno ‘nu pulitelico (prezioso) velo ca libberaje a dDzemaili p’ ‘o tiro d’ ‘a terza rredda). HAMSIK 6,5 Esaltaje ‘o pubblico cu ‘na rasulata a mmità ‘e primmo ajone e pPelizzoli ce mettette ‘na granna pezza. Po cuntinuaje a dispenzà juoco comme sape fà isso cu ‘ntelliggenza e perzunalità; è oramaje pronto p’addiventà ‘o masto (leader) ‘ncuntrastato ‘e chesta scuadra. Sperammo sulo ca mo De Chiacchiaroniis doppo ‘e Cavani nun se leva pure a mMarekiaro. PANDEV 7 Êss’ ‘a metterce ‘o marchio ‘e fraveca a cchella rredda soja o depositarla a ll’ufficio brevette: stuppaje,se ggiraje a strummolo e futtette a pPellizzoli cu ‘nu diacunale priciso e tassuso (veloce).Tutto into a mmanco ‘nu metro cuatrato! (Dô 79° CALAIÒ sv) INSIGNE 6 ‘A rredda ‘a signaje pure, ma partette ‘nnúrzo ‘e cóse (in fuorigioco) ‘e ‘nu paro ‘e metre e ll'arbitro, ca nun se nn’era addunato, cunzigliato dô segnalinee, giustamente annullaje. Po ‘o guaglione cuntinuaje a cce pruvà, ma cu scarsza furtuna: retissante (clamorosa) ‘na ‘ncurnata ‘a pochi metre cuntrarrestata ‘e bbrutto (neutralizzata alla grande) ‘a Pelizzoli. ALL. MAZZARRI 6- Vittoria êva ‘a essere e vittoria fuje, ma che fatica, soprattutto pecché se ‘nfessette cu mMaggio a ddritta , tenenno ‘mpanca a Armero, addó êsse pututo mettere Zuniuga a dritta e Armero a mancina e forze ggià dô primmo ajone [ca ‘o Pescara jucaje nchiuso a rriccio] se fósse sbluccato ‘o fullé senza aspettà ca Inler(ro) se decidesse a ccentrà ‘a porta cu ‘na cagliosa preputente.è overo ca doppo d’ ‘a rredda d’ ‘o turco-napulitano tutto fuje cchiú facile, ma no pe bravura ‘e Mazzarri!’Nzomma nun fuje proprio ‘na passiata, ma cu uno comme Mazzarri ‘e cchiú nun se po’ sperà.Ringrazziammo ô Cielo pure si ‘ncampiunato ce avimmo accuntentà d’ ‘o siconno posto. Purtroppo! Arbitro ROMEO 5,5 ‘E primmu lanzo, cosa ‘a nun credere!, cunvalidaje ‘na rredda ‘e Insigne partuto ‘nnúrzo ‘e cóse (in fuorigioco) ‘e ‘nu paro ‘e metre, ma po cunzigliato (a maleparole) dô segnalinee, giustamente annullaje, ma ‘a brutta fijura ggià ll’êva fatta! P’ ‘o riesto urdinaria amministrazione. E cu cchesto ve saluto e ssi dDi’ vo’ ce sentimmo llunnerí ca vène. Staveti bbe’! R.Bracale Brak