TRENTO –NAPOLI (am.le 15.07.17) 0 A 7

TRENTO –NAPOLI (am.le 15.07.17) 0 A 7

Eccuce cca, guagliú, ce stammo sentenno, ‘ngrazzianno a dDio, n’ata vota e sperammo ‘e puterlo fà nsi’ ô prazzo (termine)  d’’o campiunato ca vene, pure pecché pur’ i’ cumme a pparicchie ‘e vuje  penzo ca chesta è ‘a vota bbona pe tturnà a vvencere chillu saciccio ‘e cusariello janco russo e vverde e mme piacesse ‘e fistiggiarlo ‘ncumpagnia vosta. E ‘o ppenzo no pecché m’aggiu sunnato ‘o tramme alettrico,  ma pecché leggio e ssento ca tutte ‘e jucature nuoste ‘o ppenzano e cce credeno e ddàtose ca, si pure ‘a cuncurrenza è assaje e cquase tutte ‘e scuatre se  stanno svenanno p’accattà ‘nu tummolo ‘e jucature,  chesto nun significa ca se stanno raffurzanno pecché ccertamente ànno avé tiempo pe cunoscerse, pe ccapirese e ppe   ss’ammiscà (amalgamare), mentre ‘e nuoste, restate cchiú o meno ‘e stesse ‘e ll’urdema tempurata cu ppoche, ma bbuone nuove, ponno partí a ccapa sotto, affunnanno a ttavuletta pe ffà ‘a lepera, facennose correre appriesso a ll’ate! Allimmeno accussí spero e pparicchi ‘e vuje sperano! ‘E chesto però  se ne parla dô mese ca trase; p’’o mumento parlammo  ‘e chello ca succedette ajere a tTrento contro â scuatra lucale ca ‘o Napule asfardaje pe sette a zzero.E i’ mo che ve pozzo dicere? Sulo ca fove ‘o    solitu Napule ca dimustraje ‘e stà ggià ‘mpalla doppo ‘stu siconno sibbacco (incontro) d’’a tempurata (stagione); certo nun s’è gghiucato contr’ô bBarcellona o contr’ ô Rialmadriddo, ma cumplessivamente vintiquatto addaffe (reti) fatte e soprattutto ancòra nisciuna pigliata. nun songo certo  ‘na pazziella; ‘nzomma   sulo bboni nnutizzie p’’a scuatra ‘e  Sarri, cumpreso ‘o stuco (gol) d’’o nuovo arrivato Ounasso cu ‘nu bbellu tiro  ‘mbuolo (a volo) ‘e mancina; ‘o guaglione facette vedé ‘e ce sapé fà e ccumplessivamente se facette apprezzà pe ccomme tuccaje  palla, cercaje ‘a pusizziona facennose truvà sempe ô posto justo, ô mumento justo;nun sulo isso però,  tutta ‘a scuatra ggiraje a mmestiere   e facette vedé ‘nu bbellu juoco cu muamarre (trame) ‘nteressante ca durante ô primmo ajone (tempo) foveno mise a ffrutto ô15’ da Ciruzzo, ô 36’ da  Giaccherini, ô 37’ dô  Vampiro [e ppo ve dico], e ô 43’ da Ppeppe ‘a ‘nguenta;a ll’arrancua (ripresa) a ppurtà a cumplessive sette ll’addaffe (reti) ce penzajeno  ddoje vote sant’Arcadio ô 58’ i ô 66’,i ô 59’ Ounasso. Pe pparta soja ‘o Trento facette chello ca puteva fà e, quacche vvota, pure chello ca nun puteva fà...Pacienza! Passammo ê ppaggelle:

RAFAEL sv: Restaje a gguardà senza pavà biglietto e ffove chiammato ‘ncausa ‘na grama vota : ‘nu tacullo  (intervento) ca nun fove difficultuso, ma ca ‘o truvaje pronto.[dô 46’ SEPE sv:  Cumme ô culleca mpratteca nun êtte ‘a fà niente participanno sulo ô ggiro palla.]

MAGGIO 6:  Quanno fove  chiammato ‘ncausa, soprattutto si si trattaje  ‘e  correre, facette ‘o ssuojo arrivanno nsi’â linia ‘e funno pure si cumplessivamente se facette vedé meno d’’o culleca ‘e ll’ata  curzia. [dô 46’ HYSAJ 6+: bBona atalossa (prova) d’’a meza cucchiara albanese ca dette cchiú ‘e ‘nu ‘mpiccio â trasera (retroguardia) d’’o Trento.]

CHIRICHES (‘O VAMPIRO ) 7: Uno ‘nfra ê meglie d’’e suoje fove  protacunista ‘e quacche cchiusura ‘mpurtante, po arrivate ô 37’  truvannose a ffà piazzaje  ‘a palla ê spalle d’’o purtiere d’’o Trento cu ‘nu tiro luongo e sistimato da sittanta metre! Applavuse! [Dô 46’ TONELLI 6: Quacche bbona chiusura, ma p’’o riesto nun êtte ‘a dannarese pe ccuntrullà ll’uffenzive d’’o Trento.]

ALBIOL 6,5: Sempe attiento chelli ppochi vvote ca ‘o Trento s’affacciaje ‘int’ â mità ccampo d’’o  Napule.[dô 46’  KOULIBALY 6,5: Mettette a sservizzio d’’a scuatra tutt’’a forza, ‘a putenza ‘e ll’armaddia (fisico) soja i ‘a tassezza (velocità) risulvenno ‘e prubbleme comme nascetteno.]

GHOULAM 6,5 ‘O vvuleva fà e sse vedette prupunennose ‘ncopp’â curzia assecundanno ‘o muvimento d’’e cumpagne. [dô 46’ STRINIC 6 ‘O Trento nun lle cumplicaje ‘a vita, ma ll’atalossa (prova) soja a mmancina fove pusitiva.

ROG (‘A BBELVA) 6,5:  Se dette da fà ‘mmieze ô campo muvenno sempe e ‘nzertannose (inserendosi) spisso cu ccegna (grinta) e ddicisione [Dô 46’ ZIELINSKI 6,5: Pure ll’atalossa (prova) d’’o guaglione fove pusitiva e dde qualità.]

DIAWARA 7: Uno d’’e meglio durante ô primmo ajone (tempo) se facette apprezzà pe mmuvimento, cegna (grinta) e ppasiglie (passaggi) ‘nduvinate. [Dô 46’ ALLAN 6,5: bbona atalossa (prova) pure d’’o nummero cinche ca luttaje, ricuperaje pallune e ccercaje ‘e cumpagne.]

HAMSIK 7:. Ògne vvota ca ‘o pallone passaje p’’e piere ‘e Marekiaro schiaraje juorno i ‘o capitano appruntaje n’azziona periculosa mo  cu n’jusaida  (assist),mo ‘nu ‘nzertamiento (inserimento),mo ‘nu pasiglio (passaggio) o ‘nu bbassurero (suggerimento).  [Dô 46’ JORGINHO 6,5 ‘E nassie (attaccanti) ll’êtten’a ringrazzià p’’e tanti pasiglie (passaggi) e  ll’ urtizzazzione (verticalizzazioni) fatte.]

CALLEJON 6,5: Sempe putenzialmente periculuso Peppe ‘a ‘nguenta, pure senza palla dette paricchiu ‘mpiccio â trasera (difesa) d’’o Trento i  ô 43’ se levaje ‘o sfizzio ‘e signà. [Dô 46’  OUNAS 6,5:A pparte ‘o stuco (gol) fatto ca fove overo bbello, ajere ‘o guaglione dimustraje ‘e tené bbona  camascia  (stoffa) e ffacette capí ca cu isso, dâ parta soja, Sarri po’ cuncertà ‘na bbona arbadirra (alternativa) uffenziva.]

MERTENS (CIRUZZO)) 6,5:Nun s’è scurdato comme se fà e ppure ajere facette n’atalossa (prova) assaje pusitiva cunnita cu cchillu azzecato tiro, ca spurcato da uno ‘e lloro ce dètte ‘a primma addaffa (rete). [Dô 46’ MILIK 7+:Ancòra ‘na vota  ajere dimustraje ca ‘o mestiere suĵo è cchillo ‘e signà i ‘o ffacette bbuono assaje, ‘na vota ‘e capa ‘ntuffo e n’ata cu ‘na curaggiosa ancarabata  (rovesciata), sfruttanno a mmestiere ll’jusaide  (assist), d’’e cumpagnune. [Dô  76’ PAVOLETTI 5: Trasette pur’isso, ma me sto’ dimannanno ancòra ‘o ppecché visto cunfermaje sulo d’essere ‘nu pacco senza nocca attaccato cu ‘nu capo ‘e spavo spapacciato!].

GIACCHERINI 6: Ma sulo p’’o stuco (gol) fatto pecché p’’o riesto aizaje porvera.Meglio si se ne va a fFirenze! [Dô 46’  INSIGNE 6,5:Nun riuscette a ssignà, ma se dette da fà mettenno ‘ntribbule e ‘ntempesta â trasera (difesa) d’’o Trento, s’êtt’’accuntentà però e quacche bbona  jusaida  (assist).Peccato.]

SARRI 6,5: ‘A scuatra ggià ggira e sse vedette. Certo cuntinuanno a ffaticà nun se po’ ca migliurà, sempe speranno ca nisciuno se rompe e ssempe speranno ca nisciunu cestariello nce mette ll’uocchie ‘ncuollo.

 E ccu cchesto ve saluto e rringrazzio dànnove appuntamento si dDi’ vo’,mo comme a mmo nun saccio quanno,  avucurannome ca pure Sarri à fatto ‘o stesso penziero mio e cciovè ca chesta po’ essere ‘a vota bbona!

Staveti bbe’

R.Bracale Brak