AVEMMARIE CASO E OVA

AVEMMARIE CASO E OVA Chello ca serve pe sseje perzone 600 gramme ‘e avemmarie (tubbettielle ricate), 3 ova 100 gramme ‘e ‘nzogna, 150 gramme ‘e pecurino rattato finu fino, ‘nu tupputo ‘e prutusino lavato, asciuttato e ntretato finu fino sale duppio ‘na vrancata, sale fino, dduje pizzeche, pepe janco macenato a ffrisco quanto ne piace. Priparazzione Àrvere pronte pronte (lessare al dente ) ll’avemmarie ‘int’ a otto litre d’ acqua vullente salata(vrancata ‘e sale duppio) e scularle astipanno ‘nu cuppeniello d’acqua ‘e cuttura; fraditanto (nel frattempo) arapí ll’ova dint’ a ‘na ciotola e sbatterle a ffunno cu ‘na furchetta, ‘nzieme ô ppepe e ô ssale fino;fà sciogliere a ffuoco doce dint’ a ‘na tiella ‘e fierro niro ‘a ‘nzogna, aunirve ll’avemmarie arvate pronte pronte verde (al dente) e ammiscà pe ‘nu paro ‘e minute sempe a ffuoco doce;súbbeto doppo auní ll’ova sbattute e ‘o ppecurino rattato finu fino, allungà cu ‘o cuppeniello d’acqua ‘e cuttura d’ ‘a pasta e continuà a ammiscà fino a che ll’ova nun risultano zampuglióse (cremose); ‘mpiattà , e serví sott’ô colpo a ttavula cuspargenno ògni purzione ‘e prutusino ntretato finu fino. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja. Mangia Napoli, bbona salute! Scialàteve e cunzulàteve ‘o vernecale!! Raffaele Bracale