CAGLIARI – NAPOLI 26.11.12 – 0 A 1!‘A VEDETTE ACCUSSÍ

CAGLIARI – NAPOLI 26.11.12 – 0 A 1! ‘A VEDETTE ACCUSSÍ Che suddisfazziona guagliú! Ajeressera, ‘ncapo ‘e ‘nu fullé ca nun fuje bbello, ma ‘mpurtante e sustanziuso ‘o Napule finalmente riuscette a apprufittà dô sciuliamazzo pigliato dâ juventussa e contro a ‘na bbona scuatra, annante a sidecemila tifuse isulane jette a cunquistà tre ppunte ca vanno tant’oro quanto pesano e â fine d’ ‘a jurnata, pure pecché ‘a scuatra ‘e Stramaccioni se jette a ffà paccherià a p Parma, ‘o Ciuccio se jette a piazzà ô siconno posto ncrassifica ê spalle dâ capulista janca e nnera. E nun mettimmo orie (limiti) â Pruvverenzia cu ttutto ca Erode Mazzarri cuntinua a sbaglià furmazzione e ppo à dda correre a metterce ‘na pezza cu ‘e cazune ‘mmano! Nun mettimmo orie (limiti) â Pruvverenzia, pecché nun se po’ maje sapé! Ajeressera, ‘ncapo ‘e ‘nu fullé ca nun fuje bbello,cumunque ‘o Napule riuscette a vvencere e a ppurtarse â casa tre ppunte e mmo me sto’ chiagnenno ‘e duje punte perze ‘ncasa cu ‘o Torino e cchilli duje perze cu ‘o Milàn(no), ca si no stessemo ggià ‘a cuollo a cchi sapite! Ma lassammo perdere pecché si ‘o nonno teneva ‘e rrote era ‘nu pulmanno e si teneva ‘o trollo era ‘nu era ‘nu tramme..., lassammo perdere e passammo ê ppaggelle, speranno ca mo ‘o Napule riesce a mantenerlo allimmeno ‘stu siconno posto senza perdere ‘a fesso quacche atu punto p’ ‘a via! DE SANCTIS 5 Me facette fà ‘e capitune ‘ncuorpo ògne vvota ca ‘o pallone arrivaje dint’â camma soja e ‘ncopp’ a ògne tiro ‘e squina, quanno nun fuje cacchio ‘e sistimà ‘nu cumpagno ‘ncopp’ô primmo palo, currenno cchiú ‘e ‘nu periculo. Durante ô primmo aione facette n’amàrtema( erroraccio) sbaglianno ‘nu rinvio e rummanenno luntano dê pale pe ccuje mancaje poco ca Avelàr(ro) nun ‘o futtesse cu ‘nu tiro dâ trecquarte! A ll’arranqua cercaje ‘e migliurà l’atalossa cumplessiva cu quacche asciuta bunarella quanno ‘o Cagliari attaccaje a capa sotta pe adderezzà ‘o fullé. ‘Ngenerale però ‘stu purtiere nun dà cchiú sicuranza (sicurezza)! GAMBERINI 6,5 Bella atalossa ‘e ll’ècchese viola ca riuscette a mettere ‘a musarola a ‘nu bbrutto accunto comme a cConti ca sulo ‘na vota fuje periculuso cu ‘nu tiro spuorco ca ascette fora ‘e poco. Cannavaro 6- ‘O miraculo, ‘o miraculo! Ajeressera fuje sempe priciso dint’ê clèseme (chiusure)nun cuncedenno niente a ll’avverzarie dirette, ma, ô ssolito, fuje ‘mpriciso ‘nfase ‘e repartita, quanno menaje ‘e ssolite vrecce ‘a luntano cunzignanno sistematicamente ‘a palla a ll’avverzarie! Britos 7 ‘Mbattibbile ‘e capa, duminaje ‘o juoco aerio risultanno funnamentale ô finale ‘e fullé quanno alluntanaje ògne pellícro (minaccia) ‘ncopp’ê ttante palle aute d’’e padrune ‘e casa. Sufferette ‘nu poco ‘nfase ‘e ‘mpustazzione, ma ‘nfase difenziva fuje ‘nu gialante, ‘na vera e ppropria trancara (muraglia), risulvenno ‘e capa paricchi situazzione periculose. MAGGIO 5 N’ata atalossa troppo scadente pe ll’esterno d’ ‘a nazziunale senza filtro ‘e Brandelli! Nun ‘o ricunosco cchiú! Fósse riuscito ‘na vota a sfunnà ‘ncopp’â curzia ‘e dritta e spisso se facette surprennere ‘a Avelàr(ro) ‘nfase difenziva. (dô 65° MESTO 6 Pe ggrazzia d’ ‘o Cielo riuscette sicuramente a ddà cchiú vivacezza ‘ncopp’â curzia e ccaranzia ‘nfase ‘e cupertura) BEHRAMI 6,5 ‘Nu cane ‘e presa fantastico!Tanta lotta annant’â difesa ‘nchietta ( in coppia) cu Inlèr(ro).Quacche vvota arresecaje quaccosa, soprattutto quanno pure trasenno ‘ncopp’ô pallone... chella fetenzia ‘eGiannoccaro, piglianno asso pe fijura, lle siscaje contro. DZEMAILI 5,5 Peccato! ‘Nu cartellino jalizzo pigliato ‘ngiustamente ô pprincipio d’ ‘o fullé ‘o cundizziunaje paricchio... Currette assaje, ma spisso a vvacante senza cuntrastà ll’avverzarie e ‘nfase ‘e ‘mpustazzione sbaglianno troppi bassurere (suggerimenti). (dô 68° VARGAS 6,5 Surpresa! ‘O guaglione riuscette a farese apprezzà; cu isso ‘ncampo ‘o Napule aizaje ll’upomollío (il baricentro) prupunennose cchiú annante senza farese cchiú scamazzà da ll’isulane. Riuscette pure a mmancà ‘e poco ‘na rredda cu ‘na capata!) Inler 7 ‘Nu granne jucatore! ‘Int’ô mumento cchiú difficile sagliette ‘ntusiello, se mettette cu ‘o cumanno riuscenno a alluntà ògne pellícro (minaccia), e risultanno funnamentale sia ‘nfase ‘e ‘nterdizzione ca ‘nfase ‘e repartita cu bassurere cratiste (ottimi suggerimenti). Zuniga 4 Arretistico (irritante) cu tutte chelli inutile garabbate soje! Nun riuscette maje a rennersi periculuso ‘nfase uffenziva e rummanette sempe vascio a gguardia d’ ‘a curzia ‘e mancina. Pe ffurtuna ca ‘na vota, trasenno dint’â camma, facette spaventà a Ekdàl(lo) ca tuccanno ‘a palla a gghí arreto ‘a cunzignaje a Marekiaro ca risulvette ‘o fullé! HAMSIK 7,5 Ma sulo pecché signaje ‘a rredda ca ce facette vèncere ‘o fullé!Ma pe troppu tiempo nun se vedette e nun se sentette giranno a vvacante, dint’â trecquarte napulitana senza riuscí maje a mmettere ‘mmuvimento a Insigne! ‘Lle mancaje ‘a cunzistenza ‘e metterese ‘a scuatra ‘ncopp’ê spalle, ma ‘mmancanza d’ ‘o Matadòr(ro) se cunfermaje dicisivo signanno ‘na rredda pesante assaje, ‘a sesta ‘ncampiunato, ‘na rredda ca ripurtaje ‘o Napule dint’ê quartine avete d’ ‘a classifica, addirittura ô siconno posto! Insigne 7 Fuje ll'unico a pruvarce. Durante ‘o primmo aione superaje diverzi vvote ll’avverzario diretto suĵo, ma tiraje fora e ppo fuje ‘o palo ca lle dicette ‘e no. Peccato pecché aveva fatto ‘nu bbellu tiro a ggirà! Miezu voto ‘e cchiú pecché dô piede suĵo partette ll’azziona ca, passanno pe Zuniga, purtaje â rredda ‘e Marekiaro. (da ll’83° DOSSENA sv) MAZZARRI 5,5 - Senza Campagnaro, Pandev e Cavani sbagliaje, accuntennose ‘e mettere ô pprincipio sulo a Insigne cu Marekiaro ‘e scorta e Dzemaili ‘mmediana.Avette però metterce ‘na pezza mannànno ‘ncampo a Vargàs(so) e pe furtuna nosta e ssoja ‘o guaglione nun sbracaje cunzentennoce cchiú presenza ‘nfase uffenziva. Nun me piacette ‘o fatto ca nun sustituette a zZuniga ca aizava porvera e soprattutto me fosse piaciuto ca avesse fatto debbuttà ‘mprimma scuatra a nNovotny primma ca ‘o guaglione fa ‘e ffelinie..., ma se sape ca Wallerettino Erode Mazzarri ‘e guagliune ll’accide dint’â connola. ‘O miezu voto ‘e cchiú ca ll’aggiu miso è pecché me piacette comme ‘o Napule affruntaje ‘o fullé cu curaggio e ccegna cu ttutto ‘e tante assenze ‘mpurtante. L’arbitro GIANNOCCARO 4,5 Scadente Comme a troppe culleche suĵe siscaje poco e a senzo unico contr’ê cuane, permettenno a ll’isulane ‘nu juoco viulento ca nun sanziunaje tanto ca ‘ntribbuna divano dicetteno:Chisto è n’arbitro ‘ngrese! mentre i’ affermaje: No chisto è strunzo! e nun me sbagliaje pecché â primma accasione s’ ‘a pigliaje ‘ngiustamente cu Dzemaili cu ‘nu cartellino jalizzo ca ‘o cundizziunaje dô pprincipio d’ ‘o fullé... Ma forze se sbagliaje pecché Dzemaili nun me pare ca fosse diffidato e pirciò nun vene squalificato p’ ‘o fullé cu ‘o Pescara!E fallette ‘a missione pecché penzo ca ‘o Palazzo ll’êva mannato p’accurtà ‘e passe d’ ‘e napulitane e si fósse stato pussibbile fà squalificà a quacche ghiucatore ‘mpurtante... E cu chesto ve saluto. Ce sentimmo, si dDi’ vo’, llunnerí ca vène. Staveti be’! R.Bracale Brak