NAPOLI - ROMA (09/03/14) 1 A 0 ‘A VEDETTE ACCUSSÍ

NAPOLI - ROMA (09/03/14) 1 A 0 ‘A VEDETTE ACCUSSÍ Tre ppunte beneritte ajeressera ô san Paolo, guagliú! Tre ppunte acchiappate p’’e capille a nnove minute d’’o prazzo doppo ‘nu fullé affannuso e de sufferenza contro a ‘na scuatra ca, arricurdannose d’’e ttre sfugliatelle avute cu ‘o fullé ‘e coppa itaglia, ajeressera scennette addirittura cu sette centrocampiste pe nun farce jucà e ppe pparicchio accussí fove e ‘o Napule sufferette assaje soprattutto pecché dn Rafele avette fà a mmeno ‘e Giorgigno e de Behrami e ppe gghionta ‘e ruotolo Dzemailí, Inlerro e soprattutto Marekiaro nun stetteno ‘e ggenio e ‘ntribbuna divano ggià quaccuno mazzecava malamente dicenno ca ‘o Napule nun êsse pututo vencere... e ‘mmece pe bbona sciorta ‘o fatto jette tutto ‘o ccuntrario e ‘o Napule riuscette a vvencere. Certo fósse stato meglio si ‘ avessemo vinciuto cchiú llargo ‘mmece ‘e ll’uno a zzero finale arrivato addirittura a ll’81°..., ma mo nun mettimmoce a ccercà ‘o pilo ‘int’a ll’uovo! Era ‘mpurtante véncere e sse vincette. ‘O riesto so’ puvisie e vvuommeche ‘e zetella! E nuje nun simmo nè ppuvete, nè zzetelle ca fanno vuommeche! Passammo ê ppaggelle: REINA 8 Dette sempe sicurezza ê suoje e allimmeno tre vvote salvaje ‘a porta cuana; durante ô primmo ajone fermaje ‘nu missile ‘a fora ‘e Bastòsso e ascette a mmestiere a sbruglià ‘na situazziona cchiudenno ‘o specchio a gGervigno; a ll’arrancua po s’allungaje bbuono ‘ncopp’a ‘nu tiro ‘e Maicònno, spurcato ‘a Inlèrro. MAGGIO 4,5 C’è ppoco ‘a fà! Chisto è arrivato ô desserto; nun ce ‘a fa cchiú! Ajere appressuraje poco e nniente senza maje riuscí a cupulià (dialogare) cu ‘e cumpagne.Sperammo ca torna Mesto o Zuzzú, ca chisto nun se po’ gguardà cchiú! FERNANDEZ 7,5 Chisto è gghiucatore!E ce steva chi ‘o vuleva jettà... Ajere fove addirittura ‘nu gialante (gigante)ca facette allimmeno tre ‘ntervente ‘mpurtante ‘ncuollo a gGervigno, pigliannose cchiú ‘e ‘na respunzabbilità quanno ‘e centrocampiste nuoste se jetteno annascunnenno! ALBIOL 7 Quacche sfregazzo (sbavatura), ma senza cunsequenzie, ma ô mumento d’’o finale travulgente, quanno ‘a Roma – cu ‘o sanco a ll’uocchie, cercaje ‘e ricuperà ‘o risultato, se scurciaje ‘e mmaneche e senza metterse a ffà ricame a ppuuntaggiorno fermaje tanti pallune periculuse alluntananno ògne pellicro (minaccia). GHOULAM 6,5 Sufferette a lèggere quacche suvrappusizzione e a ffrenà a mMaicon, ma ‘nfase ‘e disincantamiento (disimpegno) fove funnamentale cu ’a qualità d’’o pere mancino. Pennellaje ll’ajuda (l'assist) p’’a rredda d’’a nichessa (vittoria). INLER 5,5 Êsse avuto fà ‘e cchiú, ma ‘o cumpagno ‘e reparto nun ‘o dètte ‘na mana e sufferette assaje ‘a troppa ggente d’’o centrocampo rumanese. DZEMAILI 4,5 Brutta atalossa (prestazione)cunfusa e disurdinata d’’o svizzero mannato ‘ncampo ô posto ‘e Giorgigno ‘nfruvenzato. Sbagliaje tutto, perdenno troppi pallune e nun riuscenno maje a sustàtere (impostare) ll’azziona. (dô 61° HENRIQUE 6 Trasette subbeto ‘nfullé cu perzunalità e se pigliaje grossi respunzabbilità ‘nfase ‘e sustazziona (d'impostazione) assicuranno cchiú trancara (contenimento) ‘nnante â difesa) MERTENS 6,5 Ô primmo ajone perdette tanti pallune, cercanno ‘e fà scattà ‘a repartita (ripartenza). Avette pure ‘na palla bbona,ma se facette nchiudere ‘a Benassià. ‘Ncumpenso a ll’arrancua pe paricchiu tiempo fove ll’unico a ttentà quaccosa pe smantellà ‘a tràsera (retroguardia) rumanese. HAMSIK 4,5 Jurnata no ‘e Marekiaro ancòra troppo luntano da ‘o jucatore ca ce servesse. S’avasciaje spisso pe ddà ‘na mana ô centrocampo, ma ‘nfase ‘e repartita lle mancaje sempe ‘o muvimento e ‘o purzo (tocco) justo. (dô 73° INSIGNE 6 Trasette cu ‘a scuatra ca ghiucava quase sempe a ddritta e carativamente (con genersità) se sacrificaje dubblanno (raddoppiando) ‘ncuollo a mMaicònno e ddettanno cchiú ‘e ‘na repartita (ripartenza)). CALLEJÒN 7 - Sulo a ll’81° se facette perdunà n’atalossa (prestazione)poco ‘ntusiasmante, signanno ‘na rredda pesante assaje. E ppenzà ca avesse pututo signarne n’ati ddoje, ma De Sanctísso nun ce ‘o permettette. Chello ca conta fove ca ce rijalaje ‘e tre ppunte purtannose â casa ‘a quinnicesima rredda cumplessiva d’’a tempurata(stagione). (da ll’84° PANDEV sv) HIGUAIN 6 ‘A chiena e ‘a vacante; durante ô primmo ajone jucaje p’’a scuatra, comme riggista avanzato e ppure nun avenno pallune adatte cercaje ‘e ripetere ‘a rredda fatta cu ‘o Swansea, ma ‘a palla s’ aizaje; a ll’arrancua se ne scennette ‘e posa nun truvanno cchiú spazzio. BENITEZ 6 Chi vence ave raggione e don Rafele avette raggiona! Custretto a ffà a mmeno ‘e Giorgigno e de Behrami, ‘a scuatra nun dètte ‘o spettaculo ch’uno s’aspettava. A cumplicà ‘e ccose ce se mettetteno ll’atalosse scarze ‘e Dzemailí, ‘e Inlèrro e de Marekiaro ca custringetteno a don Rafele a levà ‘o svizzero e a mmettere a Henrique p’avé cchiú qualità e perzunalità cercanno ‘e truvà quacche chesema (varco) e ffà ggirà ‘o pallone cosa difficile contro a ‘na scuatra scesa ‘ncampo addirittura cu sette centrocampiste. Sinanparco (Comunque) ‘o Napule vincette, cu ‘o core, sapenno suffrí e aspettà ‘o mumento uppurtuno pe cculpí. E cchesto è cchello ca conta! ll’arbitro ROCCHI 5,5 M’aspettavo ‘e peggio ‘a ‘sta meza cazetta fiurentina ca p’’o ppassato ce facette cchiú ‘e ‘na fetenzia..., ma ajeressera s’ammesuraje ‘a palla e nun se macchiaje ‘e ggrossi ppurcarie si nun cuntammo ‘o fatto ca sparagnaje ‘o siconno cartellino jalizzo a Maicònno e uno russo a Taddei ca cauciaje ‘nculo a ‘nu cuano senza ca ll’arbitro dicesse niente! E ccu cchesto ve saluto. E si vo’ dDio ce sentimmo doppo d’’a traferta contr’ô Porto p’’o fullé d’ E.L. Staveti bbe’! R Bracale Brak