PORTO-NAPOLI (13.03.14E.L.) 1 A 0 ‘A VEDETTE ACCUSSÍ

PORTO-NAPOLI (13.03.14E.L.) 1 A 0 ‘A VEDETTE ACCUSSÍ Nun ce ‘o mmeretajemo, ma ajeressera, mmerze ê ssette ‘o perdettemo ‘o fullé d’annata ‘e ll’ottave ‘e finale d’ E.L.; ‘o Napule cadette a Oporto (1-0) ma penzo ca è ancòra ‘ncorza p’ ‘e quarte ‘e finale e ttutto se decide ‘nfra sette juorne ô san Paolo comme ggià aveva ditto â viggilia don Rafele,quase ll’avesse saputo ca ajeressera fósse fenuta pe uno a zzero pe lloro...., ‘nu risultato scamuso (infido) ca è ppericuluso pe ttutt’’e ddoje scuatre, ma corna facenno se po’ caputià ô ritorno. Fullé streuzo chillo d’ajere cu ‘nu Porto ca signaje ‘a rredda soja cu Jacksònno Martinèzzo dint’ô mumento cchiú mmeglio d’’e cuane ciovè súbbeto doppo n’attacco a ccapa sotta ‘e ll’uommene ‘nmaglia uovo-sbattuto ô pprincipio ‘e ll’arrancua quanno ‘into a ddiece minute venetteno sciupate tre retissante (clamorose) accasione pe ppassà ‘nvantaggio.P’’a verità s’à dda dicere ca ô Porto ô primmo ajone fove annullata ‘na rredda ‘e Carlòsso Eduardo, pe úrzo’e cóse (fuorigioco) ca pe mme nun ce steva, senza scurdarce po ca a ppochi minute dô prazzo (dal termine) Quintero cugliette ‘nu palo ‘nterno. Tutto summato se po’ ddicere ca dint’ â primma parte d’’o fullé’a sufferenzia d’‘e cuane fove cchiú grossa, ma po passanno ‘e minute ‘a scuadra ‘e don Rafele riuscette a ttruvà ‘a mesura ‘e ll’avverzarie, Marekiaro accumminciaje a gghiucà e ‘o Napule mettette ‘a capa fora crianno quacche preoccupazziona â trraséra (difesa) purtuchese; a ll’arrancua po succedettre chello ch’aggiu ditto e ‘o Napule avette ‘o ttuorto ‘e nun riuscí a cuncretizzà ’e ttre accasione avute e ssuccedette ‘o llutto pe nn’antica legge d’’o pallone: rredda sbagliata, rredda ‘ncassata... e accussí fove cu ‘o vantaggio d’’o Porto.’A risposta d’’e cuane nun fove tosta, pronta e ddicisa e fenette ca ce ne turnajemo cu ‘na vranca ‘e mosche ‘mmano: uno a zzero! Ma è ‘nu risultato ca se po’ caputià ‘nfra sette juorne ô san Paolo. Allimmeno accussí spero, corna facenno! Passammo ê ppaggelle: REINA 7,5 ‘Nu miraculo chillo ‘ncopp’ô tiro a bbotta sicura ‘e Jacksònno Martinèzzo.Cuncedette ‘o bbisso a ll’arrancua (ripresa) ‘ncopp’a fFernando, ma nun putette fà niente dint’ô bburdello ca purtaje ‘a rredda ‘e Martinèzzo... REVEILLERE 5 Êsse pututo fà ‘e cchiú e nun ‘o ffacette e soprattutto lassaje sulo a Martinèzzo ‘nnaccasione d’’a rredda. ALBIOL 5,5 ‘Nu sfregazzo (sbavatura) periculuso durante ô primmo ajone e Reina ce avette ‘a mettere ‘na pezza; avette ‘na granna accasione a ll’arrancua , ma ‘a cabbesera (colpo di testa) soja fove fraggile (debole) e ccentrale.Ô finale troppi lanze fora mesura. BRITOS 5,5 Alternaje bboni cchiusure ‘ncuollo a Martinèzzo a ffalte (falli) inutile ca facetteno saglí ‘o Porto sempe periculuso; mantenette ‘nghiuco a Carlòsso Eduardo ‘ncopp’â rredda ‘ngiustamente annullata ô Porto e ‘a terra rinviaje ‘ncuollo a qQuintero ca cugliette ‘o palo. GHOULAM 5,5 – Miezu punto mancante p’’a respinta corta ‘e capa ca rijalaje ‘o pallone d’’a rredda purtuchesa a Martinèzzo,ma – p’’o riesto - fove sempe presente ‘ncopp’â curzia ‘e mancina cu ‘a qualità ssoja. BEHRAMI 5,5 Miezu punto mancante pure a isso pecché si ‘nfase ‘e trancara (interdizione) fove sempe attiento e ppulito ‘ncopp’ô pallone, ‘nfase prupusitiva lassaje a ddesiderà quanno ‘o Porto nchiudette ògne chesema (varco) e isso êtte ‘a custruí e sbagliaje cchiú ‘e ‘nu pasiglio (passaggio). HENRIQUE 6 Nun fove ‘nu fullé facile p’’o bbrasiliano ca però se dette da fà cu ccegna (impegno) e ‘mpreja (esperienza) jucanno urdinato e senza maje perdere ‘a calma, guvernanno a mmestiere ‘o pallone e prucurannose cazzemmusamente diversi punizzione ncama (in zona) d'attacco. INSIGNE 5 Poca rrobba! Sulo quacche strifo (guizzo) dint’ô stritto ô finale, ma pe quase n’ora aizaje porvera senza maje cuncretizzà. Hamsik 4,5 Âmmo ancòra aspettà ca turnasse a essere isso!Pe troppu tiempo fove assente ‘ngiustificato e quanno [troppo tarde!]accumminciaje a gghiucà, tentanno quacche lanzo, purtaje â casa poco e nniente currenno poco e spisso a vvacante; pe gghionta ‘e ruotolo se truvaje,‘nnaccasione d’’a rredda purtuchesa, ‘ncopp’â linia ‘e porta, azzeccato ô palo ‘e mancina e se facette passà ‘o pallone ‘mmiez’ê piere senza riuscirlo a ffermà! (dô 74° MERTENS 6 Pure quanno ‘o Porto se difennette nchiudenno ògne chesema isso riuscette a criarse ‘o ppoco ‘e spazzio. Aggio ‘a ‘mpressione ca ‘o Napule nun ne po’ ffà a mmeno!) CALLEJÒN 6,5 – Durante ô primmo ajone fove ‘o cchiú ppriciso ‘nfase ‘e repartita (ripartenza). Currette assaje pe ddà ‘na mana a rReveiglié ‘ncopp’â dritta. Lucente a ttrià (smistare) ‘nu bbellu pallone ô Pipita ca chiammaje ô purtiere Heltònno a ffà ‘o miraculo e ffove sfurtunato quanno mancaje ‘e devià ‘mporta ‘na cunchiusione ‘e ll’argentino.(dô 79° PANDEV 6 Facette chello ca puteva fà e servette a mmatarazzo Zapata ‘o pallone ch’êsse pututo essere chillo d’’o pareggio). HIGUAIN 6- Sfurtunato, chillu mazzuso d’Heltònno lle dicette ‘e no cu ‘o tacco. ‘E classe mettette cu ‘o culo ‘nterra a mMaicon, ma nun truvaje ‘a rredda proprio poco primma d’’o vantaggio d’’o Porto (da ll’ 83° ZAPATA 4,5 Accussí comme succedette a lLivorno avette ll’urdema palla bbona pe ssalvà ‘e suoje, ma [ancòra!] ll’ascette ‘nu tiro spuorco; matarazzo braduso (lento) e mbranato poco primma nun riuscette a arrivà ‘ncopp’a ‘na palla còmmeta ‘a mettere ‘mporta!) BENITEZ 5,5 Difficile metterse a discutere ‘e sciuà (scelte) ‘e don Rafele, pecché ‘a prova difenziva d’’o Napule concedette ô Porto sustanzialmente sulo ‘na grossa accasione cu Martinèzzo,doppo ‘nu sfregazzo d’ Albiòllo,e ‘a rredda a ll’arrancua (pe ‘na respinta corta ‘e Gulamma) arrivaje proprio quanno ‘o Napule pareva padrone d’’o campo e aveva sprecato allimmeno tre accasioni retissante(clamorose). ‘O prublema fove ca, jute ‘nsotto, ‘o centrocampo nun tenette ‘a forza pe ttruvà chéseme (varchi) dint’â trasera purtuchesa e nun ce stette chi tirasse ‘a luntano. Nun me convincette nè ‘a sustituzzione ‘e Cagliecònno, nfi’ a cchillu mumento prubbabilmente ‘o meglio, nè chella ritardata ‘e Marekiaro ca nun è ancòra isso e sperammo ca se decide a tturnà ampressa a esserlo! arbitro: KRALOVEC (Repubblica ceca) 4,5 Chisto è miezo scemo! Annullaje ô Porto ‘na rredda regulare e cincher o seje vote nun applicaje ‘a revula d’’o vantaggio fermanno ‘o Napule! E cu chesto ve saluto e ve dongo appuntamento, si dDi’ vo’,â prossima vota. Staveti bbe’! R.Bracale Brak