CAGLIARI – NAPOLI (19.04.15 – 0 A 3! ‘A VEDETTE ACCUSS

CAGLIARI – NAPOLI (19.04.15 – 0 A 3! ‘A VEDETTE ACCUSSÍ Che suddisfazziona guagliú! Ajere, a ll’ ora d’’e ppastarelle ‘ncapo ‘e n’ antraffa (partita) senza storia, ca nun fove bbella, ma ‘mpurtante e sustanziosa ‘o Napule finalmente riuscette a apprufittà dô sciuliamazzo pigliato dâ scuatra d’’o pappavallo ‘e lotito e d’ ‘o miezu passo favezo d’’a scuatra ‘e monziú garsià e accurciaje a ccinche punte ‘a diàstema (distanza) dô siconno posto ‘ncrassifica e cunfermannose p’’o mumento ô quarto cu bboni speranze ‘e puté migliurà. E ttutto chesto pecché, pe ggrazzia d’’o Cielo, ‘e cuane - da Dela a ll’urdemu sciacquino - s’erano jucate tutte quante ‘mparanza ‘o doje e nno ll’icchese o addirittura ll’uno... i ‘o doje ascette senza surprese e cu cchella d’ajere, tra campiunato e E.L., foveno tre ll’antraffe vinciute larghe dê cuane, ajere finalmente cu ‘a vera maglia luvarda (azzurra). Che suddisfazziona guagliú! E mmo nun mettimmo òrie (limiti) â Pruvverenzia! Passammo ê ppaggelle: ANDUJAR 6,5 – Quacche utranza (eccesso) ‘e cunfianza (confidenza) e nu paro ‘e sfregazze (sbavature) ascenno, ma pure ‘nu paro d’ angriffe (interventi) nuttíche (provvidenziali) quanno ancòra nun se sapeva ll’antraffa (partita) qua’ fine êsse fatto. MAGGIO 5,5 Miezu punto mancante pecché nun s’accurgette súbbeto d’essere stato pigliato ‘e mira da ll’arbitro Valeri( po ve dico)ca ‘o bberzagliaje cuntinuamente, e lle cunzignaje ‘nu primmo cartellino jalizzo (giallo) ca nun se mmeretaje e ca ‘o cundizziunaje pe tutt’ ‘o fullé (match). Ll’arbitro po mettette ‘a coppa e ô 65° ‘o jettaje fora cunzignannòle ‘o siconno cartellino jalizzo (giallo) pe ‘nu nurmale cuntatto, ma ca fove cunziderato pruibbito! ALBIOL 6 Nun trabballaje maje(mettennoce sempe ‘a pezza justa) manco quanno ‘o puntajeno ‘ntassezza (in velocità) KOULIBALY 6,5 Essusiuso (autoritario) partette malamente cu ‘na fessaria ca lle custaje ‘nu cartellino jalizzo (giallo) pe n’angriffo pruibbito (intervento falloso) ‘ncuollo a dDessena. Ma po ‘a chillu mumento a gghí ‘nnante nun sbagliaje cchiú nniente! STRINIC 6 Bella atalossa (prestazione) d’’o cruato ca se ‘ntennette bbuono cu Insigne. GARGANO 6,5 ’O solito cane ‘e presa d’’o centrocampo luvardo (azzurro) ca se cunfermaje a ll’epípete (livelli) aute d’’o fullé (gara) casalinco cu ‘a Fiorentina. JORGINHO 6,5 Finalmente dimustraje chello ca sape fà: palle ricuperate e ppasiglie (passaggi) pricisi. Veramente una d’’e mmeglie recite d’’o bbrasiliano. CALLEJON 7,5 Tre mmise ‘e diuno (astinenza) e ccuollo luongo, po doppo d’ ‘o stuco â Fiorentina, chillo d’ajere ô sant’Elia ce cunfermaje ca Peppe ‘a ‘nguenta sta turnanno a ll’epípete (livelli) suoje e ca don Rafele tène ‘na carta sicura ‘a puterese jucà! (Dô 69° MESTO 6 Trasette a ddà ‘na mana quanno ll’arbitro rumnano custringette ‘o Napule a rummané ‘ndiece.) HAMSIK 7,5 – Marekiaro turnaje a dettà legge: ajuda (assist) a zzuco ‘e caramella pe Cagliecònnno e ccruzzo ca spaventaje a bBalzano custringennolo all’iggentura (autorete); p’’o riesto ‘o capitano cuano (azzurro) ggiustraje cu nnaturalezza e applombo (disinvoltura)’ncopp’â trecquarte ‘ntennennosela a mmaraviglia cu ll’avante cuane. ( Dô 56° GABBIADINI 6,5 Trasette e facette rummané ‘e stucco a Brkiccio facennole assaggià, cu ‘nu tiro a ggiro putente e ppriciso, chello ca sape fà cu cchillu pere mancino ca ‘nnairopa teneno poche!) INSIGNE 7 Turnato titolare doppo cinche mise, Lorenzigno giucaje comme si maje êsse suppurtato chillu ‘mpiccio ô denucchio, dimustranno d’essere ‘na spina dint’ô scianco d’’o Cagliari, esatttamente cunnesso dint’ ô furcone (tridente) ê spalle d’’o Pipita. HIGUAIN 6,5 Nun signaje , ma ô ssolito fove pulitelico (prezioso) p’’o sviluppo ‘e ll'azzione avasciannose pe ghiucà pallune ‘e qualità e astipannose ‘e stuche (reti)p’’e sserate ‘e Coppa se rennette utile luttanno comme a ‘nu lione, e ascenno cu ‘a maglia stracciata ‘ncuollo a ddimustrazzione ‘e quanto se fósse ‘mpignato; cu ‘o muvimento suojo facette spazzio a Cagliecònnno ‘ncopp’ô primmo stuco (gol) e ssuĵo fove ‘o bbassurero (suggerimento) a gGabbiadini ‘ncopp’ô terzo. ( Dô 62° ZAPATA 6 Tentaje quacche attacco pe ddimustrà d’attraverzà ‘nu bbuono mumento.) All. BENITEZ 7 Sempe accussí! ‘Nu Napule urdinato e ddeciso a vvencere s’accuntentaje ‘e nun correre tanto, ma ll’avastaje pe ccunzignà tre sfugliatelle a ll’isulane e accurcià ‘a diàstema (distanza) dô siconno posto ‘ncrassifica. arbitro VALERI 4,5 Nun me piacette, nè isso nè ‘e cullabburatore suĵe!Niente ‘e particulare,ma nun le perdono ca ‘stu libbero prufessiunista (ma nun se sape ‘e che...) rumano siscaje sempe, pe partito pigliato, contro ô Napule caputianno ‘e ffalte (i falli), vedenno angriffe (interventi) pruibbite d’’e cuane, ca custajeno ‘o rrusso a mMaggio e sparagnaje cchiú ‘e nu cartellino jalizzo a ll’isulane. Ma sinamparco (comunque) facette palla corta pecché ‘o Napule vincette ô stesso schiattanno ‘ncuorpo a ttutte quante. ‘Ncuncrusione ‘o Napule dimustraje ‘e stà ‘ncriscenza jenno a vvencere ‘ncopp’ô campo scamuso; a‘stu punto ‘e nummere dànno raggione â scuatra cuana ca cu ‘e tre ppunte d’ajere – comme aggiu ditto – se piazza ‘nsulitario ô quarto posto ‘ncrassifica cu ‘a pruspettiva ‘e puté arrivà pure ô siconno.Ce sta proprio ‘a magnarese ‘e mmane p’’e punte sprecate ‘mpricedenza e ghiastemmà – ancòra ‘na vota – tutt’ ‘e ppastette fatte cca e lla p’’e sorde ca pure ‘e cuane (azzurri) da dela a ll’urdemu sciacquino s’ànnu jucato! E cu cchesto ve saluto e si ‘o Signore ‘o vvo’ ce sentimmo â prossima vota, ca mo nun saccio ‘e priciso quann’è e contro a cchi. Staveti bbe’! R.Bracale Brak