CATANIA – NAPOLI 29/10/11 (2 A 1)LL’AGGIU VISTA ACCUSSÍ

CATANIA – NAPOLI 29/10/11 (2 A 1)
LL’AGGIU VISTA ACCUSSÍ

E stammo â terza delusione guagliú; ce simmo ‘ntussecato n’atu sàpato a nnotte! Me dispiace d’ ‘o ddicere ma proprio nun ce simmo: ‘sta cazza ‘e fissazzione ca tene Mazzarri cu ‘o turnover(ro) proprio nun se ne scenne; pussibbile ca proprio nun le trase dint’ê cchiocche ca ‘o Napule nun tène riserve a ll’aldezza d’ ‘e titulare? Pussibile ca s’ànn’ ‘a fà ddoje cumpetizzione ‘mpurtante comme campiunato e ciampionsa senza tené ‘e sostitute decenti per ttre ghiucature fundamentali: Cavani, Inler e Campagnaro? Turnammo â partita d’ajere: fuje proprio ‘ndispenzabbile ‘o turnover(ro)? Nun fósse stato meglio puntà a vvencere ‘a partita restanno dint’â stèla (nella scia) d’ ‘o vertice allimmeno nfi’ ô scontro ‘e dummeneca ca vène cu ‘a zoccola janca e nnera (juventus)? Quaccuno me po’ vení a ddicere ca Mazzarri giustamente penzaje â partita ‘e ciampionsa ‘e miercurí a vvení, ma i’ penzo ca si a Mmonaco avessemo pigliato ‘na mazzata pesante, ma comunque jucannosela cu ddignità, nisciuno se fósse sunnato ‘e mettere ‘ncroce a Mmazzarri!.. Voglio dicere ca se po’ tranquillamente perdere ‘na partita d’ ‘o ggirone pure pecché me pare e penzo ‘e nun sbagliarme ca nun simmo attrezzate p’ arrivà chi sa’ quanto luntano! Avesse capito, ma maje giustificato ‘a formazione d’ ajere a ssera si ‘a partita ‘e coppa ‘a jucà fósse stata chella contro ô City, ‘n casa e â purtata nosta , o contro ô Villareal ca è tutto summato d’ ‘o stesso livello nuosto. Pe ‘na scunfitta a Mnonaco nisciunu tifoso se fósse asquitato (indignato). A chisto punto, nun me dicite niente ma nun veco ll’ora ‘e ascí dâ Ciampionsa pe tturà a gghiucà bbuono e a vvencere ‘ncampiunato. Pe ddirla tutta, ajere a ssera m’asquitaje assaje vedenno ‘e scennere ‘ncampo dô primmo minuto a Santana ô posto ‘e Marekiaro e cchiú assaje ancòra m’asquitaje quanno vedette ca Mazzarri, doppo d’ ‘o primmo cartellino jalizzo ca Santana s’abbuscaje, nun ‘o sostituette súbbeto e ‘o facette cuntinuà a gghiucà cu ‘o risultato ca sapimmo... Passammo ê ppaggelle va’!
DE SANCTIS 5,5 - Nisciuna corpa p’ ‘a primma redda, ma ‘ncopp’â siconna avesse pututo ascí... ‘Mmiez’ê pale dètte caranzia!
FIDELEFF 5,5 –P’ ‘o tiempo ca stette ‘ncampo nun facette granni ccose, ma manco guaje; forze nun è ‘nu campione, ma ‘e capa se fa sempe valé.
(dô 58', MAGGIO 5,5 Ll’êsse vuluto fà, ma nun fuje serata; sfurtunato se travestette ‘a difenzore agggiuntato d’ ‘o Catania ô mumento d’ ‘a cranne uccasiona capitata a Dzemaili.)
CANNAVARO 5,5 – Facette ‘o pussibbile contro ê pponte catanese, ma ‘ncopp’â primma redda s’addurmette cu ‘a zizza ‘mmocca e détte via libbera a Marchesi ca aspettaje ‘o Napule pe ssignà ‘a primma redda ‘ncampiunato. .
FERNANDEZ 5,5 – Assaje meglio cu ‘a difesa a cquatto (tutte ‘o ssanno ch’ è ‘nu centrale difenzivo all’antica),peccato ca ‘ncopp’â siconna redda se perdette a Berghessio.
ZUNIGA 5 – Affannaje ‘ncuntinuazzione pe ttutta ‘a partita. Sulo ‘nu paro ‘e jucate ‘ntelliggente; p’ ‘o riesto tutto fummo e nniente arrusto!
INLER 5,5 – ‘Nrecressione rispetto â partita cu ll’Udinese
SANTANA 4 – Facette pure ‘nu pare ‘e cose ‘nteressante, po smarrunaje malamente e s’abbuscaje ‘ngenuamente dduje cartelline jalizze. Nun po’ gghiucà a mmità ccampo... Sperimento falluto.
DOSSENA 5,5 ‘A fora d’ ‘a bbella ajuda ô pprincipio, quase nient’ ato; sparette troppo ampressa.
(dô 67', HASMSIK 5,5 – Trasette troppo tarde e nun riuscette a cumbinà niente).
MASCARA 5,5 - L'azzione d’ ‘o vantaggio napulitano fuje pure merito suĵo; po’, male assistito, sparette dâ partita...
( dô 49°DZEMAILI 5,5 - Pe sfurtuna e ‘mprecisione fallette ‘a redda d’ ‘o pareggio. Ajere avesse avuto jucà titulare).
LAVEZZI 5 – Poco o niente ‘ncisivo, poco o niente cuncreto, ce pruvaje assaje poco. Avesse pututo pure tirà ô mumento ‘e ll’urdema uccasiona sull'ultima occasione d’ ‘a partita, ma ll'ajuda pe Dzemaili era stata ‘ntelliggente.
CAVANI 6,5 – Redda sudàjena (repentina) ca servette a ppoco p’ ‘o risultato finale, ma ‘mpurtante p’ ‘o murale d’ ‘o guaglione; Mazzarri però ll’avesse fà capí ca ‘a posizziona soja è cchella ‘e primma ponta centrale e ca nun s’êss’ ‘a spumpà tanto a ccorrere pe ttutt’ ‘o campo!


All. MAZZARRI 4,5 - Partita assurda,ca nun sta ‘ncielo, nè ‘nterra e ppure sfurtunata. Aunestamente scegliere ‘e fà fà a Santana ‘o centrocampista centrale è stata cumpletamente sbagliata comme è stato ‘nfelice ‘a decisione ‘e tenerlo ‘ncampo doppo ca s’era abbuscato ‘o primmo cartellino jalizzo. Dzemaili avesse avuto partí isso titolare. Fà ‘o chiagnazzaro cu ‘e dichiarazzioni d’ ‘o post-partita è sballato e nun serve proprio a ‘stu mumento. N’ata enorme fessaria chella ‘e nun servirse ‘e Campagnaro ca serve ‘ndifesa e ‘mmiez’ ô campo!
l’arbitro CELI 5 Troppo pignuolo e punto e virgula, s’êsse pututo pure sparagnà ‘e duje cartelline jalizze (specie ‘o siconno!) a Ssantana ca nun êv’acciso a nnisciuno!
Ce sentimmo. Staveti bbe’!
R.Bracale Brak