‘NA VECCHIA STORIA

‘NA VECCHIA STORIA A ccomme stanno ‘e ccose, me pare proprio ca è ‘o mumento ‘e parlà chiaro e nun farese speggiseme (illusioni):visto ca ‘o scutetto è oramaje assignato e ca nun simmo state crestiane ‘e mantènere allimmeno ‘o siconno posto ca prubbabbilmente nun putimmo afferrà cchiú visto ca ‘a varda (la rosa) ‘e ll'Inter(re) è mmeglia d’ ‘a nosta e de quacche ata scuatra, nun ce rummane ca luttà p’ ‘o terzo posto cu ‘a Lazzio, Roma, Fiorentina e forze pure Parma... Mo però pure pe chistu ubbiettivo lassisto (minimo) d’ ‘o terzo posto ‘a varda nosta nun ‘a veco a ll’aldezza! Serve comme ô ppane n’esterno ‘e mancina ô posto ‘e Dossena ch’è n’ecchese jucatore [e i’ facesse turnà súbbeto a vVitale, ca nun saccio pecché s’ ‘o so’ levato...], serve ‘nu centrale ‘e sperienza ô posto ‘e culo’e-chiummo o d’Aronica[e i’ me pigliasse a lLucio ca nn’ à avuto ancòra ‘o tiempo ‘e ‘nquacchiarese de sossazza juventina... ] serve pure n’atu jucatore ‘e centrocampo ca putesse fà risciatà a bBehrami visto ca pure Donadel(lo) é n’ecchese jucatore e ca Dzemaili é un vice-Marechiaro e nno ‘nu mediano ‘e cuntenimento e vvisto ca chillu guaglione marrucchino El-Kommecacchio- se-chiamm’isso è n’uggetto misteriuso e cchello rummane... e ppo soprattutto, visto ca Wallerettino Erode Mazzarri nun crede a nNovotny, servono dduje attaccante e cioè ‘nu vice-Cavani[e i’ penzo putesse essere Mario Gomez d’ ‘o Monaco e nno Floccari (ch’è passato ‘e cuttura e ppo è n’ecchese atalantese, ca pure si à fatto ‘o ppoco ‘e quarantena cu ‘a Lazzio, è ssempe ‘nu miezo spetaccuso(lebbroso)’e sossazza juventina visto ca ll’Atalanta è ‘na scuatra travante d’ ‘a rubbentus(sa) e nun me venite a ddicere ca costa assaje, pecché ce âmm’ ‘a mettere ‘ncapo ca dicette ‘o si’ prevete â sié badessa, senza denare nun se cantano messe!) e nnè Bianchi (ca ce venesse cu ‘e stentine ‘mbraccia) e nettampoco Acquafresca (ca avasta ‘o nomme pe ddicere ‘e che panne veste!) ], e uno pe ffà arrepusà a pPandev(vo) aspettanno ca torna ‘nforma[ma francamente nun saccio chi putess’essere...]. Vargas(so) po s’à dda cedere assulutamente visto ca nun è bbuono nè ppe frijere, nè p’arrostere e ffuje ‘na granna amàrtema (un errore grave) accattarlo). Ma ‘o prubblema cchiú ggruosso rummane ústoso (tuttavia) chillo ‘e ll’ubbiettivi d’ ‘a suggità. Si pure arrivassemo ‘nCiampionsa, cu ‘e ccampagne d’accattà e vvennere ‘e jucature a ddoje/tre stelle e nno a cinche stelle, comme ce stanno abbituanno De Chiacchiaroniis, Biguncino e Wallerettino Erode Mazzarri nun ghiessemo luntano ll’anno ca vene.Ce truvassemo a ffà ‘e cunte cu ‘a solita varda qualitativamente anaparca (insufficiente), cu ‘o solito busillisso (dilemma) si penzà â Ciampionsa o ô Campiunato pecché nun se riuscesse a ffà fronte a ttutte e ddoje cose cu gghiucature cchiú vviecchie ‘e n’ato anno! ‘Nzomma ‘na vecchia storia!Ca fóss’ora ‘e nun leggere cchiú! R.Bracale Brak