GRANADA – NAPOLI [E.L.18.2.21] 2 A 0 ‘A VEDETTE ACCUSSÍ

GRANADA – NAPOLI [E.L.18.2.21] 2 A 0

‘A VEDETTE ACCUSSÍ

E cche ne parlammo a ffà, guagliú? Cca ce dice malamente i ‘o fatto è scuro, anze è nniro! Ajeressera ‘o Ciuccio jette a Granada p’’a cuppetta aiurupea e ll’addabba (andata) d’’o sibbacco (match) se cunchiudette cu ll’arnassa (vittoria) d’’e lucale pe ddoje a zzero i â bbanda ‘e Martinez(ze) avastajeno tre minute [da ‘o 19’ a ‘o 21’ pe ce sciaccà e ppe mmettere ‘na seria iputeca ‘ncpp’ô passaggio ‘e turno. E ggià guagliú pecché [nun ce pigliammo p’’o prozo…] ànno voglia ‘e dicere ca ‘o prubblema d’’o Napule è ‘a mancanza ‘e ‘na ficra (idea) ‘e juoco…. Po’ essere pure overo, ma âmm’’a ricunoscere ca nun se po’ frijere ‘o pesce cu ll’acqua e ajere a nnujaute mancajeno ‘a bbellezza ‘e nove jucature[Pastacrisciuta,Chitelassa, ‘O Ggialante, Ghoulam(me), Mezacucchiara, Demme, Lozano,Ciruzzo e Ppetagna)  e ffove quase naturale ca ‘nu Napule stracquo e ssignato da tanti ‘mpicce e additte (infortuni) nce refunnesse ‘e ppenne, pure pecché ‘e nuoste annante nun riuscetteno a ffravecà n’azziona decente, né a ttruvà maje ‘a porta, mentre arreto asasa (soprattutto) Di Lorenzo [4 e ppo ve dico]se nzallanette e llassaje strata libbera e franca a cchille ca futtetteno ô Lungagnone [ca pe pparta soja tenette ll’itimme (colpe) soje. Diciteme mo vuje si ‘e ccose nunn’êveno ‘a jí cumme jetteno… Certo êssemo allimmeno signata n’addaffa (rete) se puteva sperà ca ggioverí ca vene ô Maradona n’êssemo pututo caccià coccosa ‘e bbuono, ma a ccumme stanno ‘e ccose, si nun succede ‘nu miraculo, gioverí ca vene ll’ejudo (ritorno) nun ce serve a ‘nu saciccio e pputimmo penzà sulo ô campiunato!

Passammo ê ppaggelle:

 MERET[‘O Lungagnone] 5,5: è overo ca ô 90’ cu ‘na bbella parata salvaje ‘o doje a zzero scanzannoce ‘o scuorno d’abbuscà pe ttre a zzero, ma tenette ‘ncopp’â cuscienza ‘o doje a zzero quanno se menaje ‘nterra ‘ncopp’â catàra (diagonale) ‘e Kenedy, troppo tarde, quse quanno ‘o pallone era ggià trasuto! E cche saciccio!

 DI LORENZO 4:Tutte e ddoje ll’addaffe (reti) d’’e lucale nascetteno da ll’uommene suoje ch’isso nun cuntrullaje. Pe ffurtuna se repigliaje a ll’arrancua (nella ripresa). Troppo tarde.

 

 RRAHMANI 6: Nun tenette itimme (colpe)’ncopp’ê stuche (sui gol) e mmettette ‘a musarola a Mmolina.

 

 MAKSIMOVIC[‘O Ntontero] 5,5:Nun dette ammanne  (sicurezze) â sezziona (al reparto) e ffove poco urdinato; ‘e bbuono ‘na chiusura ‘ncuollo a  Puertas(se).

 

 RUI 5,5: ‘A chiena i ‘a vacante:quacche llanzo ‘e qualità, ma arreto jette spisso dint’ê chiavette. f

 

 LOBOTKA 5,5: priciso, ma senza zurea   (ritmo) nun riuscette maje a ddà cagno ‘e passo â scuatra.

[Dô 64'  BAKAYOKO[‘O Mammone] 5: Inutile.]

 

 ELMAS[‘O Turco] 5: ‘Mpratteca nun se vedette e sbagliaje troppi ppalle facile facile.

 

 POLITANO 5: Sulo quarantacinche minute  cu ppochi ficre (idee) pure quanne’a scuatra costruette juoco e nnun riuscette maje a sse ‘nfilà dint’â trasera (difesa) d’’e lucale. Sustituito ô 46’.

 

[Dô 46'  ZIELINSKI 6: Carimmo (generoso) pruvaje a signà da fora, menannose ‘ncopp’a ògne pallone, peccato ca nun truvaje maje ‘a porta.

 

 INSIGNE 5,5: Nun fove ‘na bbona serata: ‘mpriciso ‘ncopp’ê tire piazzate e pp’’o riesto cumbinaje assaje poco pure pecché fove cundizziunato da quacche prubblema  adilaro (muscolare).

 

 RUIZ 6: Prerecaje ô viento: tanta corza e ttanti fficre  idee ca nun riuscette a rializzà. Peccato.

 

 

 OSIMHEN[Caromecosta] 4,5: Nun ce simmo; zampettaje lla ‘nnante senza zurea (ritmo) e pricisione e spisso ‘mmece d’ajutà, ustaculaje ê cumpagne.

 

all.  GATTUSO 5,5: Êtte ‘a frijere ‘o pesce cu ll’acqua e s’êtt’ ârrangià cu cchellu ppoco ca tenette a ddispusizziona… Certo ca ‘o Napule visto a  Granada fove ‘nzipeto e ssenza zuco.

Arb. KARASEV 5,5 Ucummo (arbitro) casalinco nutizziaje (ammoní) ‘nu paro d’’e nuoste senza mutivo.

E bbasta accussí. Dammoce chist’atu pizzeco ‘ncopp’â panza e llassammo perdere ‘a cuppetta aiurupea. Turnammo a ppenzà ô campiunato: dummeneca ‘mmerzo ‘e sseje se va a Bbergamo. Sperammo ‘e nun turnà cu n’ata sciaccata. Si ‘o Cielo ‘o vvo’ ve ne parlo llunnerí. Staveti bbe’- Ciuccio fa’ tu. R.Bracale Brak