CUTALETTE SMARGIASSE

CUTALETTE SMARGIASSE Chello ca serve pe sseje perzone: ‘nu kilò e duiciente ‘e felle ‘e spalla d’annecchia, tagliate doppie ‘nu centimetro, 3 ova, 150 gramme ‘e pane rattato, 100 gramme ‘e ‘nzogna, 200 gramme ‘e prusutto cruro tagliato nun tanto suttile, 200 gramme ‘e pruvulone piccante tagliato suttile suttile, 12 cucchiare ‘e passata ‘e pummarola, 'nu tuppeto 'e prutusino lavato, asciuttato e ntretato finu fino sale fino q.n.s. Comme se fa Sbattere ll’ova cu ‘nu poco ‘e sale e fraditanto schianà ‘nu poco ‘e ffelle d’annecchia cu ‘nu silavianda (batticarne),’nfonnerle dinto a ll’uovo sbattuto e ppo dint’ô ppane rattato. Dinto a ‘na tiella, a ffuoco doce fà accumplià ‘a ‘nzogna e appena è ppronta sistimà ‘e felle ‘mpanate una vicina a ll’ata e farle durà dduje minute pe faccia; a ‘stu punto sistimà ‘ncopp’ a ògne fella ‘e carne apprimma ‘na fella ‘e prusutto, po ‘nu paro ‘e fellocce ‘e pruvulone e a ll’urdemo ‘nu paro ‘e cucchiare ‘e passata ‘e pummarola. Cummiglià ‘a tiella e lassà pappià nfi’ a cche ‘o ppruvulone nun s’è accumpliato. ‘Mpiattà, derrammà cu 'nu tuppeto 'e prutusino lavato, asciuttato e ntretato finu fino e sserví caude ‘e fuculare accumpagnate cu ppatane fritte o cu ‘na ‘nzalata ‘e ‘ncappucciata cunnita cu aglio, uoglio, sale e ppepe janco. Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria e servute a ttiempo (temperatura) ‘e stanza pe magnà. Mangia Napoli, bbona salute! Scialàteve e cunzulàteve ‘o vernecale! Raffaele Bracale .