ZETUNE Â GGENUVESE FUJUTA.

ZETUNE Â GGENUVESE FUJUTA. Chello ca ce vo’ pe sseje perzone 600 gramme ‘e zetune spezzate a mmano a pedazze ‘e 4 cm., 300 gramme ‘e pancetta tagliata a vvarriglie ‘e cm. 4 x 2 x 1, ddoje grosse cepolle ndurate ‘e Muntoro ammunnate e ntretate a ffellocce, ‘nu bicchiere d’uoglio ‘auliva dunciglio, ‘nu bicchiere ‘e vino janco asciutto, ‘nu cucchiaro ‘e pignuole abbrustulute ô tiesto, ‘nu cucchiaro abbunnante d’uva passa ammullata, ‘nu cerasiello percante (piccante)lavato, asciuttato e grabbato (inciso) p’ ‘o lluongo, 100 gramme ‘e pecurino rattato finu fino. sale duppio ‘na vrancata, sale fino e ppepe janco macenato a ffrisco q.n.s., ‘nu tuppeto ‘e prutusino lavato, asciuttato e ntretato. Comme se fa Dinto a ‘na prupurziunata tiella ricà ll’uoglio cu ‘o ttrigliato ‘e cepolla e ‘’o cerasiello percante (piccante)lavato, asciuttato e grabbato (inciso) p’ ‘o lluongo, e tenerle a ffuoco allero nfi’ a cche ‘a cepolla piglia culore; agnadí ‘e varriglie ‘e pancetta, fà cocere pe ddiece minuti, avascià ‘o ffuoco e agnadí ‘o bicchiere ‘e vino facennolo svapurà; accuncià ‘e sale e ppepe ammiscà, cummiglià ‘a tiella e fà abburrí ‘a cepolla a ffuoco miccio pe n’ora, mantenenno ncaudo; fraditanto àrvere teniente teniente ‘e zetune dinto a otto litre ‘e acqua vullente salata (vrancata ‘e sale duppio), scularle e revacarle dint’ â tiella cu ‘e cepolle;agnadí ll’uva passa e ‘e pignuole abbrustulute ô tiesto.Ammiscà e tené a ffuoco allero pe ttre mminute derrammàrle cu ‘o ccaso pecurino e a ll’urdemo, fora dô ffuoco, derrammàrle cu ‘nu tuppeto ‘e prutusino lavato, asciuttato e ntretato e cu abbunnante pepe janco mmacenato a ffrisco . Ammiscà, ‘mpiattà e serví caude ‘e fuculare chesta sabbrósa genuvese fujuta. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! Raffaele Bracale