PASTOTTO PERCANTE.

PASTOTTO PERCANTE. Chello ca ce vo’ pe sseje perzone 600 gramme ‘e tubbettielle (avemmarie) ricate, 50 gramme ‘e pancetta tesa tagliata a ffarinule piccerenelle, ‘nu bicchiere e miezo d’uoglio ‘auliva dunciglio, 500 gramme (piso lisso) ‘e rucola percante ammunnate, lavate e arvate vierde vierde, ‘na cepolla ndurata ‘e Muntoro ammunnata e ntretata suttile, ‘nu spiculo d’aglio ammunnato e scamazzato, ‘ddoje farinule pe bbroro veggetale, sale duppio ‘na vrancata, sale fino e pepe janco mmacenato a ffrisco q.n.s., ‘nu cerasiello percante (piccante)lavato, asciuttato e grabbato (inciso) p’ ‘o lluongo, 100 gramme ‘e pecurino rattato finu fino. Comme se fa Appruntà pe primma cosa ‘o broro veggetale cu tre litri d’acqua fredda e ‘e ddoje farinule pe bbroro; súbbeto doppo ammunnà, lavà e spezzettà ‘a rucola e metterle a arvere dinto a ‘nu paro ‘e litre d’acqua fredda salata (vrancata e sale duppio)e scularla vierde vierde. Ricà ‘e duje tierze- ‘e ll’uoglio dinto a ‘na prupurziunata tiella a ffuoco allero e fà piglià culore a ll’aglio ‘nzieme ô cerasiello percante; appena so’ ppronte agnadí ‘a rucola arvata ; ‘ncuperchià e lassarla abburrí pe ‘nu quarto d’ora; â fine accuncià ‘e sale e ppepe e passà tutto dinto a ‘nu mmiscaturo nfi’ a uttené a velocità miccia ‘na dellicata crema. Fraditanto àrvere a mmeza cuttura dint’ô bbroro veggetale vullente ‘e tubbettielle. Ricà ‘o riesto ‘e ll’uoglio dint’â tiella, farlo callentà e agnadí ‘o ttrigliato ‘e cepolla facennola appassulià a ffuoco allero, po avascià ‘o ffuoco e agnadí ‘a pancetta e farla suassà pe cinche minute; a chistu punto ricà dint’â tiella ‘e tubbettielle arvate a mmeza cuttura agnadenno uno o dduje cuppine ‘e bbroro vullente e cumpletà ‘a cuttura d’ ‘a pasta; ammiscà e súbbeto doppo agnadí ‘a crema ‘e rucola; aumentà ‘o ffuoco e dderrammà cu ‘o ccaso pecurino, cumpletanno ‘o pastotto cu n’atu filo d’uoglio a ccruro e derrammanno abbunnantemente ‘e pepe janco mmacenato a ffrisco. ‘Mpiattà, e serví caudo ‘e fuculare ‘stu pastotto gurmante. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! Raffaele Bracale