NAPOLI – SAMPDORIA 07/01/17 ( 2A 1) ‘A VEDETTE ACCUSSÍ

NAPOLI – SAMPDORIA 07/01/17 ( 2A 1) ‘A VEDETTE ACCUSSÍ Eccuce cca guagliú! Ringrazzianno ô Cielo ce stammo sentenno n’ ata vota e vve pozzo cuntà chello ca succedette ajere a nnotte ô san Paolo addó ‘a catimma (epilogo) fove retissanta visto ca ‘e cuane (azzurri) [sempe cu ‘a divisa d’’a Maronna ‘e ll’Arco ca ancòra ‘na vota ce dicette bbuono] se ritrovajeno ‘nsotto cu ‘na daffimarma (autorete) d’ Hysaj (30'), êtten’ aspettà ‘o 77’ pe ppariggià cu Gabbiadini trasuto ô posto ‘e gGiorgigno e ffinalmente truvajeno ‘o vantaggio i ‘a nichemata (vittoria) nicessaria e aspettata sulamente ô 95’,ô quinto minuto ‘e ricupero proprio cu cchillu Tonelli,a ll’estreglia (esordio) cu ‘a maglia d’’o Napule.’Nzomma comme jette e ccomme venette, ajere a nnotte se vincette i ‘a rincorza d’’ a bbanda ‘e Sarri cuntinuaje cu ‘o Napule ca vattette ‘a Sampdoria a ll'urdemu siconno e mmettette a ffuoco ‘nu san Paolo cungelato!E ttutto chesto cu ttutto ca tre o quatto jucature cuane, accumincianno dô capitano nun êvano ancòra alliggeruto ‘o capitone i ‘a ‘nzalata ‘e rinforzo e aveveno accumminciato a gghiucà solo dô 47’ quanno ‘o Napule ,nsi’ a cchillu mumento, poco mascullo (lucido) e assaje ‘mpriciso fove custretto a cchiammà ‘ncampo apprimma a Zielinski [59’] e ppo [71’] a gGabbiadini,ca seje minute doppo trasurto riuscette a mmettere dinto ll’addaffa (rete) d’’o mumentaneo pareggio; da chillu mumento accumminciaje ll’ isarro (assedio) â porta ‘e Puggioni,ca abbiaje a ccaccià ‘a scienza dimustrannese dicisivo ancòra ‘ncopp’a gGabbiadini i a Marekiaro; però pe ffurtuna nosta ‘o purtiere duriano s’êtte’a fà cchiú ddinto ‘e dint’ô prozo ô 95’ ‘ncopp’â cunchiusiona pricisa e sistimata, sotto ll’afachía (traversa), ‘e santu Tonelli ca ce risulvette ‘a prattica, permettennoce ‘e accummincià bbuono ‘stu duimiladicessette! Passammo ê ppaggelle: REINA 7.5: ‘Nu prutacunista d’’a serata e nnun sulo p’’e mmaneche corte d’’a maglietta; Sarri ll’avesse ‘a fà ‘na statua d’oro pecché cu ‘a cazzimma soja pruvucaje ‘a fessaria ‘e Silvestre ca Di Bello avette ‘a jettà fora, custringenno ‘a Sampedoria ancòra ‘nvantaggio a gghiucà dô 61’ ‘ndiece; meglio ancòra quanno fermaje ‘a periculosa cunchiusione ‘ndiacunale ‘e Muriello ‘mpedenno ‘o dubblato (raddoppio)d’’e duriane; si nun ll’avesse fatto nun saccio addò fossemo jute a ffernì! HYSAJ 4.5: ‘A daffimarma (autogol) nun fove ll'unico prano (errore) d’’a sibbacca (match) soja e nnun penzo ca dipennette dâ ‘nfruenza;parlasse cchiú ‘e pesantezza ‘e stommaco e nnicasse (riflesse) appannate si no ô 30’, ‘ncopp’ô iabbro (cross) ‘e Schicko ce fósse juto ‘e faccia e nno ‘e spichetto [comme ‘mmece ce jette] facennose schizzà ‘a palla ‘ncopp’ô stommaco e ppo ‘mporta! TONELLI 7: Meglio nun puteva jí ll’estreglia (debutto) soja ô san Paolo diventanno ll'ommo d’’a pruvvidenza, proprio isso ca nsi’ a ajere a nnotte nun era maje stato pigliato ‘ncunziderazziona ‘a Sarri. CHIRICHES 5.5: Pur’ isso acciaccatiello e ‘nfruenzato, tenette ‘ncopp’â cuscienza ‘o fatto d’esserse fatto ‘nfilà da Schicko ‘ncopp’â curzia ‘e mancina comme a ‘nu fesso e pp’ ‘o riesto se vedette ca nun steva all’arribba (top). STRINIC 6: Tutto summato ‘o seje nce ‘o pozzo mettere soprattutto pe cchella bbella palla dicisiva misa arreto pe tTonelli; primma però quacche fessariella ‘a facette! ALLAN 5: Fove n’ato ‘e chillo cu ‘o stommeco pesante e se perdette dint’ ô ggelo d’’o san Paolo smarrunanno paricchio e rrummanenno ‘ncampo pure troppo![Dô 59' ZIELINSKI 6.5: Trasette cu n’ata masirra (marcia) e mettette ll’ordine nicessario; cu isso ‘ncampo fove súbbeto n’atu Napule!] JORGINHO 5: Nun me piacette pe nniente completanno ‘a serata storta d’’e brasiliane ‘e Sarri. [Dô 71’GABBIADINI 6.5:Doppo d’’o stuco (gol) contro â Fiorentina primma d’’a stamma (sosta) ajere a nnotte signaje n’ata vota comme a ‘nu vero marcazzo (centravanti). Vuó vedé ca chianu chiano se sta ‘mparanno comme se fa? Eppure pare ca mo s’’o venneno....] HAMSIK 4,5: Me dispiace p’’o capitano, ma ‘e fatte stanno accussí: ajere a nnotte jucaje una d’’e cchiú bbrutte mubbare (partite) soje cu ‘a maglia cuana: durante ô primmo ajone(primo tempo) fove cumpletamente fora dâ sibbacca(match)sbaglianno pasiglie (passaggi) istiglie, (verticalizzazioni)e ttiempe ‘e juoco.Jucaje sí e nno ‘nu quarto d’ora ‘e ll’arrancua (ripresa)e sse facette nutà sulo pe ‘nu tiro ‘mporta ô finale; troppo, troppo poco! CALLEJON 6: Forze però nun s’’o mmeretasse pecché si è overo ca mannaje ‘mprta ‘e cumpagne e rialaje ‘nu granne iabbro (cross) a gGabbiadini,nun arresecaje maje ‘o tiro pure quanno avette ll’accasione.E ‘mmece ll’à dda fà! MERTENS 5: Serata no pure pe isso ca, stuppanno (interrompendo) ‘a striscia d’oro soja , sbagliaje dduje stuche (gol) abbastantamente facile e ttutto summato me deludette. INSIGNE 5: E cchisto è n’ato d’’a pastafina! Cercaje troppo ‘a jucata perzunale, aizanno porvera e ffacenno ‘ncazzà a tutte: Sarri e ttifuse accumincianno ‘a chille d’’a tribbuna-divano. all. SARRI 6 Chi vence ave raggiona e cquanno se vence, ave raggiona pure ‘o mutarribbo (allenatore), ma ajere a nnotte ‘o Napule suojo nun piacette: muiccaddo (macchinoso), cabbillitanno (prevedibile),loscio (opaco) e apprimma Gabbiadini e ppo Tonelli lle levajeno ‘e ccastagne dô ffuoco. S’’a vedette brutta nun riuscenno a ttruvà ggià durante ô primmo ajone comme arrivà a ccapo d’’a facenna. Me ripeto: êsse ‘a fà ‘na statua d’oro nun sulo a gGabbiadini e a tTonelli, ma pure â cazzimma ‘e Reina! arb. DI BELLO 5 Ce porta bbuono, ma nun me piacette e nnun m’addimannate ato! E ccu cchesto ve saluto e vve faccio tante e ttante avucurie pe ll’anno nuovo e si ‘o vvo’ ‘o Cielo ce sentimmo miercurí ca vene, doppo ‘a mubbara (partita) ‘e Coppa itaglia cu ‘o Spezzia. Staveti bbe’! Raffaele Bracale Brak