NAPOLI – CAGLIARI (06/05/17) 3 A 1 ‘A VEDETTE ACCUSSÍ

NAPOLI – CAGLIARI (06/05/17) 3 A 1

‘A VEDETTE  ACCUSSÍ

Tetè, tetè, tetè guagliú! Trummette, scetavajasse, caccavelle e pputipú! Putimmo essere, a cquanto pare, cuntente visto ca  cuntinua ‘o  momento pusitivo d’’o  Napule ca ajere all’ora steuza d’’e ppastarelle, ô san Paolo, ‘nnante a cquase quarantacinchemila masciadde  (spettatori) scennette ‘ncampo cu ‘a muntazzimma (divisa) justa: chella d’’a Maronna ‘e ll’Arco, contr’â scuatra ‘e ll’isulane  ‘e  rastrelli , fassanno, anze strafassanno (vincendo, anzi stravincendo) pe tre a uno  ll’ancerca (anticipo),superanno  p’’o mumento e allimmeno nsi’ a stasera  ‘a scuatra d’’e pecurare ‘e spalletti e piazzannose  ô siconno posto d’’a crassifica, sempe speranno ca stasera a mMilano Donnarumma ce dà ‘na mana, arricurdannose d’essere ‘e Castiellammare! Dicisivi ancòra ‘na vota foveno  Ciruzzo [ca mettette a ssigno ‘na pareglia ( doppietta) ô2’ e  ô 50’] e Insigne, ca nchiudette definitivamente ‘o sibbacco (match) a ll’ 83’.Ll’arillo   festiggiaje comme meglio nun êsse pututo ‘e suĵe trent’anne  arrampecannose a cquota 24 d’’a  crassifica d’’e nassie (cannonieri) a pparo cu Icardi e ccu cchella lota d’’o cainno (traditore). ‘O stuco  (gol) ‘e Farias(se),ô 92’ servette sulo  a ll’isulane  pe ssalvà ‘a faccia mentre facette ‘ncazzà comme a ‘na ufera a pPepe Reina ca si ave p’’e mmane ô Meza Cucchiara penzo ca lle fa tale ‘na vertulina ‘e cauce ‘nculo e ppacchere a votavraccio ca nun s’’e scorda cchiú! Turnanno â mubbara (partita) dicimmo ca, a pparte ‘a    differenza ‘e tacnía (tecnica) d’’e ddoje scuatre , tutta a ffavore d’’o Napule, ‘a parta llora ‘a facetteno  pure ll’efizzonne  (motivazioni) d’’e  cuane (azzurri) ‘e Sarri ca  ce   teneveno a nun perdere ‘stu treno i a ffà carne ‘e purpette ‘e ll’isulane e cce riuscetteno pure si nun sfruttajeno tutte ll’accasione avute ca ll’êsseno permiso ‘e vencere cchiú llargo senza ca nisciuno êsse pututo dicere niente. Accuntentammoce però e nnun fa niente si pure ajere pigliajemo ‘nu stuco (gol) ca nun ce fossemo mmeretate ‘e piglià; penzammo ca tenimmo ‘nu granne Ciruzzo  ca ajere ce mettette poco meno ‘e duje minute pe sbluccà  ‘a natiggia  (risultato) apprimma cumannanno e ppo sfruttanno  a mmestiere ‘nu jabbro  (cross) esatto  ‘e ll’africano  e ppe ffirmà  ll’addaffa  (rete) nummero ciento ‘ntempurata (in stagione) d’’a masciumujada  (gruppo) ‘e Maurizio Sarri,ca fove tarscibbato (accolto)  comme a n’arfaizzo    (trionfatore) da ‘e quarantacimnchemile masciadde  (spettatori)  tutte  tifuse e ffove caffato  (esaltato) cu ‘nu striscione  ‘e ll’ultrà: “FUORICLASSE, UOMO E CAMPIONE VERO: ALLENATORE DA PALLONE D’ORO”. P’’o mumento cuntentammoce ‘e chesto...

Passammo ê ppaggelle:

REINA 6  Poca fatica p’’o guardaporta nuoso ca se fósse pure pututo stà â casa.Nun ce putette fà niente quanno [92’] Farias-se lle s’sappresentaje sulo sulo, libbero e ffranco a ttu ppe ttu i ‘o futtette.

HYSAJ[Meza Cucchiara] 6  E nniente ‘e cchiú pecché è overo ca se facette ‘nu mazzo tanto pe ttutt’’a mubbara (partita) soprattutto  ‘ncupertura ‘ncuollo a  mMurru e facennose vedé ‘nnante pe ccupulià (dialogare) cu cchi capitaje e ffove matàlo (perfetto)nsi’ ô 90’, però arrivate ô 92’ smarrunaje lassenno a fFarias-se  ‘a chesema  (varco) pe ppassà e gghí a rrompere ‘o pasticciotto a rReina visto ca manco ‘o Masto ‘o riuscette a ffermà!

ALBIOL[‘O Masto] 6 ‘E cchiú nun pozzo metterle pecché si pure facette ‘na granna atalossa (prestazione) ‘e cupertura, cumannanno ‘a trasera (difesa), però  proprio a ll’urdemu siconno nun riuscette a mmettere ‘na pezza â fessaria d’’o Meza Cucchiara e  permettette    a  fFarias-se d’appresentarese libbero e ffranco ‘nnante a rReina pe ffotterlo cu ‘nu tiro spuorco, sbagliato e [‘nculo a isso!] furtunato.’O Masto spagnuolo  sfresaje (sfioró) pure ll’addaffa (rete) cu ‘na bbella cabbesera (colpo di testa) centranno però, ll’afachia (traversa) ‘ncopp’a ‘nu tiro ‘e squina (corner).

CHIRICHES[‘OVampiro] 6,5  Mubbara (Partita) attienta lla ddereto addó nun facette ruppià (rimpiangere)  a cKoulibalý, mettenno ‘a musarola  mo  a bBorriello,  mo a  sSau.

GHOULAM [ll’Africano] 7 – ‘Na vera spina ‘int’ô scianco ‘e ll’isulane ‘ncopp’â curzia ‘e mancina addó nun se stacaje maje ‘e jí annante i arreto cupulianno (dialogando) cu Insigne i ‘o capitano;nun arresecaje niente arreto e ppartette a rrazzo pe sserví a dduvere a cCiruzzo ‘nnaccasione d’’a primma addaffa (rete) e ffove prutacunista pure ‘int’ a ll'azziona  d’’oa mudajafa  (raddoppio).

ZIELINSKI 6  Tanta corza d’’o pulacco pe ttutto ‘o campo ca purtaje quantu cchiú lignammo fósse pussibbile lassanno perdere ‘a qualità ; sfresaje (sfiorò) però  pure ‘o stuco   (gol) durante ô primmo ajone e ffove una ‘e ll’accasione perze. Peccato!

JORGINHO 6,5  Apprufittaje d’’o fatto ca ‘o Cagliari pure tenenno nove jucature arreto â linia d’’a palla nun lle  jetteno ‘mpressiona ‘ncullo lassannolo libbero ‘e fà ‘o spezziale a ll’armidanno (centrocampo) senza prubbleme e ffarele sustatà  (impostare) ll'azziona ‘ngrazzie ‘e dDio!

HAMSIK 6  Nemmeno ajere Sarri  vulette fà a mmeno d’’o capitano pure si ‘o vvedette ca Marekiaro nun fove a ll’arriba  (al top) pe bbia ‘e chillu scassacacchio ‘e ‘mpiccio  ca tene a   n’adilà (muscolo) i ‘e mierice nnun so’ ccacchie ‘e farcele passà. E cche saciccio! Ce facette divertí cu ‘nu tentativo ‘e pallunetto da cchiú ‘e quaranta metre, ma qui fu Napoli!Sulo ô 69’ Sarri se decidette a ffarelo turnà ‘mpanca. [dô 69'  ROG 7 Nun sulo ‘e stima, ma  pe ccomme, appena trasuto  ‘ncampo,  s’avventaje cu ccegna (grinta) ‘ncopp’a ògne ppalla  e nnun ne mullaje una!]

CALLEJÓN[Peppe ‘a ‘nguenta] 6,5  A ddrittà nisciuno fove cacchio ‘e starele a pparo e mMurru fove custretto a ttanazuillà  (abdicare) arrennennose quase súbbeto. Lle mancaje sulo ‘o stuco (gol) ca nun cercaje maje.

MERTENS [Ciruzzo] 8  Trent’ anne e ttrenta   stuche (gol) ‘ntempurata (nella stagione).E scusate si è ppoco! ‘A pareglia  (doppietta) ‘e Ciruzzo  rejalaje ô  al Napule  n'ata  nichemata (vittoria)’mpurtante cumpletata cu ll’addaffa (rete) ‘e Lorenzigno  ca avette ll’ jusaida (assist) bbuono propeto ‘a Ciruzzo per la rete del 3-0 di Insigne. [dô 77'  MILIK 6  Appena trasuto cercaje súbbeto ‘a porta pe ffà vedé ca ce steva i ‘o vvuleva fà!Facette piacere vederelo accussí ‘ntenziunato].

 INSIGNE[Lorenzigno] 7 N’ata atolossa (prestazione) assaje pusitiva d’’o frattese ca nun sulo  cercaje spisso ‘e cumpagne ma   cchiú ‘e ‘na vota tentaje ‘e cunchiurere, però  sbaglianno pe cchella cacchia ‘e  fissazziona d’’o tiro a ggiro e ffinalmente ô 68’ quanno se decidette a ttirà dritto pe ddritto truvaje ll’addaffa (rete) d’’o tre a zzero.  [dô 79' GIACCHERINI sv Me sto ancóra addimannanno che cacchio trasette a ffà!]

all. SARRI 6,5 Ll’ubbiettivo d’’o siconno posto nun è cchiú tanto ‘mpussibbile i ‘e guagliune  cuane (azzurri) ‘o vonno centrà comme se vedette ajere ca ‘o sibbacco (match)fove priparato a mmestiere e ggià dê primme minute se dettono da fà comme pretennette ‘o mutarribbo (allenatore) lloro.

arbitro GIACOMELLI 4  Chille ca ‘o difenneno diceno ca arbitra comme a n’arbitro ‘ngrese  tamillanno(tollerando)  troppo  e llassanno correre. I’ dico ch’è scemo,sturduto e  ccecagnuolo e mme spieco:  siscaje, pe ppartito pigliato, sempe e ssulo contr’ê cuane (azzurri),  nun ce dette ‘nu ricore ca ce fósse stato[e ccu cchille dduje  ca, da duje sibbacche (match) d’’a tempurata (stagione) passata,  ggià avanzavemo da ‘stu cretino, stammo a ttre! ], nun  vulette vedé tutte ‘e ffetenzie d’’e jucature ‘e rastelli e ppe ddarece ‘na timmurria (punizione) a ffavore avettem’aspettà ‘o 74’, se mettette sistematicamente ‘mmiez’ê piere d’’e nuoste, quase marcanno pe ttutt’’a mubbara (partita) a lLorenzigno, nutizziaje (ammoní) a z Zielinski  e ttanno siscaje ‘o prazzo (fine) quanno finalmente  ‘o Cagliari riuscette a ssignà n’addaffa (rete).Ma va a  ffà ‘int’ a ‘na chieja ‘e vesta   e pportame ‘o riesto!

E ffermammoce cca. Ve ringrazzio ‘e ll’attenziona e ssi dDi’ vo’ ce sentimmo  doppo d’’a nacchella (trasferta) contr’ ê granate turinese speranno ca nun ce fermano accussí comme ànnu fatto cu ‘a vecchia zoccola! Staveti bbe’!

R.Bracale Brak