AVEMMARIE CASO E OVA

AVEMMARIE CASO E OVA

Chello ca serve pe sseje perzone
600 gramme ‘e avemmarie (tubbettielle ricate),
3 ova
100 gramme ‘e ‘nzogna,

150 gramme ‘e pecurino rattato finu fino,
‘nu tupputo ‘e prutusino lavato, asciuttato e ntretato finu fino
sale duppio ‘na vrancata,
sale fino, dduje pizzeche,
pepe janco macenato a ffrisco quanto ne piace.
Priparazzione
Àrvere(lessare) ‘a pasta ‘int’ a otto litre d’ acqua vullente salata(vrancata ‘e sale duppio); fraditanto (nel frattempo) arapí ll’ova dint’ a ‘na ciotola e sbatterle a ffunno cu ‘na furchetta, ‘nzieme ô ppepe e ô ssale fino;fà sciogliere a ffuoco doce dint’ a ‘na tiella ‘e fierro niro ‘a ‘nzogna, aunirve ll’avemmarie arvate verde verde (al dente) e ammiscà pe ‘nu paro ‘e minute sempe a ffuoco doce;súbbeto doppo auní ll’ova sbattute e ‘o pecurino rattato finu fino e continuà a ammiscà fino a che ll’ova nun risultano addenzate; ‘mpiattà , e serví sott’ô colpo a ttavula cuspargenno ògni purzione ‘e prutusino ntretato finu fino.
Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja.
Mangia Napoli, bbona salute! Scialàteve e aggarbbatéve ‘o vernecale!!
Raffaele Bracale