MUSSILLO ‘E BACCALÀ Â NAPULITANA

 MUSSILLO ‘E BACCALÀ   NAPULITANA

Chello ca serve pe cquatto perzone:

‘nu chilò e mmiezo ‘e  mussillo ‘e baccalà già ammullato,

 ½ chilò ‘e pummarole fresche  Roma o San Marzano, lavate scuttate e spellate.

‘nubicchiere d’uoglio ‘auliva dunciglio,

‘nu  spiculo d’aglio ammunnato e ntretato finu fino,

150 gramme d’ aulive  nere ‘e  Gaeta desciussate,

150 gramme d’ aulive  janche ‘e   Spagna desciussate

50 gramme ‘e chiapparielle ‘e  Pantelleria  levate ‘e sale e llavate,

6 sulumiglie d’alice salate sott’uoglio,

‘nu pizzeco d’arecheta,

dduje cucchiare ‘e prutusino lavato asciuttato e ntretato finu fino tritato

sale duppio e  ppepe janco mmacenato a ffrisco q.c.n.v.

farina q.c.n.v.

uoglio pe frittura q.c.n.v.

 

Comme se fa

sciacquate ‘o mussillo ‘e  baccalà già ammullato,levatene tutt’ ‘a pella i ‘e spine e  ttagliatelo a ppiezze ‘e circa 5 cm. pe 5 cm., ‘nfarinatelo a mmestiere ‘a tutte ‘e late e frijtelo  dinto a uoglio pe frittura vullente e  ffuto e mantenitelo

‘ncaudo. Dinto a ‘na cummedità bbona p’ ‘o tiesto, zuffrjite ll’aglio ntretato cu ll’uoglio dunciglio; agnadite ‘e pummarole scuttate e spellate, ‘e duje tipe d’aulive, ‘e chiapparielle e ‘e sulumiglie d’alicesalate ntretate. Facite cocere pe ‘na ventina ‘e minuti ‘stu zuco; accunciate cu pocu ssale e paricchiu ppepe e sestimate dint’â sarza uno vicino a ll’ato ‘e piezze ‘e mussille fritte e ppassate ‘a cummedità dint’ ô tiesto caudo (140°) pe ‘na dicina ‘e minute; ô mumento ‘e serví derramà cu ‘o prutusino  e ancòra ‘nu poco ‘e pepe. Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.

Magna Napule,  bbona salute! Scialàteve e cunzulàteve ‘o vernecale!!

Raffaele Bracale