NAPOLI - HNK RIJEKA [E.L.26.11.20] 2 A 0 ‘A VEDETTE ACCUSSÍ

NAPOLI - HNK RIJEKA [E.L.26.11.20] 2 A 0

‘A VEDETTE ACCUSSÍ

Nce vuleva guagliú! Nce vuleva e ffinalmente ajeressera, doppo ‘e doje o tre scutuliate pigliate, ‘o Ciuccio ô san Paolo turnaje a dd’   affuzzà (vincere) i ‘o ffacette justo cu ‘o sibbacco   (match) d’’a quarta jurnata d’’a cuppetta aiurupea Napoli-Rijeka ca se cunchiudette cu ‘nu doje a zzero[41’ Politano e 75’  Lozano.] pe nnuje, natiggio (risultato) ch’êsse pututo essere pure cchiú sustanziuso, ma ca icnè (comunque) servette a purtà ‘o Napoli – cu nnove  punte – sulo sulo ‘ncimma ô ncamo (gruppo) F d’’a cuppetta. E pp’ ‘o mumento va bbuono accussí. Passammo ê ppaggelle

MERET[‘O Lungagnone] 6,5:Ajere nun ce facette spaventà, anze ô niajo d’’o primmo ajone faccette dduje tacculle (interventi)a mmestiere ‘ncopp’a ddoje cunchiusione attalíe (successive)  ‘e Loncar(ro).

 

DI LORENZO 6,5: Carimmo (generoso) se magnaje tutt’’a curzia ‘e dritta cupulianno (dialogando) cu cchi capitaje.

 MAKSIMOVIC[‘O ‘Ntontero] 5,5: Jette bbuono arreto, ma lle perdono ca sciupaje ddoje accasione una p’ajone (una per tempo).

 

KOULIBALY[‘O Ggialante] 6,5: Cumannaje a mmestiere ‘a trasera (difesa) cu ssulo quacche sfregazzo (sbavatura) sott’ô quarantacinchesimo; all’arrancua (ripresa) sagliette ‘ntusiello senza maje arresecà.

 

GHOULAM 6,5: Atalossa (prova) ‘e sustanza e mmuttana (propositiva)’ncopp’â ferza mancina. Che ppiacere vederelo ‘ncampo!

 

BAKAYOKO 6,5: Bbona atalossa (prova)d’’o Mammone ca facette aculla (diga) e mmettette preta ‘ncopp’a ppreta.

 

DEMME 6,5: Tazzizzo (promosso)! Fove ‘o martiello d’’a mediana cuana  (azzurra) e sse facette sentí; dint’ê primme minte sfresaje (sfiorò) ‘nu granne stuco (gol) cu ‘na chiantella da fora! [Dô 69' LOBOTKA 6,5: Trasette, se scurciaje ‘e mmaneche e ssubbeto ce mettette cegna (grinta) e  zzaccà (generosità) tanto ca sott’ô nuvantesimo se facette vedé pure ‘ncamma-addaffa (zona gol)!

 

 POLITANO 7: Soja ll’addaffa (rete) ca sbluccaje ‘a facenna facennose truvà ô posto justo, ô mumento justo pe mmettere a ffrutto ‘na granna jucata ‘e Zielinski. I  avastaje. [Dô 64' LOZANO 7,5:  Mettette ‘o punto ammirativo ‘ncopp’â nichemata (vittoria) d’’o Napule cu n’addaffa (rete) ca dette sapore a ttutt’’e ghiucate soje pricise e sistimate.

 ZIELINSKI 7: Custretto a gghiucà a ‘nupizzo sbagliato se ‘mmentaje ô 41’ ‘na penetrazziona sciarmante (geniale) e ‘nu missiddo(assist) commifò pe Ppolitano ca mettette ‘a palla ‘mporta. Applavuse! [Dô 65'  INSIGNE 7:M’aspettavo ‘e cchiú, ma nun facette mancà ô 71’ ‘a pennellata soja a zzuco ‘e caramella pe Llozano!] 

ELMAS[‘O Turco] 5,5: Ggià ô quarto minuto sfresaje (sfiorò)ll’addaffa (rete), ma po se chiammaje fora sparenno dô juoco. [Dô 69'  MERTENS[Ciruzzo] 6: Nun fove periculuso, ma dette ‘na bbona mana â munavara (manovra) uffenziva d’’e suoje.]

 PETAGNA 5,5: Nun tiraje maje ‘o pere arreto facenno a spurtellate lla ‘nnante,  ma senza frutto.

[Da ll'81' FABIAN RUIZ[Anemalonga]: sv.]

 

all. GATTUSO 7:Andivinaje ‘e cagne juste ô mumento juste e cu  ‘e suoje s’accuntetaje ‘e ‘na nichemata (vittoria) ‘mpurtante ma  senza spennere troppo, visto ca nce aspetta ‘nu calannario scamuso ca ggià da dummeneca ‘ncampiunato ce vede contr’ê pecurare rumanise ca  so’ bbrutte accunte da piglià cu ‘e guante! 

Arb. HALIS ÖZKAHYA 6 Nun se vedette e nnun se sentette facenno tutto  ‘o duvere suojo.

E bbasta accussí! Mo, cumme v’aggiu ditto, dummeneca ‘ncampiunato nce aspetta ‘a Roma. Facimmo corne e ssi ‘o Cielo ‘o vvo’ ve ne parlo llunnerí. Staveti bbe’.

R. Bracale Brak