NAPOLI – MILAN [22.11.20] 1 A 3 ‘A VEDETTE ACCUSSÍ

NAPOLI – MILAN [22.11.20] 1 A 3

‘A VEDETTE ACCUSSÍ

Che scajenza guagliú, che sbentura! Tengo ‘o ttuosseco ‘mpont’ô musso e ssi donco ‘nu muorzo a uno ll’avveleno. Ajere, all’urdem’ora, ô san Paolo  nce attuccaje ‘e vedé ‘o Napule cchiú bbrutto d’’a caracuddamma (stagione) ca s’’a vedette contr’ê riavule russe e nnire ‘e Pioli e nce refunnette ‘e ppenne alluggiannose tre purpette i a nniente servette ô 63’ ll’addaffa (rete) ‘e Ciruzzo ca ce purtaje ‘ncopp’ô doje a uno. Cumminfatte ‘o sibbacco  (match) ô San Paolo, se cunchiudette ‘ncopp’ô tre a uno pe ll’avverzarie d’’o Ciuccio ca pure mantenenno ‘o pussesso palla pe cchiú de n’ora nun fove  maje periculuso e nun facette maje paura, né fove muttano  (propositivo), mentre ‘e riavule ‘e Pioli recugliettono cchiú ‘e chello ch’êveno semmenato trascenate  dô solito Ibrahimovic(cio) ca signaje ô 20’ i ô 54’e, cumme v’aggiu ditto, a nniente servette ô 63’ ll’ addaffa   (rete) ‘e Ciuruzzo, mentre ô 95’ arrivaje ‘a terza purpetta, chella ‘e Hauge ca cunchiudette ‘o scenufreggio. E menu male ca fenette lla!

Mo passammo ê ppaggelle e vve dico ca me dispiace ma nun pozz’essere doce ‘e sale i aggi’’a acunzignà cchiú ‘e ‘na chianetta! Sentite:

 

 MERET[‘O Lungagnone] 4,5  Sustanzialmente senza itimme (colpe) ‘ncopp’ô siconno stuco  (gol) ‘ncassato dô Napule, ma êsse avut’’a fà assaje ‘e cchiú ‘ncopp’ô primmo i ‘o terzo, pe nun parlà po ‘e ‘nu paro d’artauilatte (rimesse) sbagliate.

 

DI LORENZO 4   N’arruina (disastro)! Assaje malamente all’epata  (fase) difenziva: da doje fessarie soje nascetteno  ‘e ddoje repartite  (ripartenze) d’’o pruvvisorio doje a zzero e d’’o definitivo tre a uno. Piezzo e ppejo annante chella afachia (traversa) pigliata ‘ncopp’ô doje a uno nun fove sfurtuna, ma fove ‘na strunzata: ‘na sprupusitata addaffa (rete) sbagliata!

 

 MANOLAS[Chitelassa] 5,5  Cercaje ‘e fa coccosa, ma po lle cadetteno ‘e braccia ‘a cuollo e ss’arrennette; addirittura   Hauge ‘o scartaje cumme a ‘na gaveglia (birillo) ‘nnaccasione d’’o tre a uno!

 

 KOULIBALY[‘O Ggialante] 4,5 – Cumme si nun ce vulesse credere, ma ‘a serata d’’a Ggialante ajere fove overamente ‘na chiaveca,Ibrahimovic(cio) s’’o fumaje cumme a ttabbacco p’’a pippa!

 

 RUI 5  Si ‘a catena ‘e dritta  nun tenette, a mmancina (addó steva isso) ‘e ccose nun ghietteno meglio.

 

Fabian RUIZ 4,5  Riggía alla chianu chiano ‘e ccòglio e ssenza pressa ‘e vvengo.Bbatiejo (lento) e ccarta cunusciuta se facette sgamà sempe. Sufferette troppo ‘o passo ‘e ll’avverzarie e nun fove maje capace d’anticipà a cquaccheduno, né cercaje ‘e tirà ‘mporta [da ll’87’ ELMAS sv].

 

BAKAYOKO[‘O Mammone] 5  È overo ca fove nutizziato (ammonito) pe ssenza niente, ma po fove saddio (ingenuo) facennose jettà fora [65’] proprio quanno ‘o Napule cercava ‘e turnà a ggalla, sciupanno chellu ppoco ‘e bbuono ch’êva fatto nsi’ a cchillu mumento!

 

POLITANO 6  Spina ‘int’ô scianco d’’e diavule ‘e Piole cumplessivamente fove ‘o meglio d’’e suoje. [Dô 69’ PETAGNA 5,5 Tentaje ‘e mettere  paura â trasera (difesa) avverzaria.]

 

MERTENS[Ciruzzo] 6 – Nunn’ è  ‘ncundizzione, ma quanno lle capitaje ll'accasione se facette truvà pronto primma ‘mpignanno a Ddonnarumma e ppo signanno.  

 

LOZANO 5  Ajere ‘na mufeta senza cunzistenza. Passo arreto a ppietto a ll’urdemi vvote.[Dô 56’ ZIELINSKI 5,5. Facette sulo quacche ccusarella ‘mmiez’ô campo. Troppo poco!]

 

INSIGNE 4,5 Aizaje porvera; sempe stuppato dâ trasera (difesa) avverzaria, nun se rennette maje periculuso e nnun fove capace ‘e fa chello fatto cu ‘a nazziunala tagliana. [Da ll’86’ ELMAS sv.]

 

all. Gennaro GATTUSO 4,5  Pavaje ‘e nun avè miso ‘ncampo Pastacrisciuta e Mmezacucchiara e nnun avé rinfurzato ll’armidanno (centrocampo); a ccunte fatte ‘o quatto doje tre e uno suĵo venette meno a ppietto cu cchillo cchiú sustanziuso ‘e ll’avverzarie.

Arb.VALERI 3 E ll’aggiu trattato! Siscaje a ccapocchia, nutizzianno ‘e nuoste pe ssenza niente e nnun caccianno dduje cartelline russe  ‘nfaccia a dduje assassine russe e nnire ca s’’e ffosseno mmeretate. ‘Nzomma ‘nfra ‘na cosa e n’ata nce dette ‘na mana ‘ncopp’â scesa.

E bbasta accussí. Jette cumme jette e ppacienza, dàmmoce ‘nu pizzeco ‘ncopp’â panza e gghiammo ‘nnante. Mo si ‘o Cielo ‘o vvo’ ce sentimmo viernarì ca vene pe ccuntareve che succede ô san Paolo ggioverì a ssera contr’ ô  Rijeka p’’a cuppetta aiurupea.  Facimmo corna e staveti bbe’. R.Bracale Brak