PESCE SPATA FRIANTE Ô TIESTO

PESCE SPATA FRIANTE Ô TIESTO
chello ca serve pe 4 perzone
miezu kilò ‘e pesce spata tagliato a ffelle doppie dduje centimetre,
‘na cepolla ndurata ‘e Muntoro ammunnata e ntretata,
‘nu spiculo d’aglio ammunnato e ntretato,
‘nu túppeto ‘e prutusino lavato asciuttato e ntretato finu fino,
‘o zuco passato a culaturo (filtro) ‘e ‘nu limone ‘e Surriento,
dduje bicchiere ‘e vino janco asciutto,
‘nu bicchiere d’uoglio ‘auliva dunciglio,
sale duppio cunnito e ppepe janco macenato a ffrisco q.n. s.,

comme se fa:
Cu dduje cucchiare d’uoglio auntà (ungere) ‘na cummedità bbona p’ ‘o tiesto e derrammarve cepolla e aglio ammunnate e ntretate; lavà ‘e ffelle ‘e pesce, asciuttarle e sistimarle dint’â cummedità una vicina a ll’ata; salà, pepà e allegnà (condire) cu cquatto cucchiare d’uoglio e ‘nfonnere cu ‘o vino janco.

Cummiglià ‘a cummedità e mannarla dint’ô tiesto caudo a 200° pe diece minute. Sbattere dint’ a ‘na ciotola ll’uoglio rummaso cu ‘o zuco ‘e limone e ‘o prutusino ntretato. Sistimà ‘e ffelle ‘e pesce dint’ a ‘na sperlonga,allegnà cu ‘a sarzulella sbattuta e serví. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.
Magna Napule, bbona salute! Scialàteve e aggarbbatéve ‘o vernecale!!
Raffaele Bracale