TRASETURA CAUDA D’ALICE ‘MPANATE E FFRITTE

TRASETURA CAUDA D’ALICE ‘MPANATE E FFRITTE

chello ca ce vo pe 6 perzone
12 alice fresche ‘e jurnata bbelle grosse,
24 sulumiglie d’alicesalate,
24 aulive tonne ‘e Spagna desciusate a machinetta,
24 chiappare uvale levate ‘e sale, sciacquate e asciuttate,
pane rattato, ssale fino,pepe janco macenato a ffrisco q. n.s.,
abbunnante uoglio pe frijere,
24 steccadente.

comme se fa
Lavà l’ alice,levarle capa, coda, spina e mmennute (visceri) e sparterle, p’ ‘o lluongo, facennone dduje sulumiglie ; sciacquarle e stennere ‘e vintiquatto sulumiglie ‘ncopp’a n’asciuarro mettenno ‘ncopp’a ògne sulumiglio d’alice fresche ‘nu sulumiglio d’alicesalata; ‘nfilà dint’ô pertuso d’‘e vintiquatto aulive tonne ‘e Spagna desciusate a machinetta vintiquatto chiappare uvale levate ‘e sale, sciacquate e asciuttate e arravuglià attuorno a ògne auliva ‘na cocchia d’alice fresca e alicesalata e fermarle cu ‘nu steccadente; passarle dint’ô ppane rattato e ffrijerle dint’abbunnante uoglio callentato. Sullevarle cu ‘na ‘spumadèra mettennole pe ppoco ‘ncopp’ a ‘nu fuoglio ‘e carta asciugante a deposità ll’uoglio ‘e troppo;salà, pepà e serví caude ‘e fuculare.
Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.
Magna Napule, bbona salute! Scialàteve e aggarbbatéve ‘o vernecale!!
Raffaele Bracale