NAPOLI ATALANTA (14/9/2013)2 A 0 ‘A VEDETTE ACCUSSÍ

NAPOLI ATALANTA (14/9/2013)2 A 0 ‘A VEDETTE ACCUSSÍ Che bbella cosa ajere, guagliú! Che bbella cosa vattere ‘a scatrua travante (satellite) d’’a juventús(sa), vattere a ll’Atalanta e ttruvarse p’’o mumente sule sule ‘ncimma â crassifica cu nove punte!Vuje ce penzate? Avimmo vattutto tre alìmarie ( bestie) nere d’’o Napule! ‘O Palazzo, cu ‘a scusa d’’o surteggio [‘o gghiesseno a ccuntà a n’ato!...]ce ll’êva miso una arreta a ll’ata ‘e primmo appetito, ma ‘o Napule ll’à schiattato ‘ncuorpo a ttutt’’e ttre, mannanno ‘nu significativo avviso ô Milànno ca dummeneca ca vène nce aspetta cu ‘a scuppetta ‘mmano a mMilano... Ajere ‘o Napule all’ora d’’a tiella (puparuoleeee!) senza pressa, senza paura, senza cassura (pausa), superanno ll’esame rutizzio (turnover) e apprufittanno ca ‘mmerz’ê sseje ‘a scuatra ‘e parrucchino-conte e cchella d’’a bunettànema ‘e wallerettino mazzarri s’erano scardate ‘e ccorne ll’una cu ll’ata spartennose ‘e sciòccele, all’ora d’’a tiella dètte ddoje purpette a rraú a ll’atalantise/bergamasche pariente ‘e chilli ottuciente zezzuse ca appriesso a cchillu scrunacchiato e calibaldo peppe venetteno, ô 1860, a rrompere ‘o saciccio a nujaute napulitane, s’arrubbajeno sorde e ‘nnustrie noste e ‘e cunzignajeno a cchillu granne cesso mariuolo ‘e vittorio amanuella siconno! Ma lassammo perdere ‘a storia e parlammo d’’o fullé, passanno ê ppaggelle: REINA 6 - Serata tranquilla p’’o spagnuolo, ca cuncedette coccosa pure â plateja cu ‘nu paratone spettaculare ‘ncopp’ a ‘nu tiro a ggiro ‘e Denísso.P’’o riesto, pe uno comme a isso, urdinaria amministrazziona. MESTO 5,5 Appressuraje poco e nniente rummanenno spisso vascio a difenennere ‘a camma soja (la propria zona) Ma cu cchillu cugnome nun te puó aspettà ‘e cchiú! CANNAVARO 6 À dda ringrazzià ‘a nicessità d’ ‘o rutizzio (turnover) si ajeressera scennette ‘ncampo ô posto ‘e Britòs(so), ma tutto summato, pe furtuna nosta, fessarie nun ne facette e l’atalossa fove suddisfacente pure pecché ‘ncopp’ê ppalle aute nce penzaje Albiòl(lo) ca lle dètte ‘na bbona mana! ALBIOL 6,5 Riuscette a cuntené, ‘ncopp’ô juoco auto, a dDenìsso e fove pulitelico (prezioso) soprattutto ‘nfase ‘e plantamiento (impostazione) quanno se sganciaje accumpagnanno ll’azziona nsi’ô chirchio ‘e mità ccampo. ARMERO 5,5 Miezu voto mancante pecché soprattutto ô primmo ajone, quanno ‘o Napule s’’a jucaje quase sempe ‘ncopp’ô lato suĵo, riuscette a cupulià (dialogare) bbuono cu Mertens, ma cunzignaje quase tutte ‘e ppalle mise mmiezo o ô purtiere Consigli o â difesa atalantesa! Ma è accussí difficile ‘mpararse a cruassé( crossare)? DZEMAILI 5,5 Tanta vivacezza (dinamismo), ma perdette diverzi pallune periculuse che facetteno scattà ‘a repartita (ripartenza) d’’e guagliune ‘e Colantuono.Accompagnaje ll'azziona, ma sbagliaje cchiú ‘e ‘nu tiro ‘a fora. Se facette ‘nu poco perdunà cu ‘na granna ajuda (assist) ‘e tacco p’’o doje a zzero ‘e Cagliecònno! Ma po’ e à dda ffà ‘e cchiú! (Da ll’85° RADOSEVIC sv) INLER 6,5 Assaje meglio a ppietto ‘e Dzemaili.Nc’ è ppoco ‘a fà; cu don Rafele ‘o turco-napulitano è tutto n’atu jucatore, forze pechhé è prutetto annante e arreto: tutte le ll’azzione passajeno p’’e piere suoje e nun sbagliaje ‘nu pasiglio, arapenno cu cuntinuità verzo ll’esterne. Ce pruvaje cchiú ‘e ‘na vota pure ‘a fora, ma ‘o mmeglio ‘o facette vedé quanno ô mumento ‘e difficultà se pigliaje p’’a mana ‘a scuatra raggiunanno ô lemmeto d’’a camma ‘e ricore. Insigne 5,5 Nun s’ammereta ‘a sufficienza; me fósse aspettato ‘e cchiú! Ô primmo ajone pe paricchiu tiempo fove fora d’’o fullé; po don Rafele ‘o spustaje ‘ncopp’â curzia mancina e pe ttutta ll’arrancua s’accumminciaje a vvedé coccosa, ma fove acqua ca nun levaje sete! Pandev 5,5 Stesso discorzo fatto p’Insigne: nun s’ammereta ‘a sufficienza; ajeressera ‘o macedone nun riuscette a ffà vedé chello ca sape e ppo’ ffà. Me fósse aspettato ‘e cchiú! Che peccato! ‘Mpusizziona d’accabbatore (rifinitore) avette ‘na palla commeta pe mmetterla dinto e ‘a mannaje fora pure si ‘e poco. (Dô 66° HAMSIK 7 Trasetteno isso e Cagliecònno e ‘o fuullé cagnaje faccia! Appena trasuto sbagliaje sí quacche bassurero (suggerimento), ma po risultaje caturistico (determinante) con ll'incurziona dint’â camma atalantesa quanno favurette ‘a rredda d’’o Pipita ca sbluccaje ‘o fullé! MERTENS 6 P’’a primma bbona mez’ora s’attaccaje sulo dê pparte soje e isso cumbinaje bbuono cu Armero; spisso però preferette ‘o cruzzo ca fenette ‘mbraccia ô purtiere, mmece ‘e tentà ‘e zumpà ll’avverzario e ttrasí dinto. Cercaje quacche vvota ‘o ddaje e vvaje cu ‘nu cumpagno, ma nun fove epistrufato (assistito)! (Dô 59° CALLEJON 7 Trasetteno isso e Marekiaro e ‘o fuullé cagnaje faccia! ‘Mpressiunante. Terza rredda dinto a ttre ffullé. Trasette súbbeto ‘int’ô juoco e se facette annante e arreto tutta ‘a curzia ‘e dritta nsi’ â camma ‘e ricore soja, facennolo ssempe ‘e corza e facennose truvà puntuale a ll’appuntamento pe metterla dinto! E cchisto fósse ‘nu scarto d’’o Real? Ma ve ne jate?!) HIGUAIN 7 Da campione, sfruttaje a mmestiere ll'unica ‘nzecuritata (incertezza) ca le cuncedette ‘a difesa atalantesa, piazzanno pallone ‘ncopp’ô palo luntano.’Ncopp’ô juoco auto nun putette fà niente dint’â morrza d’’e lungagnune Stendardo e Yepes, ma quanno partette palla ô pere facette e ccomme ‘a differenza! BENITEZ 7 Esame rutizzio (turnover) superato. Don Rafele facette seje cagne a ppietto â scuatra titulare vista cu ‘o Chievo,sparagnannose ô pprincipio a mMaggio, a mMarekiaro, a zZuniga, a bBehrami, a bBritòsso e a cCallejon ma ‘a scuadra facette ‘nu primmo ajone ‘ndifficultà contr’ô catenaccio atalantese, tanto è vvero ca sbluccaje ‘o fullé sulo a ll’arrancua quanno don Rafele mannaje ‘ncampo primma a mMarekiaro ca dètte ‘na sacútita (scossa) ê suoje ca stéveno dint’ê chiavette (in difficoltà) e ppo a cCagliecònno ca nchiudette ‘e juoche. Cumplessivamente bbona pure ‘a prova d’’a difesa ca nun sbracaje quanno ‘a scuatra s’affannaje periculosamente cercanno ‘o vantaggio cu frennesia. arbitroROCCHI 4 ‘Sta mezacazetta, cummerciante (ma nun se sape ‘e che...) fiurentino ca ati vvote [me ricordo ‘e ‘nu san Zziro, cu ‘o Milan(no)]aveva ggià spezzato ‘e passe luvarde, ajere cercaje ‘e mezze ‘e aumentà ‘a ddosa d’ ‘o ‘o debbeto ca tène cu nnuje nun siscanno ‘nu sacrusanto ricore a ffavore d’ ‘e cuane e cunzentenno, senza sanziunarlo a dduvere,a ll’atalantise [ca se penzajeno ‘e stà jucanno a rugby] ‘nu juoco viulento e ammagagnato, caputianno ‘e falte e pigliannosela soprattutto cu ‘e difenzure nuoste e lassanno correre quase tutte ‘e ccarugnate ‘e ll’atalantise. e mettennose pe mmieze ê piere d’’e nuoste cu ‘na divisa ca assumigliava â nosta e faceva ‘mbruglià ‘e guagliune ca sott’uocchie ‘o pigliavano pe uno ‘e lloro.... Ma ajere facette palla corta pecché chist’anno ‘o Napule è ‘nu scuatrone e cciento Rocchi nun ce ponno! Allimmeno spero!Comme spero però ‘e nun truvarne tante ate comme a ‘stu Rocchi ca ‘nzomma ajere facette paricchi fullune sempe ‘ndanno d’ ‘e cuane, dimustrannose arbitro senza attenziona e nnun me meravigliasse ‘e saperlo ‘ncopp’ô stato paca d’Agnelli.Ma cu cchi t’ ‘a piglie?Cu cchi? E ffermammoce cca. Si ‘o Signore ce ‘o ffa vedé ce sentimmo gioverí ca vène p’’o fullé ‘e Ciampionsa , speranno ‘e puterve dicere ca‘o Napule à vinciuto! Bbona salute! R.Bracale Brak