VELLUTATA ‘E CICERE CU PPURPETIELLE MUSCARIELLE

VELLUTATA ‘E CICERE CU PPURPETIELLE MUSCARIELLE

nota:

‘E purpetielle ca a Nnapule se chiammano “muscarielle”  e a llengua ttaliana  “moscardini”  songo chilli purpetielle piccerille piccerille ca se magnano cu unu muorzo e addorano assaje ‘e musco (muschio)

chello ca serve  pe 6 perzone:

3 buccaccielle ‘e cicere àrvate (lessati)  ‘e  250 gramme ll’una, ,

‘Nu kilò  ‘e muscarielle lavate e  pulezzate,

dduje spicule  d’aglio ammunnate e scamazzate,

3 fronne ‘e sarva   (salvia) fresca,

‘na cemmetella ‘e rosamarina fresca,

‘Nu bicchiere e mmiezo d’ uoglio ‘auliva duciglio (e.v.p. s. a f.),

sale fino e ppepe janco macenato a ffrisco  q.n.s.

Comme se fa.

Mettere dint’ a ‘na mmiscatora ‘e cicere d’ ‘e bbuccaccielle, e nzuffrà  (frullare) nfi’  a uttené ‘na crema  abbunnante, críceta e ddellicata (spumosa e soffice);mettere a ffuoco allero allero ‘na cummedità cu ‘a mmità ‘e ll’uoglio,  n’aglio ammunnato e scamazzato, ‘a cemmetella ‘e rosamarina fresca, e appena ll’aglio à pigliato  culore auní ‘a crema ‘e cicere nzuffrate, sale fino e ppepe janco macenato a ffrisco, agnadí  ‘a sarva  e fà peppià pe cinche, diece minute Mantènere ‘ncaudo.

Fraditanto appruntà p’ ‘a cuttura ‘e muscarielle  lavannole e pulezzannole a mmestiere (levanno cioé ê muscarielle  pizzo, uocchie, ‘a muchilla d’ ‘o nniro (sacca del nero) (pure si è ppiccerenella) e svacantanno ‘a capa doppo d’averla derribbata.Mettere  ‘sti muscarielle appruntate  dinto a n’ata cummedità cu ll’uoglio rummaso ll’atu spiculo d’aglio ammunnato e scamazzato  e a ffuoco miccio purtarle chianu chianu a   ccuttura: ce vo’ quase n’ora. Attenzione: nun s’ à dda agnadí acqua:  ‘o purpo s’ à dda cocere sempe  dinto a ll’acqua soja!

Sulamente a ffine cuttura accuncià ‘e sale e ppepe comme se vo’.Purziunà mettenno ‘ncopp’ô plinto  (sul fondo) d’ ògni piatto ‘na cucchiarata abbunnante  ‘e  vellutata e ‘a coppa a cchesta  una o ddoje cucchiarate ‘e muscarielle caude ‘e furnello e serví ‘ntavula   comme primmu piatto o comme  trasetura.

Vini:  asciutte  e profumate  janche nustrane  ( Solopaca, Capri, Ischia, Falanghina, Fiano, Greco di Tufo) fridde ‘e jacciaja o ‘e ‘rotta.

Mangia Napoli, bbona salute!

Raffaele Bracale