NAPOLI- PARMA [31.1.21] 2 A 0 ‘A VEDETTE ACCUSSÍ

NAPOLI- PARMA [31.1.21] 2 A 0

‘A VEDETTE ACCUSSÍ

E cche vvulimmo dicerre guagliú: ca ‘o Ciuccuio po’ rridere? E ddicimmo ca sí datose ca ajeressera ô Maradona ‘o Napule cu n’atalossa  (prestazione) brutta, ma zubba  (solida) vattette  ‘o  Parma mettemmose dint’â sacca tre ppunte sustaziuse ca p’’o mumento lle cunzentono a cumplessiva quota trentasette ‘e stà a pparo d’’a Lazzio ‘e Lotito cu ‘na mubbara (partita) mancante e ttutto chesto ringrazzianno ll’addaffe  (reti) d’’o Turco ô 32’ e dde Politano a ll’82’. Certo a nnujaute d’’a tribbuna-divano nce fósse piaciuto d’ affuzzà (di vincere) cchiú llargo, ma nun ce scurdammo ca ‘o Parma  scennette ‘ncampo, sbeteco cumm’è, cu ‘o sanco a ll’uocchie difennennose a mmuorze e ppizzeche… i allora nun mettimmoce accercà ‘o pilo ‘int’a ll’uovo e ccuntentammoce; chello ca conta è ‘o zuco: arnassa (vittoria) êva ‘a  essere e cchella   arrivaje cu ‘nu stuco (gol) p’ajone per (tempo) senza dà maje ‘a sensazziona ‘e sufferí troppo, manco quanno quacche vvota ‘o Parma tentaje quacche surtita senza però maje spaventà a Ppastacrisciuta. A ‘stu punto ‘o Ciuccio à truvato n’ata vota ‘a camma  (zona) Ciampionsa  e mmo nunn’ à dda perdere ‘a strata cuncreta centranno ati natigge (risultati) pusitive.

Passammo ê ppaggelle:

 OSPINA [Pastacrisciuta]  6  Sicuro e curaggiuso quanno ascette, ma maje chiammato a ffà cape d’angelo o miracule.

 

 DI LORENZO 6  Atalossa (prestazione) pusitiva  a ddritta pure quanno  Kurtic(ce) o Gervigno s’ allargajeno da chella bbanna; peccato pe ‘nu sfregazzo (sbavatura) però senza cunzequenzie.

 

 KOULIBALY[‘O Ggialante] 6,5  ô ssolito taminno  (sicuro) ancercanno (anticipando) e dduminanno ‘ncopp’a cchi capitaje; ‘na perna chella chiusura a ccampo apierto ‘ncuoll’a  Ggervigno.

 

 MANOLAS[Chitelassa] 6 Prutacunista ‘e n’atalossa (prestazione) sustanziosa e masculla (lucida) fatta d’attenziona e ccerevella.

 

MARIO RUI 6 Datose ca bennamiente (fisicamente)perdette ‘o stibbacco (duello) cu Kucka ca s’allargaje dê pparte soje, fove custretto a dd’ausà sperienzia e ccazzimma. Meglio ‘e niente! [Dô 77' HYSAJ[Mezacucchiara] s.v.]

 

 ELMAS[‘O Turco] 7  Finalmente Gattuso ll’à truvato ‘o pizzo justo addó farlo jucà a ‘stu ggiuvinotto assaje ‘nteressante ca ajere nun sulo nce levaje ‘e ccastagne dô ffuoco signanno  ô 32’ ‘nu granne stuco (gol) fatto ‘e tacnía  (tecnica), forza e  pperzunalitá, ma fove  periculuso pure a ll’arrancua (nella ripresa). [Dô 77' MAKSIMOVIC [‘O ‘Ntontero]s.v.]

 

 DEMME 6,5  Taminno (prezioso) se facette ‘nu mazzo tanto, nun se tiraje maje arreto, se magnaje ‘o campo cu zurea (ritmo)e arruvaja (visione) ‘e juoco.

 

 ZIELINSKI 5,5  Ll’unico ca proprio a nnujaute d’’a tribbuna-divano nun ce piacette: nun cercaje, nè truovaje spazzie, nun se ‘nzertaje( inserí facenno sulo quacche cusarella ‘ncupoertura; troppo poco! [Dô 70' BAKAYOKO 6 – Dint’a vvinte minute facette vedé presenza,forza e bbania (fisicitá).]

 

 LOZANO 6,5 Succedette sempe coccosa quann’isso tassariaje (accelerò)mettenno ‘nnazzemma (in crisi) ‘e madaffie (difensori) ca foveno nutizziate  (ammoniti).

 

 PETAGNA 6  Facette chello ca sape fa faticanno p’’a scuatra ‘e sponna, muvennose ‘mpressiona (nel pressing),tenenno palla pe ffà saglí ‘e carigginne (gli esterni). [Dô 63' POLITANO 6,5 Pure ajere servette trasenno dâ panca; cumminfatte truvaje ‘o tiro ‘e mancino ca nchiudette ‘a facenna!]

 

 INSIGNE 6  Ussessionato dô stuco (gol) nummero ciento nun facette assaje pruvanno sulamente a s’accentrà pe ccercà ‘a porta cu ‘o pere ‘e dritta, ma centraje sulo ‘nu palo e nnient’ato.

 

all. GATTUSO 6 -  Scuatra appaurata,quase brutta ma maiacaffia (sufficiente)pe cchello ca cercava: affuzzà (vincere) nun ‘mporta comme.

arb. LA PENNA 5,5 Tutto summato facette ‘o duvere suojo ‘a fora ‘e quacche zzarro cca e lla.

E nnun dicimmo ‘e cchiú. Mo si ‘o Cielo ‘o ppermette ce sentimmo ggioverí pe ccuntareve che succere mircurí a ssera ô Maradona contro a ll’Atalanta pe ll’addabba (andata) ‘e sfarnaja (semifinale) ‘e Coppa Itaglia. Staveti bbe’. R.Bracale Brak