NAPOLI – INTER 05.05.13 (3 -1)‘A VEDETTE ACCUSSÍ.

NAPOLI – INTER 05.05.13 (3 -1) ‘A VEDETTE ACCUSSÍ. Che bbella cosa a fForerotta ajeressera , guagliú! Ce avastaje n’ajone e ‘nu poco pe vvencere senza parpetazziona e sse vincette, se vincette bbuono cu ttutto ca a ffianco d’ ‘o presitente ce steva assettato chillu cestariello ‘e Giggino-uocchie stuorte! Manco ‘o penziero ca ‘o ponno carcerà ‘o cunvincette a starsene â casa! Se vincette e ce mettettemo dint’â sacca ‘e tre ppunte facenno capí a Allegri e a cchella ccapa ‘e puorco ‘e Galliani ca ‘o siconno posto è dd’ ‘o nuosto e nun ce ànn’ ‘a rompere ll’amice ‘e Maria De Filippi! E i’ me ll’aspettavo ‘e vencere, me ll’aspettavo ‘nu poco pecché ‘o zencariello steva tranquillo ‘e capa (avenno fatto pace cu ‘a mugliera…), ‘nu poco pecché ll’Interre ‘e ‘sti tiempe è ppoca cosa, ‘nu poco pecché Stramaccioni nun saccio si me fa ridere o me fa pena e ‘nu poco pecché, jenno a uosemo, m’ ‘o ddiceva ‘o core. Ma mo ce s’ à dda credere e da miercurí ca vène s’ à dda jucà cu ‘o sanco a ll’uocchie chisti ati pochi fullé ca mancano nfi’a che fernesce ‘stu campiunato ca – tanto pe nun cagnà – ‘a rubbentússa s’è mmiso dint’â sacca aiutata nfi’a ll’urdemo da ll’arbitre, comme succedette ajere dint’ô cessum stadium quanno pe vattere ‘o Palermo ce vulette ‘nu ricore rijalato ‘a ll’arbitro a cchillu chiaveco ‘e Vuciniccio ca facette ‘a sceneggiata e ll’arbitro se ll’ammuccaje; ‘a rubbentússa s’è mmiso dint’â sacca n’atu scutetto e tutt’ ‘e tifuse d’ ‘a vecchia zoccola e ppure cierti pennarule piamuntise diceno ca mo ‘e scutette so’ 31 (‘o padrone ‘e casa) addó ca p’ ‘a Federazzione ne so’ ssulo 29 (‘o pate d’ ‘e ccriuatture). Ma lassammo stà chesto e penzammo sulo ca da miercurí ca vène s’ à dda jucà cu ‘o sanco a ll’uocchie e ccu ‘a gnósa (consapevolezza) d’ essere addiventate overamente granne e téleje (maturi) pe ll'ubbiettivo principale, pure si pe mmo ce attocca ‘a siconna piazza. Passammo ê ppaggelle va’: DE SANCTIS 6- Se facette truvò pronto ‘ncopp’ê tante tentative ‘a fora ‘e ll’interiste. Sfurtunatiello, ‘ncopp’ô ricore [sacrusanto] tuccaje ‘o pallone, ma nun riuscette a fermarlo; ô ssolito po p’ ‘o fà ascí ll’êtten’ ‘a dà ‘o sfratto! GAMBERINI 5,5 Guarín(no) tenette n’atu passo, ma ll’ècchese viola lle pigliaje ‘e mesure pure si po sufferette ‘nu poco cca e lla. Ascette pe crampe (dô 62° ROLANDO 6 Poco ‘mpignato se cuntentaje ‘e fà ggirà ‘o pallone e poco ato; ‘Nu bbuonu disimpegno purtaje ‘o San Paolo a sbatterle ‘e mmane e mme facette piacere). Cannavaro 6,5 Ll'Inter(re) fuje orfana ‘e ponte e sustanza , ma isso muntaje guardia custante a gGuarín(no) ca spisso avasciannose ‘o purtaje fora pusizziona. Ma ajeressera, pe mmiraculo, ‘o capitano nun facette nisciunu sfregazzo (sbavatura). BRITOS 6- Nun risultaje pusizziunato a dduvere ô mumento d’ ‘a falta (fallo) ‘e ricore ‘e Zuniga, ma p’ ‘o riesto facette tutte liturgie(interventi) pulite. MAGGIO 5,5 Currette assaje nfi’ a ll’urdemo, ma nun riuscette maje a calibbrà bbuono ‘e bbassuere (suggerimenti) a ccentro e spisso nun fuje capace ‘e ‘ndivinà ‘o mumento ‘e ‘nzertamiento (inserimento). BEHRAMI 7 Nun dètte rispiro ô centrocampo ‘nterista.Comme a ‘nu cane presa attaccaje chiunche purtasse palla e cquanno capitaje ca ll’Interre ‘mpurraje (spinse) se piazzaje assaje vascio quase comme difenzore agghiuntato. DZEMAILI 6,5 Spisso cagnaje passo,appressuranno (spingendo) a mmestiere ‘nfra ‘e linie e mettenno ‘ncrise ‘a tràsera (retroguardia) ‘nterista. Nce pruvaje cchiú ‘e ‘na vota ‘a fora, ‘mparticulare ‘a ‘nu schema ‘e squina (d’angolo), ma Handanovíccio ce mettette sempe ‘na pezza levannole ‘o sfizzio ‘e signà. Nun saccio pecché Mazzarri facette ascí a isso e nno a mMaggio (dô 66° ARMERO 6,5 ll’êsse fatto trasí primma! Trasette súbbeto ‘int’ô juoco accussí ccomme dint’ê pricidente fullé. Se piazzaje a ffà ‘o mediano mancino,dànno spisso ‘na mana a zZuniga e dê pparte lloro nascètteno azzione assaje periculose). ZUNIGA 6 ‘A chiena e ‘a vacante, anze ‘a vacante e ‘a chiena; cumminfatte ô pprincipio ‘e fullé faticaje ‘nfase difenziva e commettette ‘ngenuamente falta ‘e ricore ‘ncuollo a Alvarèz(zo), ma po criscette a vvista d' uocchio prupunennose cu preputenza e fuje bbravo e caímmo (furbo) a prucurarese ’o ricore [sacrusanto!] ca servette a ripurtà annante ê suoje. HAMSIK 6+ Bbona atalossa ‘e Marekiaro ca ‘e ccose cchiú mmeglio ‘e facette vedé ‘nfase ‘e repartita (ripartenza) allummanno ll’azziona cu apereture e lanze ‘mprufunnità. Se facette vedé spisso pure ‘mmiez’â camma ‘e ricore, ma sbagliaje ddoje còmmote accasioni ‘a poche passe ‘a Handanovíccio e n’atu paro ‘e vote se facette ribbattere ‘o tiro. PANDEV 7,5 Che granne jucatore e cche finale ‘e tempurata (stagione)!’Nu ggenio! Pronti-via e sservette n’ajuda eccezziunale (pe tecnica e ‘ntelliggenza) a cCavani ca nun putette sbaglià. Cchiú ddoppo ‘a ‘na ‘nvenziona soja nascette ll'azziona ca mettette a zZuniga ‘ncundizziona d’abbuscarese ‘o ricore a ffavore e, ppe cumpletà cu ‘na cerasella ll’atalossa soja, prupizziaje pure ‘a terza rredda mettenno a ccentro ‘nu pallone velenuso che mannaje ‘ncrisi‘a tràsera (retroguardia) ‘nterista e soprattutto a Handanovíccio. Ascette abbuscannose ll’applavuso ‘e tutto ‘o san Paolo e d’ ‘a tribbuna divano.(da ll’ 85° INSIGNE sv, ma 6,5 sulo pe cchillu aggancio d'auta scola fatto appena trasuto, ca ‘nzuccaraje ‘a vocca d’ ‘o San Paolo). CAVANI 9 Ancòra n’ata tripletta e atalossa (prestazione) a ttutto campo. Dimustraje granna pricisione e pruntezza ‘ncopp’ô bbassurero ‘e Pandèv(o) e dimustraje po, ‘sta vota, granna freddezza ‘a ll’únnece metre, battenno ‘nu para-ricure come Handanovíccio.Mettette dinto pure ‘a rredda d’ ‘a tranquillità (e ffujeno 101 cu ‘a maglia luvarda) allungannose cu ‘na sciuliata, e credennoce cu ttutto ca Handanovíccio era asciuto. Naturalmente nun me scordo ‘o granne cuntribbuto dato avasciannose ‘ndifesa. MAZZARRI 6,5 ‘A scuadra avette ‘nu granne accercamiento (grande approccio) ô fullè;sbluccaje quase subbeto ‘o risultato e cuntinuaje a appressurà (spingere), jucanno a mmemoria ‘nfase uffenziva, ma fallenno tante accasioni pe diplastà (raddoppiare). ‘Ncassata ‘a futtitura d’ ‘o pareggio ‘eAlvarèz(zo) riturnaje a dettà legge e gghiuoco riuscenno a purtarese â casa ‘e tre ppunte tranquillamente. A ll’arranqua concedette minuti a rRolando, a Insigne e a Armero,ca – pe mme - se mmeretasse sempe ‘e jucà ‘e cchiú lassanno ‘mpanca a mMaggio e spustanno a zZuzzú a ddritta. l’arbitro GIANNOCCHERO 5 (‘e stima) ‘Stu sischietto ‘e Le Veglie (Lecce) ca,comme a ttutte ‘e puglise è quase certamente tifoso d’ ‘a rúbbentús(sa), teneva ‘a farse perdunà vecchi fetenzie fatte ô Napule ê tiempe ‘e Lavezzi, ma ajeressera nun se levaje nisciuno dèbbeto nè pperò , pe furtuna nosta, nne aumentaje ‘a ddòsa ma cchiú ‘e cinche nun me sento ‘e lle dà; troppo braduso e ‘ndiciso siscaje sempe luntano ‘a ll’azziona. E ccu cchesto ve saluto e si dDi’ vo’ ce sentimmo ggiovedí ca vene speranno ca ve pozzo cuntà d’ avé vinciuto a bBologna! Staveti bbe’ R.Bracale Brak