ROMA – NAPOLI (19.05.13) 2 A 1‘A VEDETTE ACCUSSÍ

ROMA – NAPOLI (19.05.13) 2 A 1 ‘A VEDETTE ACCUSSÍ Ajeressera a ll’ulimpico rumaniso urdemo atto d’ ‘o campiunato 2012/2013 cu ‘na scuatra [‘o Napule]ca nun teneva nient’ato ‘a dimannà e cu n’ata [‘a Roma] delusa e ‘o Napule – mannaggia ê cane ‘e cancielle! – dètte ‘na mana â Roma facennose vattere dê chianchiere ‘e Ardizzoni ca ‘ncapo ‘e sette minute ‘e juoco mettettono fora cumbattimento (senza ca ll’arbitro dicesse niente...) a Pandev(vo) custretto a ascirsene lassanno ‘e suĵe orfane ‘e ll’unico ca me parette tenesse ggenio ‘e fà coccosa, mentre ll’ate, ancòra frasturnate dâ sciampagna e dô mmagnà ca s’èrano menate dint’ê ccape ‘e morte miercurí passato a ddu D’Angelo, zumpettiaveno p’ ‘o campo aspettanno ca fernesse ‘a sceneggiata e calasse ‘o sipario. ‘Nzomma ajeressera Roma-Napoli, urdemo atto d’ ‘o campiunato, ufferette pochi spunti ‘ncopp’ô tturreno ‘e juoco, ma tanti a bbabbuordo ‘e campo addó tutte aspettajeno ca quaccuno svelasse ‘o quarto mistero...’e Castevolturno: Mazzarri sí, Mazzarri no. E sulo a ll’urdemo se venette finalmente a ssapé ca Mazzarri c’êsse levato ‘o ‘mpiccio e se ne fósse juto a ffelicità a quaccun’ato, comm’i’ avevo sempe sperato!De Chiacchiaroniis però manco doppo ca Wallerettino Erode Mazzarri s’era dichiarato tenette ‘o cuorio ‘e dicere chi vene a essere ‘o prossimo trainer(ro) d’ ‘o Napule e dicette sulo ca ce ‘o ffa sapé attraverzo Twitter(ro). I’ mo dico: Gué, presidè... ma ‘a vocca pe pparlà nun ‘a tiene?No? Addó sta scritto ca uno, pe sapé coccosa, à dda jí a lleggere ‘ncopp’ a tTwitter(ro)? E si ‘nu tifoso nun ‘o tene ‘stu cacchio ‘e Twitter(ro)?... Si nun sape manco ched’è? Che ffa? Nun ll’à dda sapé. Cumunque pure chesto fa parte d’ ‘a sceneggiata napulitana:Isso (de chiacchiaroniis)Essa (‘a scuatra) e ‘o Malamente (mazzarri)... Jammo vedenno. P’ ‘o mumento nun s’ à dda sapé niente; se sapette sulo ca ajeressera fenette ddoje a uno p’ ‘e rumanise ca tenetteno cchiú ggenio ‘e vencere, nun fósse ato ca pe priparà ‘a sfita d’ ‘e sfite ‘e domenica ca vène, cu ‘e frate-cucine lazziale p’ ‘a coppa itaglia.Po’ ‘o Napule e soprattutto pe Wallerettino Erode Mazzarri senza cchiú stimule o ubbiettive,fove (fu) overamente difficile trasfurmà uno d’ ‘e fullé storicamente cchiú sentute d’ ‘a Serie A ‘into a coccosa ca nun fósse ‘nu semplice allenamento. ‘Ncunchiusiuone chillo d’ajeressera fove ‘nu fullé inutile e ppe cchesto ca ll’averlo perduto coce, coce assaje! Passammo ê ppaggelle ROSATI: 6-Venette aiutato dô palo e da Cannavaro doppo ‘nu bbellu paribbaso (intervento) ‘ncopp’ a Marquinho. Se cumpurtaje a mmestiere pure ‘into allimmeno n’ati ttre accasioni, quanno s’uppunette a lLamela... ma fove micco, quanno smanacciaje ‘o pallone senza forza ô mumento d’ ‘a rredda ‘e Destro! ROLANDO: 5 ‘Nu granne paribbaso (intervento) ‘ncopp’ a Marquinho ô primmo ajone, ma po ‘na fessaria grossa quanno se facette fottere dâ nfenta ‘e Destro ‘ncopp’â rredda d’ ‘o 2-0. CANNAVARO 5: Pe tutt’ ‘o fullé se tiraje ‘a pizza sotto e nun dètte ‘na mana a nnisciuno chiammanose fora; p’ ‘o riesto ‘nu bbuonu salvataggio ‘ncopp’â linia, ma po spisso jette dint’ê chiavette.(dô 73°: CALAIÒ 6: Ce pruvaje, ma senza bbona sciorta. Fósse stato meglio ca Mazzarri ll’êsse fatto trasí primma ô posto ‘e El Kaddouri). BRITOS: 4,5: ‘Nu furro (buco) retissante (clamoroso) ô mumento d’ ‘a rredda ‘e Marquinho, ‘nu furro ca pesaje comme a ‘nu petrecuglio (macigno). (dô 53° ARMERO: 5,5. M’aspettavo ‘e cchiú! Forze êva abballato troppo ‘int’â semmana). ZUNIGA: 6 Partette assaje bbuono, po chianu chiano s’ammusciaje pure risultanno ‘nfra ‘e cchiú pusitive. BEHRAMI: 6,5: ‘o solito luciadore (gladiatore),’nu cane ‘e presa curaggiuso e cchino ‘e cegna, l'urdemo a mullà.Asciuto Cannavaro fernette ‘o fullé facenno ‘o centrale a cquatto e s’ ‘a vedette ‘e bbello! DZEMAILI: 5,5: Êsse pututo fà coccosa ‘e cchiú; cumminfatte ‘a sóla fònda (il merito) soja fove chella ‘e tirà ‘a punizziona ‘a do’ nascette ‘a rredda ‘e Cavani. Ma fove troppo poco. MAGGIO: 4,5: Pure ajere dimustraje d’essere arrivato a ll’abblativo; praticamente è ‘nu jucatore fernuto e ‘a curzia ‘e dritta nun s’ ‘a sape magnà cchiú! HAMSIK: 5 L’aspettaje inutilmente pe tutt’ ‘o fullé ca appicciasse ‘nu biancale, ‘nu tracco,’na bbotta-a-mmuro, ‘na luce o allimmeno ‘nu fitti-fitto.Ma nun fove cosa! PANDEV: sv E nno pe sfarma (colpa) soja! (dô 7°: EL KADDOURI 4: Inutile, senza cegna e senza perzunalità;nun cunvincette,aizaje pórvera e fumeta. Me sto’ ancòra addimannanno pecché Mazzarri ‘o facette trasí, mmece ‘e mettere súbbeto dinto a cCalaiò o a rRadosevic(cio).) CAVANI: 6,5: Ô primmo ajone se magnaje ‘na rredda, ma dètte ll’anema e signaje a ll’arranqua ‘a rredda d’ ‘a bbannera, 29ª d’ ‘o campiunato.Pe mme ‘o Napule, si vo’ jí luntano, nun po’ ffà a mmeno d’ ‘o Zengariello! MAZZARRI 5 Nun è ‘o caso ‘e metterse a ttirà sentenze’ncopp’ a cchello fatto ‘a wallerettino durante tutta ‘a tempurata; cca parlammo sulo d’ ‘o fullé d’ajere e dicimmo ca sbagliaje quanno nun sapette dà ê suoje stimule o ubbiettive pe ‘nu fullé ‘ncopp’â carta inutile; comme pure sbagliaje quanno, perduto súbbeto a pPandev(vo), facette trasí a El Kaddouri ca aizaje pórvera e fummo. Pe bbona sciorta nosta chella d’ajeressera fove ll’urdemu fullé cu Wallerettino ‘mpanca. Mo sperammo sulo ca De Chiacchiaroniis piglia a ‘nu trainer(ro) ca tene ‘ntenziona ‘e véncere, pecché nuje ce simmo stancate ‘e stà ê spalle d’ ‘a rubbentus(sa)!Nuje vulimmo essere primme e nno siconne pecché ‘o primmo è pprimmo e ll’ate so’ ttutte strunze! ll’arbitro BANTI 3 ‘e stima. Vecchia cunuscenza, ajere ‘mmece ‘e levarse quacche ddebbeto cu ‘o Napule, ne aumentaje ‘a ddosa. Si ‘o Signore ‘o vvo’ ce sentimmo â prossima vota, ca nun saccio quanno vene a essere. Staveti bbe’! R.Bracale Brak