BENEVENTO – NAPOLI (25.10.20) 1 – 2 ‘A VEDETTE ACCUSSÍ

BENEVENTO – NAPOLI (25.10.20) 1 – 2

‘A VEDETTE ACCUSSÍ

Assa fa ô Cielo guagliú! Ajere ‘o Ciuccio, a ll’ora d’’a tiella jette a Bbeneviento contr’ê lucale e ddoppo ‘nu sibbacco (match) cumpricato e scamuso  riuscette a sse mettere dint’â sacca tre ppunte ‘mpurtante. Peccato pe chell’addaffa (rete) pigliata ô trentesimo, stuco (gol) ca nun ce fóssemo mmeretato visto ca nsi’ a ttanno ‘e lucale nunn êveno fatto ‘nu saciccio e riuscetteno a ssignà sulo ‘ncopp’a ‘nu maddaddo (contropiede) partuto pe ‘na meza fessaria ‘e Lozano ca sbagliaje ‘nu pasiglio (passaggio) a mmità ccampo; cuntemporaneamente pe pparta soja Di Lorenzo se scurdaje ‘e Roberto Insigne i ‘o Lungagnone ce mettette ‘a jonta nun liggenno ll’azziona e mmenannose tarde ‘ncopp’ô tiro d’’o frattese piccerillo. Tutto chesto justo â mez’ora e ffove allora ca ‘o Napule accumminciaje a gghiucà facenno ‘o Napule e ddoppo ‘nu paro d’addaffe (reti) ca Doveri currettamente ce annullaje e ‘nu paro ‘e ricure a ffavore ca, sbagliano, nun ce dette finalmente ô 60’ Lorenzigno truvaje da fora, cu ‘na pennellata dint’ô sette luntano,  ll’uno a uno e ‘ncapo ‘e n’ati ssette minute Petagna mettette dinto ‘o pallone ‘e ll’arnassa (vittoria) cercata e angappata. Assa fa ô Cielo guagliú!

Passammo ê ppaggelle:

MERET[‘O Lungagnone] 6 -Ma sulo cumme media ‘nfra ‘o 5 ca se fósse mmeretato p’’a  meza fessaria fatta ‘ncopp’ô stuco (gol) ‘e Roberto Insigne i ‘o 7 p’’a parata a ll’urdemu siconno ‘ncopp’ô tiro ‘e timmurria (punizione) ‘e  Sau. Nun me dicite niente ma pe mme Pastacrisciuta è assaje meglio: a pparte ca tene ‘sperienzia, sape leggere ll’azziona primma e sse mena a ttiempo, dà pacatezza (tranquillità) â trasera (difesa) cosa ca nun po’ ffà ‘o Lungagnone.

 

DI LORENZO 5,5 Jette meglio a ll’arracua (nella ripresa), ma se perdette ô 30’ a Roberto Insigne

 

MANOLAS[Chitelassa] 6 Sfurtunato  primmaquanno ô 30’ mannaje ‘o pallone addó steva ‘o frattese piccerillo ca libbero e ssulo futtette ô Lungagnone, cchiú sfurtunato quanno centraje ll’afachía cu ‘na cabbesera  (un colpo di testa).

 

 KOULIBALY[‘O Ggialante] 6 Facette ‘o ssuojo senza fallà cuntrastanno, facenno ‘o cane ‘e presa,tajennanno (impostando).

 

MARIO RUI 6,5 Bbona atalossa (prova) racabbannose (sovrapponendosi) e jabbranno (crossando).

 

FABIAN RUIZ[Anemalonga] 6 ‘E’ncuraggiamento. Jucaje dint’ô scaravattolo ‘e  riggia,diammanno  (appoggiando) sempe ll'azziona, allarganno  ‘o juoco; però nun se vedette a ttirà e ssi ‘o ffacette nun fove priciso. [Da ll’ 88' LOBOTKA 6 ‘e stima].

 

BAKAYOKO[‘O Mammone] 5,5  Troppo cumpassato e ‘mpriciso; à dda fa ‘e cchiú.Ascette pe n’additto  (infortunio) ô denucchio. per [Dô 74' DEMME 6 Se cumpurtaje a mmestiere dànno tachettía  (copertura) e rafaddanno  (respingendo) ‘nu paro d’assalibbe  (traversoni) periculuse; se jette a prucurà pure ‘nu ricore ca Doveri nun lle dètte. Peccato!]

 

 LOZANO 5,5  Cumplessivamente nun facette assaje:  poca corza  e ppochi ghiucate ‘e sustanza; però se fósse mmeretato ‘nu ricore a ffavore ca, nun se sape pecché nè Doveri, né ‘a varra  nun lle vulettene dà… E cche saciccio! [Dô 58' POLITANO 7 Trasette cagnanno ‘o sibbacco (match):dduje missidde  (assist) e ‘nu  palo scardato!]

 

MERTENS[Ciruzzo] 5  Jurnata no. Jucaje pe cquase n’ora ma nun se vedette maje: sempe mutajffato (raddoppiato) jette spisso dint’ê chiavette senza gatà (incidere) maje.[Dô 58' PETAGNA 7 Facette chello ch’êva ‘a fa: dètte daimmo (sostegno) a Ccaromecosta e asasa (soprattutto) ô 67’mettette ‘a firma sotto n’addaffa (rete) ‘mpurtante ca ce dètte ‘e tre ppunte.]

 

INSIGNE [Lorenzigno] 7,5 ‘Ncapo ‘e ll’arrancua (ripresa) pe n’attasallulo (fuorigioco) ca ce steva se  vedette  annullato ‘o stuco  (gol) d’’o russimmo  pareggio. Però dopoo pochi minute, justo ô 60’  truvaje da fora ‘na pennellata  mancina spettaculare, signaje e dda chillu mumento fove ‘o vero zaimmo  (leader) d’’a  scuatra! Peccato ca nun accumminciaje da primma  [Da ll’ 88' GHOULAM 6 ‘e stima].

 

OSIMHEN[Caromecosta] 5: Ajere nun fove isso, nun se muvette a mmestiere spisso attaccanno malamente ‘o spazzio senza truvà amecca (profondità). A ll’arrancua (nella ripresa) quacche cusarella ‘e cchiú, ma poca rrobba e nnun fove capace ‘e lassà ‘o singo. Peccato.

 

 

all.  GATTUSO 6,5 - Buonu Napule,asasa (soprattutto) pe ccumme riaggette. Però à dda accuncià coccosa arreto asasa ‘mporta! Bbuone ‘e cagne.

Arb. DOVERI 5 Addó vedette i addó cecaje e nnun ce dètte dduje ricure sacrusante.

 Cunchiudenno ‘o Napule ajere cunquistaje ‘a quarta arnassa (vittoria) ‘e fila ‘ncampionato mazzianno ‘ncasa soja ‘o Bbeneviento e cce chiagne ‘o core a ppenzà ca ‘o trabbante spurtivo nce à levato ‘nu punto ‘ncrassifica, allimmeno p’’o mumento e nun putimmo stà primme ‘ncrassifica. Peccato!

Mo  dummeneca primmo ‘e nuvembre, p’’e Sante arriva ô San Paolo ‘o Sassuolo ‘na scuatra scamosa assineja (satellite) d’’a vecchia zoccola; stammo a vvedé che succere. Però  gioverí nce aspetta a Ssan Sebastian(ne) ‘o sibbacco ‘e Cuppetta aiurupea  contro ‘a Rial Sociedad(da). Sperammo ‘e nun fà ‘a fijura marrò fatta cu ll’ulandise.

Si ‘o Cielo ‘o vvo’ ve ne parlo viernarí ca vene.

Staveti bbe’. R.Bracale Brak